༢༠༠༩ ཕྱི་ཟླ་ ༧ ཚེས་ ༡༧ རེས་གཟའ་པ་སངས།
༄༅། ༢༠༠༩ ཕྱི་ཟླ་ ༧ ཚེས་ ༤ ཉིན་ཐེ་ཝན་གྱི་རྒྱལ་ས་ཐའེ་པེ་ལ་བོད་གཞུང་མང་བཙན་བྱོལ་དུ་འབྱོར་ནས་མི་ལོ་ ༥༠ འཁོར་བའི་ནང་བོད་མི་ཚོས་རང་གི་ཐུན་མོང་མ་ཡིན་པའི་ཆོས་དང་རིག་གཞུང་དེ་བཞིན་ཆབ་སྲིད་འཚོ་ཐབས་སོགས་ཀྱི་པར་རིགས་འགྲེམས་སྟོན་ཟླ་བ་གཅིག་རིང་ཐེ་ཝན་གྱི་རྒྱལ་ས་ཐའེ་པེ་ལ་གནང་བཞིན་ཡོད་པ་རེད། ཐེངས་དེའི་པར་རིགས་འགྲེམས་སྟོན་ནི་ཐེ་ཝན་ལ་ཡོད་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བོད་ཀྱི་ཆོས་རིག་ཐེབས་རྩ་ཁང་ནས་བོད་མི་བཙན་བྱོལ་དུ་འབྱོར་ནས་ལོ་ལྔ་བཅུ་འཁོར་བའི་དུས་ཚིགས་དང་སྟབས་བསྟུན་ནས་གོ་སྒྲིག་གནང་བ་ཞིག་རེད་འདུག དེ་ཡང་ཐེ་ཝན་གྱི་རྒྱལ་ས་ཐའེ་པེ་ལ་ཡོད་པའི་ཅང་ཅས་ཧྲེ་དྲན་རྟེན་ཚོགས་ཁང་ཆེན་མོའི་འགྲེམས་སྟོན་ནང་དེང་སྐབས་རྙེད་པར་དཀའ་བའི་བོད་པའི་པར་རིགས་གྲངས་ ༤༤༠ དང་། དེ་བཞིན་བོད་ཀྱི་དངུལ། དེ་མིན་བཙན་བྱོལ་བོད་མིའི་ཤེས་ཡོན་གནས་སྟངས། དེ་བཞིན་རིག་གཞུང་སྲུང་སྐྱོབ་སོགས་ཀྱི་འགྲེམས་སྟོན་གནང་ཡོད། དེ་བཞིན་ཟླ་གཅིག་འགྲེམས་སྟོན་གྱི་ལས་འཆར་དེའི་ནང་བོད་ཀྱི་བརྙན་འཕྲིན་འདྲ་མིན་ཡང་སྟོན་རྒྱུའི་གོ་སྒྲིག་ཞུས་ཡོད་པའི་སྐོར་ཐེ་ཝན་དུ་བཅའ་བཞུགས་བོད་གཞུང་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་གསུང་གསལ།
འགྲེམས་སྟོན་དེ་ནི་དམིགས་བསལ་རྒྱ་སྐད་རྒྱག་མཁན་ཚོ་ལ་བོད་ཀྱི་ཁྱད་པར་ཅན་གྱི་ཆོས་དང་རིག་གཞུང་ལ་མི་ལོ་ ༥༠ རིང་རྒྱ་ནག་གཞུང་ནས་གནོད་འཚེ་བྱས་པ་སོགས་ཧ་གོ་རྒྱུའི་ཆེད་དུ་ཡིན་སྐོར་དང་། དེ་མིན་སྐད་ཡིག་གཞན་དག་རྒྱག་མཁན་དང་མི་འདྲ་བར་རྒྱ་སྐད་རྒྱག་མཁན་ཚོར་རྒྱ་ནག་གཞུང་ཕྱོགས་ནས་རྫུན་གཏམ་ཁོ་ནའི་འོག་བསླུ་བྲིད་བྱེད་ཀྱི་ཡོད་པའི་གནས་སྟངས་ལ་བརྟེན་གནས་ཚུལ་དངོས་གང་ཡིན་ཤེས་རྟོགས་ཁག་པོ་ཡོད་རྐྱེན་ཐེངས་འདིའི་འགྲེམས་སྟོན་རྒྱ་སྐད་རྒྱག་མཁན་ལ་ཡིན་སྐོར་འགྲེལ་བརྗོད་གནང་ཡོད་པ་རེད། ཡང་ཁོང་ནས་གསུང་དོན། ད་ཐེངས་ཀྱིི་འགྲེམས་སྟོན་འདི་ནི་གྲ་སྒྲིག་ལོ་ཕྱེད་རིང་བྱས་ཡོད་ཅིང་དེ་ཡང་བོད་ཀྱི་ཁྱད་པར་ཅན་གྱི་ཆོས་དང་རིག་གཞུང་། བོད་སྨན་དང་བོད་པའི་ལོ་ཐོ། དེ་བཞིན་ཡིག་ཆ་ཁག་དང་། བཙན་བྱོལ་བོད་མིའི་པར་རིགས་འདྲ་མིན་སོགས་འདིར་བཞུགས་མི་མང་རྣམས་ལ་ངོ་སྤྲོད་བྱེད་རྒྱུར་གང་གཟབ་ཀྱིས་གྲ་སྒྲིག་ཞུས་ཡོད་སྐོར་ཡང་འགྲེལ་བརྗོད་གནང་ཡོད་པ་བཅས་ཀྱི་གནས་བསྡུས་སུ།
