༢༠༠༩ ཕྱི་ཟླ་ ༧ ཚེས་ ༣༠ རེས་གཟའ་ཕུར་བུ།
༸གོང་ས་མཆོག་ལ་ཝར་སོའི་སྲིད་འཛིན་ཟུར་པ་དང་སྲིད་བློན་ཟུར་པ་རྣམ་གཉིས་ནས་མཛད་སྒོར་ཕེབས་བསུ་ཞུ་བཞིན་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་པོ་ལན་ཌིའི་རྒྱལ་ས་ཝར་སོར་གྲོང་སྡེ་སྤྱི་ཁྱབ་པ་དང་གྲོང་སྡེ་ལྷན་ཁང་ནས་ཇི་ལྟར་གསོལ་འདེབས་ཞུས་དོན་བཞིན། ཕྱི་ལོ་ ༢༠༠༩ ཕྱི་ཟླ་ ༧ ཚེས་ ༢༦ ཉིན་༸གོང་ས་༸སྐྱབས་མགོན་ཆེན་པོ་སྟོན་འཁོར་དང་བཅས་བཞུགས་སྒར་རྡ་རམ་ས་ལའི་གཱ་གྷལ་གནམ་ཐང་ནས་མཁའ་ལམ་བརྒྱུད་ལྡི་ལི་དང་དེ་ནས་པོ་ལན་ཌིར་ཆིབས་སྒྱུར་བསྐྱངས་ཏེ་ཕྱི་ཟླ་ ༧ ཆེས་ ༢༧ ཉིན་པོ་ལན་ཌིའི་རྒྱལ་ས་ཝར་སོའི་གནམ་ཐང་དུ་༸ཞབས་སོར་བདེ་བར་འཁོད་སྐབས་ཝར་སོར་གྲོང་སྡེ་ལས་ཁུངས་ཀྱི་འགོ་འཛིན་སྐུ་ཞབས་ཇ་རོ་སི་ལོ་ཇོ་ཟ་ཝཀ་ (Jaroslaw Jozwiak) ལགས་དང་པོ་ལན་ཌིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་པི་ཊར་ལགས། 
དབྱིན་ཡུལ་བོད་གཞུང་སྐུ་ཚབ་དོན་གཅོད་ཚེ་རིང་བཀྲ་ཤིས་ལགས། དེ་བཞིན་བོད་དོན་རྒྱབ་སྐྱོར་བ་སོགས་ནས་ཕེབས་བསུ་གཟབ་རྒྱས་ཞུས་ཡོད་པ་རེད། གནམ་ཐང་ནས་བཞུགས་གནས་མགྲོན་ཁང་དུ་གདན་ཞུའི་སྐབས་པོ་ལན་ཌི་གཞུང་ཕྱོགས་ནས་སྐུའི་སྲུང་བྱ་ཞུ་དགོས་གང་ཅིའི་ཐད་གྲ་སྒྲིག་ཧ་ཅང་ཚད་མཐོ་ཞུས་ཡོད།
ཕྱི་ཟླ་ ༧ ཚེས་ ༢༨ ཉིན་གྱི་སྔ་དྲོ་༸གོང་ས་མཆོག་ནས་པོ་ལན་ཌིའི་རྒྱལ་ས་ཝར་སོར་ནང་རྟེན་གཞི་བྱས་པའི་ཝར་སོར་གཙུག་ལག་སློབ་གཉེར་ཁང་གི་ཚོགས་ཁང་ཆེན་མོར་ཤེས་ཡོན་གྱི་རིན་ཐང་དང་
པོ་ལན་ཌིའི་རང་བཙན་སླད་རང་སྲོག་བློས་གཏོང་བྱེད་མཁན་གྱི་མི་སྣ་སྟོང་ཕྲག་མང་པོའི་དྲན་རྟེན་ཆེད་བསྐྲུན་པའི་ཝར་སོར་རའེ་སིང་འགྲེམས་སྟོན་ཁང་དུ་༸ཞབས་སོར་འཁོད་པ
རྒྱལ་སྤྱིའི་འགན་ཁུར་ཞེས་པའི་བརྗོད་གཞིའི་ཐོག་མང་ཚོགས་རྣམས་ལ་བཀའ་སློབ་སྩལ་ཡོད། སྐབས་དེར་དགེ་ལས་སློབ་ཕྲུག་རྣམས་དང་གདན་ཞུའི་སྐུ་མགྲོན་སོགས་ཀྱི་ཚོགས་ཁང་ཡོངས་སུ་ཁེངས་ཡོད། དེ་བཞིན་རྒྱ་ཆེའི་མི་མང་ཆེད་བརྙན་འཕྲིན་ཐོག་ཐད་གཏོང་གནང་ཡོད་པར་བརྟེན་མི་མང་ཁྲི་ཚོ་མང་པོར་བཀའ་སློབ་ཞུ་རྒྱུའི་གོ་སྐབས་ཐོབ་ཡོད་པ་རེད། དེ་ཡང་ཐོག་མར་མཐོ་སློབ་དེའི་སློབ་སྤྱི་མཁས་དབང་ཀ་ཊར་ཛི་ན་ཆ་ལ་སིན་སི་ཀ་མ་ཁུལ་ཀོ་ (Katarzyna Chalasinska KMacukow) མཆོག་གིས་ཕེབས་བསུའི་གསུང་བཤད་གནང་ཡོད་པའི་ནང་། ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོ་རིམ་གཙུག་ལག་སློབ་གཉེར་ཁང་འདིར་གདན་ཞུའི་གསོལ་འདེབས་ཞུས་པ་ལྟར་ཞལ་བཞེས་དབུགས་དབྱུང་སྨིན་སྩལ་བྱུང་བ་མ་ཟད་གཙུག་ལག་སློབ་གྲྭ་འདིའི་དགེ་ལས་སློབ་ཕྲུག་རྣམས་དང་དེ་མིན་མི་མང་བཅས་པར་བཀའ་སློབ་ཀྱང་སྩལ་རྒྱུའི་བཀའ་བཞེས་བཟང་པོ་ཐོབ་པར་བཀའ་དྲིན་ཆེ་ཞུ་རྒྱུ་ཡིན་སོགས་ཀྱི་ཕེབས་བསུའི་གསུང་བཤད་གནང་ཡོད་པ་རེད། དེ་རྗེས་༸གོང་ས་མཆོག་ནས་ཤེས་ཡོན་གྱི་རིན་ཐང་དང་རྒྱལ་སྤྱིའི་འགན་ཁུར་ཞེས་པའི་བརྗོད་གཞིའི་ཐོག་བཀའ་སློབ་ཕེབས་ཡོད་པའི་ནང་། ཤེས་ཡོན་གྱི་རིན་ཐང་དངོས་ནི་དོན་དང་ལྡན་པའི་བདེ་སྐྱིད་ཀྱི་མི་ཚེ་ཞིག་སྐྱེལ་རྒྱུ་དེ་ཡིན། དེ་ལྟར་ཁྱིམ་ཚང་དང་སྤྱི་ཚོགས། དེ་མཚུངས་འགྲོ་བ་མིའི་རིགས་ཡོངས་སུ་ཁྱབ་ཐུབ་ཐབས་བྱེད་དགོས་སྐོར་དང་། དེ་བཞིན་བཟང་སྤྱོད་དང་བྱམས་བརྩེ་གལ་ཆེ་ཡིན་ཞིང་བཟང་སྤྱོད་དང་བྱམས་བརྩེ་ལྡན་པའི་མི་ཞིག་ཡིན་ཕྱིན་མི་ཚེ་སྐྱིད་པ་དང་ལུས་སེམས་བདེ་བ་ཡོད་སྐོར་སོགས་ཀྱི་བཀའ་སློབ་ཟབ་ཅིང་རྒྱ་ཆེ་ཕེབས་ཡོད། དེ་རྗེས་བཀའ་སློབ་ཞུ་མི་རྣམས་ཀྱིས་དྲི་བ་ཕུལ་བ་ཁག་ལ་བཀའ་ལན་ཕེབས་ཡོད་པའི་ནང་། དཔལ་འབྱོར་གྱི་བྱ་གཞག་ནང་དྲང་བདེན་དང་ཕྱི་གསལ་ནང་གསལ་དགོས་རྒྱུ་ནི་ཧ་ཅང་གལ་ཆེ་ཡིན་སྐོར་བཀའ་ལན་ཕེབས་ཡོད་པ་མ་ཟད་དངུལ་དང་དཔལ་འབྱོར་གཅིག་པུ་གལ་ཆེན་པོ་མ་ཡིན་པར་བདེ་སྐྱིད་ལྡན་པའི་ཁྱིམ་ཚང་དང་སྤྱི་ཚོགས། དེ་བཞིན་ཆོག་ཤེས་ལྡན་པའི་སྤྱི་ཚོགས་ཤིག་དགོས