༢༠༠༩ ཕྱི་ཟླ་ ༨ ཚེས་ ༡༨ རེས་མིག་དམར།
༄༅། །རང་གཞུང་ནང་སྲིད་ལས་ཁུངས་ཀྱི་དྲུང་ཆེ་ལས་ཚབ་དངོས་གྲུབ་རྡོ་རྗེ་ལགས་ཀྱིས་འདི་གར་ངོ་སྤྲོད་གནང་གསལ། ཕྱི་ལོ་ ༢༠༠༩ ཟླ་ ༨ ཚེས་ ༡ ནས་ ༣ བར་མཉམ་འབྲེལ་ཁག་བཅོ་ལྔའི་ཚོང་འདུ་སྐབས་དགུ་པ་དེར་མཉམ་འབྲེལ་བཅོ་ལྔའི་ཚོགས་གཙོས་དབུས་པའི་གནད་ཡོད་མི་སྣ་ ༥༢ ཙམ་མཉམ་ཞུགས་ཐོག་ཧོན་སུར་རབ་རྒྱས་གླིང་གཞིས་ཆགས་སུ་ཚུགས་པ་མ་ཟད་ཐུན་མོང་གི་གྲོས་ཆོད་ཁག་དྲུག་ཀྱང་བཞག་ཡོད་པ་རེད། དེ་ཡང་མཉམ་འབྲེལ་ཁག་གི་འཛིན་སྐྱོང་སྤྱི་ཡོངས་ནས་ལྟ་སྐབས་ལོ་རེ་མ་བསྡད་པར་་གནས་སྟངས་བཟང་དུ་འགྲོ་གི་འདུག དེའི་རྒྱུ་རྐྱེན་ནི་འགན་འཛིན་ལྷན་ཚོགས་ནས་ལས་བྱེད་དང་མི་མང་རྣམས་ལ་སྦྱོང་བརྡར་རིམ་པ་ལྟར་སྤྲད་རྐྱེན་མི་མང་ངོས་ནས་ཀྱང་དེ་སྔ་དང་མི་འདྲ་བར་མཉམ་ལས་ཐད་ལ་དོ་སྣང་ཆེན་པོ་བྱེད་ཀྱི་འདུག་པར་སོང་ཡིན་ངེས་སྙམ། འདི་ལོ་མཉམ་འབྲེལ་ཁག་བཅོ་ལྔའི་ནང་ནས་མེའོ་ཆོས་འཕེལ་གླིང་མཉམ་འབྲེལ་སྡེ་ཚན་དང་། རྡ་ས་མཉམ་འབྲེལ་སྡེ་ཚན་གཉིས་ལ་ཆ་ཚང་གཙང་ཁེ་བྱུང་ཡོད་པར་ལེགས་གསོའི་བསྔགས་བརྗོད་ཞུ་རྒྱུ་དང་། ས་གནས་འགན་འཛིན་སོགས་ནས་འགན་རྐང་ལེན་བྱས་པར་བརྟེན་སྔོན་མ་བུ་ལོན་མང་པོ་ཡོད་པ་དེ་དག་ཕྱིས་སུ་ཉུང་ཉུང་ཆགས་ཡོད་པ་དེ་ནི་ཚགས་ཚུད་དུ་ཕྱིན་པའི་རྣམ་པ་གསལ་པོ་ཐོན་ཡོད། གཞིས་ཆགས་ཁག་ལ་སྐྱེ་ལྡན་སོ་ནམ་ལས་གཞི་མང་པོ་ཡོད་དུས་མཉམ་འབྲེལ་སོ་སོའི་ངོས་ནས་སྐྱེ་ལྡན་སོ་ནམ་ལས་གཞིར་ཕྱར་གྲུ་མཉམ་འདེགས་ག་རེ་བྱེད་དགོས་ཀྱི་འདུག སྐྱེ་ལྡན་ལུད་སྦྱོར་ཐད་ནས་རྫས་ལུད་དང་། འབུ་སྨན། རྩ་སྨན་རིགས་བཟོས་ཏེ་ཡོང་འབབ་བཟོ་རྒྱུ་དང་སྟོན་འབྲས་ལེགས་པོ་ཐོན་པ་དག་མཉམ་འབྲེལ་སོ་སོའི་ངོས་ནས་ཕྱི་ཚོང་བྱ་ཐབས་སྐོར་སོགས་ལ་ཞིབ་གླེང་བྱུང་ཡོད་སྐོར་དང་འདི་ལོ་ནས་བཟུང་མཉམ་འབྲེལ་ཡོངས་རྫོགས་ཀྱི་གླ་ཆ་དེ་སྤྱི་མཐུནམཉམ་འབྲེལ་གྱིས་གནང་རྒྱུ་བྱས་ཡོད་པ་དང། མཉམ་འབྲེལ་ལས་བྱེད་ཞབས་ལོ་ ༢༠ འཁོར་རིགས་ལ་མ་འོངས་ལས་བྱེད་གསར་བཞུགས་ཐོག་སེམས་ཤུགས་སྤར་རྒྱུའི་ཆ་རྐྱེན་དུ་སྤྱི་ཚོགས་ཞབས་ཞུའི་གཟེངས་བསྟོད་བྱ་དགའི་ཕྱག་འཁྱེར་གནང་རྒྱུའི་ལམ་སྲོལ་ཡང་གཏོད་རྒྱུ་དང་མཉམ་འབྲེལ་བཅོ་ལྔའི་འཛིན་སྐྱོང་ཚོགས་ཆེན་ཐེངས་ ༡༠ པ་དེ་བཞིན་སྦེལ་ཀོབ་བདེ་སྐྱིད་སླར་གསོའི་གཞིས་ཆགས་སུ་ཕྱི་ལོ་ ༢༠༡༠ ཟླ་ ༨ ཚེས་ ༡ ནས་ ༣ བར་ཚོགས་གཏན་འཁེལ་བ་བཅས་འགྲེལ་བརྗོད་མདོར་བསྡུས་ཤིག་གནང་བ་བཅས་ཀྱི་གནས་བསྡུས་སུ།
