༢༠༠༩ ཕྱི་ཟླ་ ༨ ཚེས་ ༢༧ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་བ་ ༨ ཚེས་ ༢༥ ཉིན་སྤེལ་བའི་གནས་ཚུལ་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་ཚན་རིག་གི་སེམས་དང་སྲོག་ཅེས་པའི་ཚོགས་འདུ་ཐེངས་བཅུ་དགུ་པ་དེ་ཕྱི་ལོ་ ༢༠༠༩ ཟླ་བ་ ༡༠ པའི་ཚེས་ ༨ ནས་ ༩ བར་ཨ་རིའི་རྒྱལ་ས་ཝ་་ཤིང་ཊོན་དུ་ཚོགས་གཏན་འཁེལ་བ་དེར་ཆིབས་སྒྱུར་བསྐྱང་གཏན་འཁེལ་བ་གོ་སྒྲིག་ཚོགས་ཆུང་ནས་བརྗོད་གནང་འདུག
ཚོགས་འདུའི་རྩ་བའི་དམིགས་ཡུལ་ནི་དེང་དུས་ཤེས་ཡོན་གྱི་སྒྲོམ་གཞིའི་སྟེང་སེམས་ཀྱི་ཚོར་རྐྱེན་གྱི་རྣམ་གཞག་དང་རྣམ་དཔྱོད་རིག་པ། དེ་བཞིན་སྤྱི་ཚོགས་ཀྱི་འཚོ་བ་དང་འབྲེལ་བའི་ཤེས་ཡོན་གྱི་སྐོར་རྣམས་ཟླ་སྒྲིལ་ཐུབ་པ་བྱུང་ཚེ་དེའི་རིན་ཐང་འཇལ་རྒྱུ་དང་ལྷན་གནས་དོན་དེ་དག་གི་ཐད་ཉམས་ཞིབ་བྱ་རྒྱུ་དེ་གལ་གནད་ཆེན་པོ་ཡིན་པ་གསལ་སྟོན་ཡོང་བ་བྱེད་རྒྱུ་བཅས་ཡིན་འདུག
ཤེས་ཡོན་སློབ་སྟོན་པ་གཙོ་བོ་རྣམས་དང་། ཚན་རིག་པ། དེ་བཞིན་ཆབ་སྲིད་གཙོ་སྐྱོང་བ་རྣམས་ནས་དྲན་པ་དང་ཤེས་བཞིན་གཞིར་བཅོལ་བའི་སློབ་ཚན་དང་ལས་འཆར་དེ་དག ཤེས་ཡོན་སྤྲོད་སའི་ཁོར་ཡུག་ནང་དང་། ལྷག་པར་དྲག་གནོན་དང་དབུལ་ཕོངས། དེ་བཞིན་བཟའ་ཟླ་ཁ་བྲལ་སོགས་ཀྱི་ཁོར་ཡུག་གནས་སྟངས་འོག་འཚར་ལོངས་བྱུང་བའི་སློབ་མ་རྣམས་ལ་སློབ་ཚན་དེའི་ནུས་པ་ཇི་ཙམ་ཐོན་མིན་སྐོར་གྲོས་མོལ་གནང་རྒྱུ།
སྤྱི་ཚོགས་ནང་ལམ་ལྷོང་ཡོང་བའི་ནུས་རྩལ་དང་ཆ་རྐྱེན་ཁག་གཅིིག་སློབ་ཚན་དང་དངོས་སུ་འབྲེལ་བ་མེད་ནའང་དེ་མཚུངས་ཀྱི་གལ་གནད་ཆེ་བས་ཆ་རྐྱེན་དེ་དག་སློབ་གྲྭའི་ལམ་ལུགས་ཐོག་ནས་ཡར་རྒྱས་གཏོང་རྒྱུ་དེ་ཐབས་ལམ་ལེགས་ཤོས་ཡིན་པ་ཉམས་ཞིབ་ཐོག་ནས་གསལ་སྟོན་བྱུང་ཡོད། རྒྱལ་ཁབ་ཁྱོན་ཡོངས་ནང་རང་གཞན་གཉིས་ཀའི་ཐོག་དྲན་ཤེས་དགོས་ཚུལ་གྱི་སློབ་ཁྲིད་ནང་བཞུགས་པའི་སློབ་མ་རྣམས་ཀྱི་སློབ་སྦྱོང་གི་གྲུབ་འབྲས་དང་། ལས་ཀའི་གོམས་གཤིས། རང་མཐོང་སོགས་ཕྱོགས་གང་ཅིའིི་ཐད་ནས་ཡར་རྒྱས་ཧ་ལས་པ་བྱུང་ཡོད།
