༢༠༠༩ ཕྱི་ཟླ་ ༨ ཚེས་ ༡༢ རེས་གཟའ་ལྷག་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༠༩ ཟླ་ ༤ ཚེས་ ༥ ཉིན་དཀར་མཛེས་ས་ཁུལ་འབྲིང་རིམ་མི་དམངས་ཁྲིམས་ཁང་ནས་སྔ་ལོའི་ཟླ་ ༦ ཚེས་ ༢༡ ཉིན་དཀར་མཛེས་རྫོང་ཐོག་ཏུ་ཧ་ཅང་དམ་བསྒྲགས་ཆེ་བའི་སྐབས་སུ་ཞི་བའི་སྐད་འབོད་བྱེད་མཁན་རང་ལོ་ ༣༨ ལ་སོན་པའི་སངས་རྒྱས་བཀྲིས་སམ་དགྲ་འགུ་ལ་ལོ་ ༥ དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག
ཁོང་ནས་སྔ་ལོའི་ཟླ་ ༦ ཚེས་ ༢༡ ཉིན་དཀར་མཛེས་རྫོང་ཐོག་ཏུ་དམ་བསྒྲགས་ཤིན་ཏུ་ཆེན་པོ་ཡོད་མིན་ལ་མ་ལྟོས་པར་གདོང་གི་མཁུར་ཚོས་སྟེང་བོད་ཀྱི་རྒྱལ་དར་རེ་བྲིས་པ་དང་། མགོ་ལ་རས་དཀར་པོའི་སྟེང་བོད་རང་བཙན་ཡིན་ཞེས་བྲིས་ཏེ་ཁྲོམ་གཞུང་དུ་༸གོང་ས་མཆོག་བོད་དུ་གདན་འདྲེན་ཞུ་དགོས། བོད་ནང་ཨོ་ལེམ་པིཀ་དཔལ་འབར་སྐོར་བསྐྱོད་བྱེད་མི་ཆོག་པ་མ་ཟད་བོད་ཀྱི་བདག་པོ་བོད་མི་ཡིན་སོགས་དོན་ཚན་ ༩ ཅན་གྱི་ཡིག་ཆ་གཏོར་འགྲེམས་བྱས་པ་སོགས་ལ་བརྟེན་སྤྱི་བདེ་ཉེན་རྟོག་པས་ཉིན་དེར་འཛིན་བཟུང་བྱས་ཡོད་འདུག སྐབས་དེ་དུས་ཨོ་ལེམ་པིག་རྩེད་འགྲན་དཔལ་འབར་ཡང་ལྷ་སར་འཁྱེར་ཡོང་བའི་དུས་ཚོད་དང་སྟབས་འཁེལ་ཡོད་སྟབས་དཀར་མཛེས་རྫོང་ཐོག་ཏུ་ཧ་ཅང་དམ་བསྒྲགས་ཆེན་པོ་ཡོད་པའི་དུས་ཚོད་ཅིག་ཡིན། ཉེ་སྔོན་ཁོང་ལ་དུས་བཀག་བཙོན་འཇུག་གི་ཁྲིམས་ཐག་གཅོད་སྐབས་ཁོང་དང་འདྲ་བར་ཆབ་སྲིད་གནད་དོན་ཐོག་ནས་འཛིན་བཟུང་བྱས་པའི་མི་གྲངས་ ༡༥ མཉམ་རླངས་འཁོར་ནང་བསྡམས་བཀྱིགས་ཀྱིས་དཀར་མཛེས་ཁུལ་གྱི་ཁྲོམ་སྐོར་དུ་འཁྲིད་དེ་ཉེན་རྟོག་པས་རྒྱང་བསྒྲགས་ཐོག་ནས་གཞུང་ལ་ངོ་ལོག་བྱས་ན་འགྲོ་ལམ་འདི་ལས་ཡོད་མ་རེད ཅེས་སོགས་བརྗོད་དེ་མི་དམངས་ལ་སྡིགས་ར་བསྐུལ་བའི་གནས་ཚུལ་ཡང་ཐོན་འདུག
