༢༠༠༩ ཕྱི་ཟླ་ ༨ ཚེས་ ༢༥ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༨ ཚེས་ ༢༢ ཉིན་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ལ་དྭགས་ཀྱི་རྒྱལ་ས་སླེ་རུ་ཉིན་གསུམ་རིང་གི་ཆོས་འབྲེལ་དབུ་འཛུགས་མཛད་ཡོད་པ་དེར་ལ་དྭགས་ཀྱི་ས་ཕྱོགས་གང་ས་ནས་དད་ལྡན་ཆོས་ཞུ་བ་སྟོང་ཕྲག་མང་པོ་དང་། དེ་བཞིན་ཕྱི་རྒྱལ་བ། རྒྱ་རིགས། རྒྱ་གར་བ་བཅས་ཁྱོན་བསྡོམས་དད་ལྡན་ཆོས་ཞུ་བ་མི་གྲངས་ ༢༥༠༠༠ ཙམ་ཕེབས་ཡོད།
དེ་ཡང་༸གོང་ས་མཆོག་ནས་གསུང་ཆོས་ཀྱི་ཐོག་མར་༸རྒྱལ་མཆོག་ལྔ་པ་ཆེན་པོས་མཛད་པའི་ལམ་རིམ་འཇམ་དཔལ་ཞལ་ལུང་དང་། མི་འཁྲུགས་པའི་དབང་བཅས་བཀའ་དྲིན་སྕལ་བ་ལྟར། 
ཉིན་དང་པོའི་གསུང་ཆོས་སུ་ལམ་རིམ་འཇམ་དཔལ་ཞལ་ལུང་དབུ་འཛུགས་དང་སྦྲགས་ཆོས་འབྲེལ་སྐབས་ཐེ་ཝན་དུ་བྱུང་བའི་ཆུ་ལོག་དོན་རྐྱེན་འོག་རྐྱེན་འདས་སུ་གྱུར་བ་རྣམས་དང་། དེ་བཞིན་ནད་མནར། རྒྱུ་ནོར་གོད་ཆག་བྱུང་བ་བཅས་ལ་མང་ཚོགས་དང་ལྷན་དུ་ཐུགས་སྨོན་གཞི་རྒྱ་ཆེན་པོ་གནང་ཡོད། ༸གོང་ས་མཆོག་ནས་ཐོག་མར་ནང་པ་ཚོས་རྒྱུན་དུ་ནས་འདོན་བཞིན་པའི་སངས་རྒྱས་ཆོས་ཚོགས་མའི་གོ་དོན་སྙིང་བསྡུས་ཤིིག་ངོ་སྤྲོད་སྩལ་དོན།
སངས་རྒྱས་ཆོས་ཚོགས་མ་འདོན་རྒྱུ་འདི་ང་རང་ཚོས་བྱ་བ་གང་འདྲ་ཞིག་བྱས་པ་ཡིན་ཡང་། བྱ་བ་དེ་ཕན་པའི་རང་བཞིན་ཅན་ཞིག་ལ་འགྲོ་དང་། བར་མ་བཏང་སྙོམས་ཞིག་ལ་འགྲོ། གནོད་པའི་རང་བཞིན་ཅན་ཞིག་ལ་འགྲོ་དེ་རྩ་བ་ཀུན་སློང་ལ་ཐུག་ཡོད། ཀུན་སློང་བཟང་པོས་ཕན་སེམས་ཡག་པོ་ཞིག་སྐྱེད་པ་ཡིན་ན་དེའི་ཐོག་ནས་གཞན་ལ་ཤ་ཚ་བྱས། སེམས་ཁུར་བླང་སྟེ། ཚིག་རྩབ་བྱས་པ་ཡིན་ན་འདྲ། ལུས་ཀྱི་རྣམ་འགྱུར་རྩབ་པོ་ཞིག་བསྟན་པ་ཡིན་ན་འདྲ། ཀུན་སློང་གི་རྩ་བ་ཕན་པའི་བསམ་པ་ཞིག་སྐྱེས་པ་ཡིན་དུས་དགེ་བའི་བྱ་བ་ཞིག་ཡིན། དོན་གྱི་ཆ་ནས་འཚེ་བ་མེད་པའི་སྤྱོད་པ་ཆགས་ཀྱི་ཡོད། ཡང་གནོད་པའི་བསམ་པའི་ཐོག་ནས་ཕ་རོལ་པོར་མགོ་སྐོར་གཏོང་རྒྱུ་དང