༢༠༠༩ ཕྱི་ཟླ་ ༧ ཚེས་ ༢༠ རེས་གཟའ་ཟླ་བ།
༄༅། །༢༠༠༩ ཕྱི་ཟླ་ ༧ ཚེས་ ༡༡ ཉིན་ཐེ་ཝན་བོད་དོན་རྒྱབ་སྐྱོར་ཚོགས་པ་མང་པོ་ཞིག་གིས་བོད་དོན་ཆེད་རོལ་དབྱངས་ཞིག་ཚུགས་ཡོད་པ་རེད། དེ་ཡང་བོད་མི་རྣམས་བཙན་བྱོལ་དུ་གྱར་ནས་མི་ལོ་ལྔ་བཅུ་འཁོར་བའི་དུས་དྲན་གྱི་ཆ་ཤས་ཞིག་ཡིན་པ་རེད། རོལ་དབྱངས་འདུ་འཛོམས་དེའི་ཐོག་མང་ཚོགས་ཉིས་ཁྲི་བརྒལ་བ་རྣམས་ནས་ལག་ཏུ་བོད་ཀྱི་རྒྱལ་དར་འཁྱེར་ཏེ་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་པར་ཤོག བོད་མིར་རང་དབང་དགོས། བོད་རང་བཙན་གཙང་མ་རེད། ཅེས་པའི་སྐད་འབོད་ཤུགས་ཆེ་གནང་འདུག ད་ཐེངས་གྱི་འདུ་འཛོམས་དེའི་ཐོག་ཐེ་ཝན་ནང་གི་རོལ་དབྱངས་མཁས་ཅན་བཅུ་ཡང་མཉམ་ཞུགས་གནང་ཡོད་པ་རེད། ཐེངས་འདིའི་རོལ་དབྱངས་འདི་ནི་ཐེ་ཝན་རོལ་དབྱངས་ལྷན་ཚོགས་དང་ཐེ་ཝན་སྤྱི་འབངས་ཀྱི་སྒྲིག་འཛུགས་ཁག་དེ་བཞིན་ཐེ་ཝན་བོད་གྲོགས་ཚོགས་པ་བཅས་ནས་གོ་སྒྲིག་ཞུས་ཡོད་པ་རེད། རོལ་དབྱངས་ཀྱི་འདུ་འཛོམས་དེའི་ཐོག་རང་དབང་ཅན་གྱི་རོལ་དབྱངས་ཚོགས་པ་བཅུ་ཙམ་གྱི་མཉམ་ཞུགས་གནང་འདུག ཁོང་རྣམས་ཀྱི་རེས་གཟའ་སྤེན་པའི་ཉིན་རྒྱབ་ཆུ་ཚོད་ ༢ ནས་མཚན་མོའི་ཆུ་ཚོད་ ༡༠ བར་གླུ་གཞས་འདྲ་མིན་སྣ་ཚོགས་ཀྱི་རོལ་དབྱངས་འདུ་འཛོམས་རྒྱ་ཆེ་ཞིག་ཚུགས་ཡོད། སྔོན་ལོ་རོལ་དབྱངས་འདུ་འཛོམས་དེའི་གོ་སྒྲིག་པ་གཙོ་བོ་ཁག་གཅིག་ནས་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུ་སྐབས་རོལ་དབྱངས་འདུ་འཛོམས་དེའི་ཆེད་སྩལ་གནང་བའི་བརྙན་འཕྲིན་ཞིག་ཀྱང་ཐེངས་དེར་བསྟན་ཡོད་པ་རེད།
བརྙན་འཕྲིན་དེའི་ནང་མགོན་པོ་གང་ཉིད་ཀྱི་བཀའ་སློབ་ཕེབས་པའི་ནང་འཁོད་དོན། ” ཐེ་ཝན་གྱི་ཁྱད་དུ་འཕགས་པའི་སྙན་གྲགས་ཅན་གྱི་རོལ་དབྱངས་འཁྲབ་སྟོན་པ་རྣམས་ཐུག་པས་ངོས་རང་ཧ་ཅང་དགའ་པོ་བྱུང་ཁྱེད་ཚོས་ཤེས་གསལ་ལྟར་ཕྱི་ཟླ་ ༣ ཚེས་ ༡༠ ཉིན་མོ་དེ་ནི་བོད་མིའི་རང་དབང་སྒེར་ལངས་ཀྱི་ཉིན་མོ་ཡིན་པ་དང་། རང་དབང་དང་མང་གཙོ། དྲང་བདེན། ཁྲིམས་ལ་དབང་སྒྱུར་སོགས་ནི་འགྲོ་བ་མིའི་རིགས་ལ་ཕན་ཐོགས་ཡོད་པ་ཞིག་རེད། དེ་ནི་འགྲོ་བ་མིའི་རང་བཞིན་གྱི་ཐོབ་ཐང་གཅིག་ཀྱང་རེད། ཁྱེད་རང་ཚོས་མང་ཚོགས་འདུ་འཛོམས་བྱས་པ་བརྒྱུད་རིན་ཐང་ཅན་གྱི་འགྲོ་བ་མིའི་ཐོབ་ཐང་དེ་དག་དར་སྤེལ་གཏོང་གི་ཡོད་པ་དེ་ནི་ཧ་ཅང་གི་བྱ་བ་བཟང་པོ་ཞིག་རེད་ཅེས་དང་། ཡང་༸གོང་ས་མཆོག་ནས། རང་དབང་དང་མང་གཙོ། འགྲོ་བ་མིའི་ཐོབ་ཐང་བཅས་ནི་རང་གཞན་གཉིས་ལ་འབྲེལ་བ་ཡོད་པ་ཞིག་ཡིན་པ་མ་ཟད་ད་ལྟའི་མང་ཚོགས་འདུ་འཛོམས་ཀྱི་རོལ་དབྱངས་དེས་གང་ཞིག་མཚོན་གྱི་ཡོད་དམ་ཞེས་ན་ཐེ་ཝན་གྱི་མི་རབས་གཞོན་སྐྱེས་ཚོས་མ་འོངས་པར་ཡུལ་དེའི་ནང་རང་དབང་དང་མང་གཙོའི་ལམ་ལུགས་བསམ་གཞིགས་བྱེད་ཐུབ་པ་གསལ་སྟོན་བྱས་པ་རེད་ཅེས་དང་། དེ་བཞིན་ཐེ་ཝན་གྱི་མི་རབས་གསར་པ་རྣམས་ཀྱིས་ཡུལ་དེའི་ནང་རང་དབང་དང་དྲང་བདེན་བཟང་སྤྱོད་ཀྱི་ཐོག་ནས་ཡར་རྒྱས་གཏོང་རྒྱུ་སོགས་ལ་རྣམ་དཔྱོད་ཆ་ཚང་བེད་སྤྱོད་བྱས་ཏེ་ཐེ་ཝན་ནང་རང་དབང་དང་བདེ་སྐྱིད་ཀྱི་དཔལ་ལ་ལོངས་སུ་སྤྱོད་རྒྱུ་ཡོང་བའི་རེ་འདུན་བྱེད་བཞིན་ཡོད་ཅེས་བཀའ་སྩལ་ཡོད་པ་རེད། ” སྐབས་དེར་རོལ་དབྱངས་འདུ་འཛོམས་ཐོག་ཐེ་ཝན་བོད་གཞུང་སྐུ་ཚབ་ཟླ་བ་ཚེ་རིང་ལགས་དང་ཐེ་ཝན་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་ཡང་ཕེབས་ཡོད་པ་རེད། རོལ་དབྱངས་འདུ་འཛོམས་ཀྱི་གོ་སྒྲིག་པ་ཚོས་རོལ་དབྱངས་འདུ་འཛོམས་འདི་ཐེ་ཝན་ནང་གོ་སྒྲིག་ཞུས་དགོས་པ་ནི་ཐེ་ཝན་མང་ཚོགས་ཀྱི་རང་དབང་དང་མང་གཙོ་དྲང་བདེན་སོགས་ལ་རྒྱབ་སྐྱོར་ཞུ་བཞིན་ཡོད་པའི་རྣམ་པ་སྟོན་རྒྱུའི་ཆེད་ཡིན་པ་དང་། དེ་བཞིན་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་ནས་བཟུང་རྒྱ་ནག་གིས་བོད་ལ་དབང་སྒྱུར་བྱས་པར་བོད་མི་རྣམས་ཀྱིས་རང་དབང་སྒེར་ལངས་བྱས་ནས་མི་ལོ་ལྔ་བཅུ་འཁོར་བའི་དུས་དྲན་སྲུང་བརྩི་ཞུ་རྒྱུའི་ལས་དོན་གྱི་ཆ་ཤས་ཤིག་ཡིན་པའི་འགྲེལ་བརྗོད་གནང་འདུག
ཕྱི་ལོ ༢༠༠༨ ཟླ་ ༡༢ ཚེས་ ༢༩ ཉིན་ཐེ་ཝན་གྱི་རོལ་དབྱངས་གཏོང་མཁན་སྐུ་ཞབས་ཤན་ལིང་དང་གླུ་གཞས་གྲགས་ཅན་པ་སྐུ་ཞབས་ཕེ་ཊི་རྣམས་གཉིས་བཞུགས་སྒར་རྡ་སར་ཕེབས་ཏེ་༸གོང་ས་མཆོག་གི་ཞལ་མཇལ་ཞུས་ཡོད་པ་རེད། དེའི་སྐབས་ཕྱི་ལོ་ ༢༠༠༩ ལོར་བོད་མིའི་རང་དབང་ཆེད་དུ་དམིགས་པའི་རོལ་དབྱངས་ཀྱི་འདུ་འཛོམས་འདི་ཚུགས་རྒྱུར་༸གོང་མཆོག་གི་རྒྱབ་སྐྱོར་དང་ལས་དོན་བྱ་བ་ལམ་ལྷོང་ཡོང་བའི་སྨོན་ལམ་གསོལ་འདེབས་གནང་རོགས་བཅས་ཞུས་ཡོད་པ་མ་ཟད། གོང་གསལ་བརྙན་འཕྲིན་ཐོག་གི་བཀའ་སློབ་ཀྱང་དེ་དུས་སྩལ་བ་ཡིན་འདུག་གོ
