༢༠༠༩ ཕྱི་ཟླ་ ༧ ཚེས་ ༡༧ རེས་གཟའ་པ་སངས།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྤྱི་ཏི་ཁུལ་དུ་ཉིན་གྲངས་དྲུག་རིང་མཛད་འཕྲིན་རྒྱ་ཆེ་ཞིག་བསྐྱངས་ཡོད་པའི་ཉིན་མཐའ་མར་ཕྱི་ཟླ་ ༧ ཚེས་ ༡༤ ཉིན་རྒྱབ་རྟ་པོ་གསེར་ཀོང་སློབ་གྲྭར་ཆིབས་སྒྱུར་གྱིས་དགེ་ལས་སློབ་ཕྲུག་རྣམས་ལ་ཤེས་ཡོན་སྐོར་གྱི་བཀའ་སློབ་ཕེབས་དོན། འཛམ་གླིང་འདིའི་སྟེང་གི་ལུང་པ་གང་འདྲ་ཞིག་ལ་བལྟས་ཀྱང་མི་མང་གི་ཤེས་ཡོན་གང་ན་ལེགས་པ་ཡོད་པའི་ལུང་པ་དེ་ཡར་རྒྱས་འགྲོ་ཆེ་བ་ཡོད་པ་རེད། དེར་བརྟེན་མ་འོངས་པར་ལུང་པ་ཡར་རྒྱས་འགྲོ་རྒྱུར་རྩ་བ་དེང་དུས་ཀྱི་ཤེས་ཡོན་ལ་རག་ལུས་ཡོད། དེར་བརྟེན་དེང་དུས་ཀྱི་ཤེས་ཡོན་ཚད་ལོངས་བ་ཞིག་དང་སྤུས་ཚད་ལྡན་པ་ཞིག་ཡོང་ཆེད་ཚང་མས་འབད་བརྩོན་གནང་རོགས་ཞུ་རྒྱུ་ཡིན། ཞེས་དང་ཡང་༸གོང་ས་མཆོག་ནས། དེང་རིང་ཁ་སང་དུས་རབས་ཉེར་གཅིག་པར་སླེབས་ཡོད།
སྤྱིར་བཏང་འཛམ་གླིང་འདིའི་སྟེང་དེང་དུས་ཀྱི་ཤེས་ཡོན་ཚད་མཐོ་པོ་སླེབས་ཡོད། འོན་ཀྱང་ཤེས་ཡོན་ཚད་མཐོ་པོ་ལྡན་པའི་མི་དེ་དག་གིས་འཛམ་གླིང་འདིའི་སྟེང་རྙོག་གྲ་མང་པོ་བཟོ་རྒྱུ་ཞིག་ཡོང་བཞིན་འདུག དེ་ནི་ཤེས་ཡོན་ཡོད་པ་ཁོ་ནའི་འདང་གི་མེད་པ་གསལ་པོ་རེད། ཤེས་ཡོན་ཚད་མཐོ་པོ་ཡོད་ཀྱང་མི་སེམས་འཁྲུག་བསྡད་པ། དཔེར་ན་ཉི་ཧོང་ནང་མཐུན་རྐྱེན་ཡག་པོ་ཡོད་ཀྱང་སློབ་ཕྲུག་ནང་ལ་ཆ་མཚོན་ནའང་སློབ་སྦྱོང་ཡག་པོ་ཡོད་ཀྱང་སེམས་པ་མ་སྐྱིད་པ་བྱས་ནས་རང་ཤི་རྒྱག་མཁན་དེ་འདྲ་ཡོང་གི་འདུག