་། ཕ་རོལ་པོ་ནས་རང་ཉིད་ལ་ཁེ་ཞིག་ཐོབ་རྒྱུར་དམིགས་ནས་འདྲ་ཆགས་པོ་བྱས་ཏེ། སྐད་ཆ་སྙན་པོ་བཤད། ལག་རྟགས་འདྲ་སྤྲད། བསྟོད་བསྔགས་འདྲ་བཤད་བྱས་པ་ཡིན་ན། ལུས་ངག་གི་རྣམ་འགྱུར་འཇམ་པོ་ཞིག་རེད། ཡིན་ཡང་ཀུན་སློང་གཞན་མགོ་སྐོར་གཏོང་རྒྱུ་དེ་འདྲ་ཡོད་པ་ཡིན་དུས། དེའི་དབང་གིས་བྱུང་བས་ལུས་ངག་གི་སྤྱོད་པ་དེ་དག་སྡིག་པའི་ལས་ཡིན་པ་རེད། གང་ལྟར་འཚེ་བ་ཡོད་མེད་ཀྱི་སྐད་ཆ་བཤད་པ་ཡིན་ན།
དེ་འདྲའི་སྤྱོད་པ་དེ་འཚེ་བའི་རང་བཞིན་ཅན་ཞིག་ཡིན་པ་རེེད། རྣམ་འགྱུར་བཟང་པོ་ཡོད་པ་རེད། དེ་འདྲ་ཡིན་ནའང་རྩ་བ་གནོད་པའི་བསམ་པ་ཀུན་ནས་བླང་ཡོད་དུས་དེ་འཚེ་བའི་རང་བཞིན་དང་སྡིག་པ་ཆགས་འགྲོ་གི་ཡོད། ཡང་ཕན་གནོད་ཀྱི་བསམ་པ་གང་ཡང་མེད་པ་བྱས་ཏེ་ལུང་མ་བསྟན་ངང་ནས་ཀུན་ལ་དགའ་བའི་རྣམ་འགྱུར་བསྟན་པ་དེ་དག་ནི་ལུང་མ་བསྟན་རང་ཡིན་པ་རེད། ཅེས་བཀའ་སློབ་ཟབ་མོ་སྩལ་རྗེས་༸རྒྱལ་མཆོག་ལྔ་པ་ཆེན་པོས་མཛད་པའི་ལམ་རིམ་འཇམ་དཔལ་ཞལ་ལུང་གི་སྔོན་མའི་འཕྲོས་སྐྱོང་ནས་ཆོས་འབྲེལ་དངོས་གཞིའི་དབུ་འཛུགས་བསྐྱངས་ཡོད། ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༦༦ ལོར་ལ་དྭགས་སུ་ཆིབས་སྒྱུར་བསྐྱངས་ཐེངས་དང་པོ་ཡིན་པ་དང་། ཐེངས་འདིའི་ཆིབས་སྒྱུར་བསྐྱངས་ཐེངས་བཅུ་དྲུག་པ་དེ་ཆགས་ཡོད།
ཐེངས་འདིར་༸གོང་ས་མཆོག་ནས་ཟངས་དཀར་ཁུལ་གྱི་ཆོས་འབྲེལ་བསྐྱངས་གྲུབ་རྗེས་སླེ་རྒྱལ་སར་༸ཞབས་སོར་འཁོད་པ་དང་སྟབས་བསྟུན་ཏེ་སླེ་ཁུལ་གྱི་ཁ་ཆེའི་མང་ཚོགས་ནས་གདན་ཞུ་གསོལ་འདེབས་ཞུས་པར་ལྟར་ཁུལ་དེའི་ཁ་ཆེའི་ལྷ་ཁང་དུ་ཆིབས་སྒྱུར་བསྐྱངས་པ་མ་ཟད། ཉིན་གུང་གི་ལྗགས་སྨིན་མཛད་ཡོད། ཁ་ཉིན་དེར་༸གོང་ས་མཆོག་ནས་སླེ་གི་ལྕོག་ལམ་སར་ཁུལ་དུ་ཡོད་པའི་མཚན་ཉིད་སློབ་གྲྭ་ལོ་ལྔ་བཅུ་འཁོར་བའི་དུས་དྲན་གྱི་སྐུ་མགྲོན་གཙོ་བོར་གདན་ཞུའི་གསོལ་འདེབས་ཞུས་པ་ལྟར་ཆིབས་སྒྱུར་བཀའ་དྲིན་བསྐྱངས་ཡོད་པ་བཅས་ཀྱི་གནས་བསྡུས་སུ།།