་རྒྱུ་ཡང་དེ་བས་གལ་ཆེ་ཡིན་སྐོར་བཀའ་ལན་ཕེབས་ཡོད། ཡང་གོ་ལའི་དཔལ་འབྱོར་གྱི་དཀའ་རྙོག་དང་འབྲེལ་བའི་གནད་དོན་ཐད་བཀའ་དྲི་ཞུས་ཡོད་པར་༸གོང་ས་མཆོག་ནས། དཀའ་རྙོག་འདི་ནི་འདོད་རྔམ་དང་ཕྱི་གསལ་ནང་གསལ་མེད་པའི་ཐོག་ནས་བྱུང་བ་ཞིག་ཡིན་སྟབས་ངེས་པར་དུ་དཔལ་འབྱོར་ཁེ་ལས་ཀྱི་ལས་དོན་ནང་དྲང་བདེན་དང་ཕྱི་གསལ་ནང་གསལ་ངེས་པར་དགོས་ཀྱི་རེད། ཅེས་བཀའ་ལན་ཕེབས་ཡོད།
ཝར་སོར་གཙུག་ལག་སློབ་གྲྭར་མི་མང་ལ་བཀའ་སློབ་ཡོངས་སུ་གྲུབ་རྗེས་གཙུག་ལག་སློབ་གྲྭ་དེའི་སློབ་སྤྱི་མཆོག་ནས་༸གོང་ས་མཆོག་ལ་ཆེ་བསྟོད་སླད་གཙུག་ལག་སློབ་གྲྭ་དེའི་གཟེངས་རྟགས་འབུལ་བཞེས་མཛད་ཡོད་པ་རེད། དེ་ལྟར་ཕུལ་དགོས་དོན་ནི་༸གོང་ས་མཆོག་ནས་འཛམ་གླིང་འདིའི་སྟེང་ཞི་བདེ་དང་བཟང་སྤྱོད། ཤེས་ཡོན། བྱམས་བརྩེ་སོགས་ཀྱི་རླབས་ཆེན་མཛད་འཕྲིན་རྒྱ་ཆེ་བསྐྱངས་ཡོད་པར་བརྟེན་ཕུལ་བ་ཞིག་ཡིན་སྐོར་འགྲེལ་བརྗོད་གནང་ཡོད་པ་རེད།
དེ་རྗེས་ཝར་སོར་གྲོང་སྡེའི་སྤྱི་ཁྱབ་དང་གྲོང་སྡེ་ལྷན་ཁང་གི་ཚོགས་གཙོ་སོགས་ནས་གོ་སྒྲིག་ཞུས་པའི་ཉིན་གུང་ལྗགས་སྨིན་གྱི་གསོལ་སྟོན་ཞིག་ལ་ལྷན་ཞུགས་གནང་རྗེས་གྲོང་སྡེ་ལས་ཁུངས་ཀྱི་གནད་ཡོད་ལས་བྱེད་པ་ཚོས་༸གོང་ས་མཆོག་གྲོང་ཁྱེར་དེའི་ནང་ཡོད་པའི་པོ་ལན་ཌིའི་རང་བཙན་སླད་རང་སྲོག་བློས་གཏོང་བྱེད་མཁན་གྱི་མི་སྣ་སྟོང་ཕྲག་མང་པོའི་དྲན་རྟེན་ཆེད་བསྐྲུན་པའི་ཝར་སོར་རའེ་སིང་འགྲེམས་སྟོན་ཁང་ཞེས་པར་ཆིབས་སྒྱུར་བསྐྱངས་ཏེ་འགྲེམས་སྟོན་འགན་འཛིན་ནས་༸གོང་ས་མཆོག་ལ་སྙན་སྒྲོན་དང་སྦྲགས་གཟིགས་ཞིབ་མཛད་ཡོད་པ་མ་ཟད་འགྲེམས་སྟོན་ཁང་དེའི་ལྟ་སྐོར་བའི་ཐོ་དེབ་ནང་མཚན་རྟགས་ཀྱང་སྩལ་ཡོད་པ་རེད། ཕྱི་དྲོ་བོད་གཞུང་སྨན་རྩིས་ཁང་གི་སློབ་གཉེར་བ་ཟུར་པ་སྨན་པ་བསྟན་འཛིན་བྱང་ཆུབ་ལགས་ཀྱིས་གསར་བཙུགས་བྱས་པའི་བོད་ཀྱི་གསོ་བ་རིག་པའི་སྨན་ཁང་དེའི་དབུ་འབྱེད་དང་རབ་གནས་བཀའ་དྲིན་ཆེ་བ་སྩལ་ཡོད།།
