༢༠༠༩ ཕྱི་ཟླ་ ༧ ཚེས་ ༢ རེས་གཟའ་ཕུར་བུ།

༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ༢༠༠༨ ཟླ་ ༣ ཚེས་ ༡༤།༡༥ ཉིན་ལྷ་ས་གྲོང་ཁྱེར་ཁོངས་འཕན་པོ་ལྷུན་གྲུབ་རྫོང་ཁོངས་སུ་ཞི་བའི་ངོ་རྒོལ་ཤུགས་ཆེ་བྱེད་སྐབས་དྲག་ཆས་ཉེན་རྟོག་པས་ཉེས་རྡུང་ཚབས་ཆེ་བཏང་སྟེ་རྨས་སྐྱོན་ཕོག་པ་ཉི་མ་བསྟན་འཛིན། ལོ་སྔོན་མའི་ནང་འཕན་པོ་ལྷུན་གྲུབ་རྫོང་འབྲེལ་ཡོད་སྤྱི་བདེ་མི་སྣས་རྒྱ་སྒོར་ལྔ་སྟོང་ ༥༠༠༠ གི་དངུལ་ཆད་བཅད་དེ་གནས་སྐབས་གློད་བཀྲོལ་བཏང་ཡོད་ཀྱང་། ཁྱིམ་ཚང་ནས་ཁ་བྲལ་ཏེ་ས་གནས་གཞན་དུ་འགྲོ་བསྐྱོད་མི་ཆོག་པའི་དམ་བསྒྲགས་བྱེད་བཞིན་ཡོད། ཁོང་གི་ནད་གཞི་དྲག་སྐྱེད་ཡག་པོ་མ་བྱུང་བར་བརྟེན། སྔ་རྗེས་རྫོང་འབྲེལ་ཡོད་ལས་ཁུངས་སུ་སྨན་ཁང་ཆེ་ཙམ་ཞིག་ལ་སྨན་བཅོས་ཐབས་སླད་ལྷ་སར་བསྐྱོད་ཆོག་པའི་ཆོག་མཆན་ཞུས་ཀྱང་སྤྲད་མེད་སྟབས་ ༢༠༠༩  ཟླ་  ༦  པའི་ཚེས་ཤར་ནས་ཁ་ནས་ཁྲག་སྐྱུག་པ་དང་། དེ་བཞིན་གཟུགས་པོ་རང་འཚོ་ཟིན་མ་ཐུབ་པའི་ཡ་ང་བའི་གནས་སྟངས་འོག་མལ་སར་ལུས་ཏེ་སྲོག་ཉེན་ཆེ་བའི་གནས་ཚུལ་ཐོན་འདུག