༢༠༠༩ ཕྱི་ཟླ་ ༨ ཚེས་ ༢༤ རེས་གཟའ་ཟླ་བ།
༄༅། །ཨོ་སི་ཊོ་ལི་ཡའི་རང་དབང་ཚོགས་པས་༸གོང་ས་མཆོག་འདི་ལོའི་ཕྱི་ཟླ་༡༢ ནང་ཨོ་སི་ཊོ་ལི་ཡར་ཆིབས་སྒྱུར་བསྐྱང་སྐབས་ཨོ་སི་ཊོ་ལི་ཡའི་གྲོས་ཚོགས་གོང་མའི་ནང་། སྲིད་འཛིན་གྱི་ཁྱམས་རའི་གྲལ་གནས་སུ་གདན་ཞུ་དགོས་པའི་བསམ་ཚུལ་དེར་ཨོ་སི་ཊོ་ལི་ཡའི་ལྗང་ཁུ་ཚོགས་པའི་དབུ་ཁྲིད་སྦོབ་སྦོ་རོན་མཆོག་ནས་འབོད་སྐུལ་གནང་རྒྱུ་ཡིན་སྐོར་གསུངས་གནང་འདུག ༸གོང་ས་མཆོག་ཕྱི་ཟླ་ ༡༢ ཚེས་ ༡ ནས་ ༣ བར་ཨོ་སི་ཊོ་ལི་ཡའི་ནང་གསུང་ཆོས་བཀའ་སློབ་གནང་གཏན་འཁེལ་ཡོད། གྲོས་ཚོགས་གོང་མའི་འཐུས་མི་ལྕམ་སྐུ་ས་ར་ཧན་སན་ཡང་དང་། རང་དབང་ཚོགས་པའིི་གྲོས་ཚོགས་གོང་མའི་འཐུས་མི་ ནིཀ་ཟེ་ནོ་ཕོན་ནས་རེས་གཟའ་ཕུར་བུའི་ཉིན་༸གོང་ས་མཆོག་ཨོ་སི་ཊོ་ལི་ཡའི་གྲོས་ཚོགས་གོང་མའི་སྲིད་འཛིན་གྱི་ཁྱམས་རའི་གྲལ་གནས་སུུ་གདན་ཞུ་དགོས་པའི་གྲོས་ཚོགས་གོང་མའི་ནང་གྲོས་འཆར་བཏོན་ཡོད། འོན་ཀྱང་གཞུང་འཛིན་ཚོགས་པ་དང་ཕྱོགས་འགལ་ཚོགས་པ་གཉིས་ནས་དེར་རྒྱབ་སྐྱོར་གནང་མེད། གནས་དོན་དེར་རྒྱབ་སྐྱོར་མེད་པའི་ཐག་གཅོད་བྱུང་བ་དེ་ནི་རྒྱ་གཞུང་ལ་འཇིགས་ནས་རེད་ཅེས་ལྗང་ཁུ་ཚོགས་པ་ནས་སྐྱོན་བརྗོད་གནང་ཡོད།
ལྗང་ཁུ་ཚོགས་པའིི་དབུ་ཁྲིད་སྦོབ་སྦོ་རོན་ནས་གསུང་གསལ་༸གོང་ས་མཆོག་བཙན་བྱོལ་བོད་མིའི་ཆབ་སྲིད་དབུ་ཁྲིད་གཅིག་ཡིན་པའི་ཆ་ནས་གྲོས་ཚོགས་གོང་མའི་ནང་གྲགས་ཅན་མི་སྣ་གཟིགས་སྐོར་བའི་སྲིད་འཛིན་གྱི་ཁྱམས་རའི་གྲལ་གནས་སུ་བཞུགས་རྒྱུ་དེ་ནི་འོས་འཚམས་ཤིག་ཡིན་པ་ནུབ་ཨོ་སི་ཊོ་ལི་ཡའི་གསར་ཤོག་ནང་འཁོད་ཡོད།
གྲོས་ཚོགས་གོང་མའི་འཐུས་མི་སྐུ་ཞབས་སྦོབ་སྦོ་རོན་ནས་གྲོས་ཚོགས་ནང་བརྗོད་གསལ། ང་ཚོས་སྐོར་ནས་ཇི་ཙམ་བཤད་ཀྱང་དོན་དངོས་པེ་ཅིང་ལ་སྐྲག་པ་དེ་དངོས་གསལ་དོད་པོ་རེད། འདི་ལོའི་ཕྱི་ཟླ་བདུན་པའི་ནང་རྡ་སར་༸གོང་ས་མཆོག་དང་མཇལ་ཕྲད་གནང་མཁན་གྲོས་ཚོགས་འཐུས་མི་ལྕམ་སྐུ་ས་ར་ཧན་སན་ཡང་ནས། དེ་སྔོན་༸གོང་ས་མཆོག་ནས་ཨ་རིའི་གྲོས་ཚོགས་དང་དེ་བཞིན་ཡུ་རོབ་གྲོས་ཚོགས་སོགས་སུ་གསུང་བཤད་གནང་ཡོད་པ་ཡིན་དུས་ད་རེས་ང་ཚོའི་གྲོས་ཚོགས་ནས་གོ་སྐབས་རྩ་ཆེན་ཞིག་ཤོར་བ་རེད་ཅེས་གསུངས་ཡོད་པ་རེད།
ཕྱི་ཟླ་ ༧ ནང་ངལ་རྩོལ་ཚོགས་པའི་གྲོས་ཚོགས་འཐུས་མི་མ་ཡི་ཁལ་ཌེན་བིས་དབུ་ཁྲིད་པའི་ཨོ་སི་ཊོ་ལི་ཡའི་གྲོས་ཚོགས་ཀྱི་སྐུ་ཚབ་རྡ་ས་བོད་མིའི་གནས་སྡོད་སར་ཕེབས་པ་རེད། ཁོང་རྣམ་པས་བརྗོད་གསལ། ང་ཚོས་༸གོང་ས་མཆོག་ཨོ་སི་ཊོ་ལི་ཡའི་གྲོས་ཚོགས་ནང་གདན་འདྲེན་ཞུ་རྒྱུ་ཡིན་ཞེས་གསུངས་པ་བཅས་ཀྱི་གནས་བསྡུས་སུ།