དེར་བརྟེན་དེང་དུས་ཀྱི་ཤེས་ཡོན་ཡོད་པའི་ཐོག་ང་ཚོའི་ཕ་མེས་ནས་ཡོད་པའི་སངས་རྒྱས་ཀྱི་ཆོས་དང་འབྲེལ་བའི་སེམས་པ་བཟང་པོ་བྱ་རྒྱུ་། མི་ལ་གནོད་མི་བྱེད་པ་དང་། འབུ་ཞིག་ཡིན་ཡང་གནོད་པ་མི་བྱེད་པའི་ཡ་རབས་བཟང་པོའི་སྤྱོད་པ་བྱ་རྒྱུ་ནི་ཧ་ཅང་གལ་ཆེན་པོ་རེད། ཅེས་དང་ཡང་༸གོང་ས་མཆོག་ནས། དེ་ལྟར་བྱས་པ་ཡིན་ན་ཕྲུ་གུ་སོ་སོར་མི་ཚེ་སྐྱེལ་སྐབས་ཧ་ཅང་ཕན་ཐོགས་ཡོང་གི་རེད།
དེ་བཞིན་རིམ་པས་ཕྲུ་གུ་སོ་སོར་ཁྱིམ་ཚང་འཛིན་ནས་སླེབས་ཡོང་དུས་ཁྱིམ་ཚང་དེར་ཞི་བདེ་ཡོང་གི་རེད། ཁྱིམ་གཅིག་གཉིས་གསུམ་བཅས་ཕྱོགས་གཅིག་ལ་བསྡུས་སྐབས་སྤྱི་ཚོགས་ཆགས་ཀྱི་ཡོད། དེ་འདྲའི་སྤྱི་ཚོགས་འདི་བྱམས་བརྩེ་དང་ལྡན་པ་ཞིག་དང་བདེ་སྐྱིད་ལྡན་པ་ཞིག་ཆགས་རྒྱུ་རེད། དེ་འདྲ་ཡོང་རྒྱུར་ང་ཚོ་ཚང་མས་བསམ་བློ་གཏོང་དགོས་ཀྱི་ཡོད། ཅེས་བཀའ་སྩལ། ཡང་ནང་ཆོས་དང་འབྲེལ་བའི་བཟང་པོའི་བསླབ་བྱ་དེ་དག་ལ་སློབ་སྦྱོང་བྱེད་རྒྱུ་དང་བོད་ཀྱི་སྐད་ཡིག་གལ་ཆེ་ཡིན་སྐོར་ལ་བཀའ་སློབ་ཕེབས་དོན། ང་ཚོས་ནང་ཆོས་དང་འབྲེལ་བའི་བཟང་པོའི་བསླབ་བྱ་ལ་བསམ་བློ་གཏོང་སྐབས་བཀའ་འགྱུར་བསྟན་འགྱུར་ཡང་བོད་ཡིག་ནང་ལ་ཡོད་པ་རེད། ཁྱེད་རང་ཚོའི་སློབ་གྲྭའི་ནང་བོད་ཡིག་སློབ་རྒྱུ་ཡོད་པ་དེ་ནི་གོ་སྐབས་ཤིག་དང་ཁེ་ཕན་ཞིག་ཡིན་པས་ཁྱེད་ཚོ་རང་ཉིད་ཀྱི་ཉིན་རེའི་འཚོ་བ་སྐྱེལ་རྒྱུའི་ནང་བོད་ཡིག་དང་བོད་སྐད་དེ་ཙམ་གྱི་འབྲེལ་བ་ཆེན་པོ་མེད་ཀྱང་མིའི་སེམས་ཡར་རྒྱས་གཏོང་རྒྱུར་ནང་ཆོས་དང་འབྲེལ་བའི་བྱམས་བརྩེ་དང་ཡ་རབས་སྤྱོད་བཟང་སློབ་ཁྲིད་བྱེད་རྒྱུར་བོད་སྐད་འདི་གལ་ཆེན་པོ་ཡིན་པས་དོ་སྣང་ཤུགས་ཆེ་ཙམ་གནང་དགོས། ཞེས་སོགས་ཀྱི་བཀའ་སློབ་ཟབ་རྒྱས་སྩལ་བ་དང་ཆབས་ཅིག་དེ་གའི་དགེ་ལས་སློབ་ཕྲུག་རྣམས་ལ་ཞལ་ལག་ཆེད་ཧིན་སྒོར་ཁྲི་གཅིག་གསོལ་སྩལ་ཡང་གནང་ཡོད་པ་བཅས་ཀྱི་གནས་བསྡུས་སུ།།