སེམས་དང་སྲོག་གི་གཙོ་སྐྱོང་བ་སྐུ་ཞབས་ཨེ་ཌམ་ཨེན་སྒལ་ནས་གསུང་གསལ། ང་ཚོས་དྲན་ཤེས་རྨང་གཞིར་གྱུར་པའི་སྤྱི་ཚོགས་ཀྱི་ཤེས་བྱ་དེ་བཞིན་ཚོར་རྐྱེན་དང་འབྲེལ་བའི་སློབ་ཁྲིད་ཐབས་ལམ་དེར་ཉམས་ཞིབ་རྒྱ་ཁྱབ་ཏུ་ཡོང་བ་དང་དེ་བཞིན་བཅོས་བསྒྱུར་གྱིས་དེའི་ཐོག་ནས་སློབ་ལོ་ཟིན་པའི་བྱིས་པ་དང་ན་གཞོན་རྣམས་ཀྱི་དོ་སྣང་། རང་འགུལ་བློ་སྟོབས། རང་མཐོང་། རང་ཐག་གཙང་གཅོད་ཐུབ་པའི་ནུས་རྩལ་སོགས་ཡར་རྒྱས་ཡོང་བའི་རེ་བ་བྱེད་བཞིན་ཡོད་ཅེས་གསུངས་ཡོད།
སེམས་དང་སྲོག་གི་ལས་འཆར་ངེས་སྟོན་པ་ལུ་ར་བུན་ནས ང་ཚོའི་དམིགས་ཡུལ་དེ་སློབ་ཁྲིད་ཐབས་ལམ་བྱེ་བྲག་པ་ཞིག་སྤེལ་རྒྱུ་དེ་འདྲ་མིན། འོན་ཀྱང་ལས་གཞི་འདིའི་ནང་བགྲོ་གླེང་གང་མང་ཡོང་ཐུབ་པ་དང་མཁས་དབང་ཚོའི་བསམ་བློ་གསར་པ་སྤེལ་རྒྱུ་དེ་ཡིན།
མཐའ་དོན་ང་ཚོས་སྒོམ་གྱི་ཐབས་ལམ་འདིའི་ཐོག་ནས་སློབ་ཁྲིད་དེས་སློབ་མ་དང་། དགེ་རྒན་དེ་བཞིན་ཕ་མ་སོ་སོར་ཕན་གནོད་ཀྱི་རིན་ཐང་ཇི་ཙམ་ཡོད་མེད་ཤེས་འདོད་ཡོད། ང་ཚོས་༸གོང་ས་མཆོག་དང་བཀའ་མོལ་ཞུས་པ་བརྒྱུད་ནས་སློབ་མ་རྣམས་ཀྱི་དགོས་མཁོ་ཇི་ཡིན་དང་། ང་ཚོས་ལས་གཞི་འདིའི་ནང་ཉམས་ཞིབ་སྤེལ་བ་དེའི་ཐོག་ནས་ང་ཚོ་སོ་སོའི་ངོས་ནས་གང་ཤེས་ཐུབ་ཡོད་མེད་ཤེས་པ་བྱེད་རྒྱུ་དེ་ཡིན་ཞེས་གསུངས་ཡོད།
ཤེས་ཡོན་སློབ་གསོདང་། ཀླད་པའི་ཚན་རིག སེམས་ཁམས་རིག་པ། ལྟ་གྲུབ་བཅས་ཀྱི་ཚོགས་བཅར་བ་རྣམས་ནས་ཚོགས་འདུའི་ཚོགས་དུས་བཞིའི་ནང་མཉམ་ཞུགས་གནང་རྒྱུ་དང་། ཚོགས་དུས་བཞི་པོ་སོ་སོའི་ནང་༸གོང་ས་མཆོག་ནས་རྐང་འཛིན་ཐུགས་འགན་བཞེས་གནང་རྒྱུ། ཚོགས་དུས་བཞིའི་ནང་བརྗོད་གཞི་ སེམས་རྩེ་གཅིག་ཏུ་སྒྲིམ་རྒྱུ་དང་། སེམས་ཚོར་སྟངས་འཛིན་དང་སྦྱང་ཤེས། བྱམས་པ་དང་མཉམ་བརྗེའི་སེམས། འཛམ་གླིང་སྤྱི་འབངས་ཀྱི་མིག་རྣམ་སོགས་ཡིན།
སེམས་དང་སྲོག་གི་གྲོས་མོལ་ཐེངས་༡༨ པ་དེ་འདི་ལོའི་ཕྱི་ཟླ་ ༤ པའི་ནང་རྡ་སར་ཚོགས་པ་དང་། བརྗོད་གཞི་གཙོ་བོ་བདེན་པའི་རང་བཞིན་ཤེས་རྟོགས་དང་འགྲོ་བ་མིའི་བདེ་བ་སྤེལ་རྒྱུ་ཡིན་པ་བཅས་ཀྱི་གནས་བསྡུས་སུ།
