༢༠༠༩ ཕྱི་ཟླ་ ༧ ཚེས་ ༢༠ རེས་གཟའ་ཟླ་བ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ༢༠༠༩ ཕྱི་ཟླ་ ༧ ཚེས་ ༡༤ ཉིན་མཚོ་སྔོན་ཞིང་ཆེན་ཆབ་ཆ་ཁུལ་མང་ར་རྫོང་དུ་མཐོ་འབྲིང་སྐད་གཉིས་དགེ་རྒན་བསྡུ་རྒྱུའི་རྒྱུགས་ལེན་ནང་རྫོང་དེའི་སློབ་ཆེན་མཐར་ཕྱིན་སློབ་མ་བརྒྱ་ཡས་མས་ཤིག་འཛུལ་ཞུགས་བྱས་ཡོད་པ་རེད། རྒྱུགས་ལེན་ལྟ་རྟོག་བྱ་མཁན་གཙོ་བོ་མང་ར་རྫོང་མི་དོན་ལས་ཁུངས་ཀྱི་ལས་བྱེད་རྡོ་རྗེ་དབང་ཆེན་དང་། མང་ར་རྫོང་རྩ་འཛུགས་ལས་ཁུངས་ཀྱི་ལས་བྱེད་ལྷུན་གྲུབ། མཁར་བྱམས་རྒྱལ་བཅས་ཡིན་པ་དང་། རྒྱུགས་གཞིའི་ནང་དོན་གཙོ་བོ་ནི་ཏང་གི་མཚོན་ཆེད་གསུམ་གྱི་དགོངས་དོན་སྐོར་དང་། སྔ་ལོར་སི་ཁྲོན་བུན་ཁྲོན་དུ་ས་ཡོམ་བྱུང་བའི་སྐོར། རྒྱལ་གཅེས་རིང་ལུགས་ཀྱི་སློབ་གསོའི་སྐོར་སོགས་རྒྱ་ནག་གུང་ཁྲན་རིང་ལུགས་ཀྱི་རྒྱུན་གཏན་ཆབ་སྲིད་དྲིལ་བསྒྲགས་སྐོར་ཤ་སྟག་ཡིན་པ་རེད།
ལྷག་པར་ད་རེས་རྒྱུགས་གཞི་འདི་ཐོག་མར་གསལ་བསྒྲགས་སྤེལ་སྐབས་ནས་གསལ་བཤད་མ་བྱས་པར་ཡིག་རྒྱུགས་གཏོང་བར་རྒྱུགས་རའི་ནང་དུ་འབྱོར་རྗེས་གཞི་ནས་རྒྱུགས་གཞི་ཆ་ཚང་རྒྱ་ཡིག་གིས་འབྲི་དགོས་པ་ལས་བོད་ཡིག་ཐོག་འབྲི་་མི་ཆོག་པའི་བཙན་བཀའ་བཏང་འདུག འདིའི་ཐད་ཡིག་རྒྱུགས་ནང་ཞུགས་མཁན་སློབ་མ་ཁག་གཅིག་ནས་སྐད་གཉིས་དགེ་རྒན་བསྡུ་བའི་རྒྱུགས་གཞིར་བོད་ཡིག་འབྲི་མི་ཆོག་པའི་རྒྱུ་མཚན་གང་ཡིན་སྐོར་ས་གནས་ལས་བྱེད་པར་སྐད་ཆ་དྲིས་སྐབས། ཁོང་ཚོས་དེ་ནི་རྒྱུགས་ཤོག་ལྟ་མཁན་ཚོས་བོད་ཡིག་མི་ཤེས་པས་ཡིན་སྐོར་འགྲེལ་བརྗོད་བྱས་ཡོད། རྗེས་སུ་ཡིག་རྒྱུགས་ཀྱི་གྲུབ་འབྲས་གསལ་བསྒྲགས་བྱེད་སྐབས་མཐོ་འབྲིང་དགེ་རྒན་ལ་ཡིག་རྒྱུགས་འཕྲོད་མཁན་མི་གྲངས་ ༡༣ བྱུང་ཡོད་པའི་ཁོངས་ནས་བོད་མི་གཉིས་མ་གཏོགས་གཞན་ཚང་མ་རྒྱ་མི་ཡིན་པ་དང་། བོད་སློབ་ཁག་གཅིག་གིས་རྒྱུགས་ཤོག་སྟེང་བོད་ཡིག་བྲིིས་ཡོད་སྟབས་དེ་དག་གི་རྒྱུགས་ཤོག་རྩིས་མེད་བཏང་ཡོད་པ་རེད། སླར་ཡང་ཟླ་ ༧ ཚེས་ ༡༦ ཉིན་སློབ་ཆུང་གི་སྐད་གཉིས་དགེ་རྒན་བསྡུ་བའི་ཡིག་རྒྱུགས་ཤིག་འགོ་འཛུགས་བྱས་པར་དེའི་ནང་ཞུགས་མཁན་མི་གྲངས་བརྒྱ་ཡས་མས་ཤིག་བྱུང་ཡོད་པ་ནས་དངོས་སུ་རྒྱུགས་འཕྲོད་པ་མི་གྲངས་ཉི་ཤུ་ཙམ་བྱུང་འདུག་ཅིང་། ཐོག་མར་མཐོ་འབྲིང་དགེ་རྒན་བསྡུ་བའི་སྐབས་རྒྱུགས་གཞིའི་སྟེང་བོད་ཡིག་འབྲི་མི་ཆོག་པའི་བཙན་བཀའ་གཏོང་སྐབས་སློབ་མ་ཚོས་ངོ་རྒོལ་གྱི་རྣམ་འགྱུར་བསྟན་པར་བརྟེན་སློབ་ཆུང་སྐད་གཉིས་དགེ་རྒན་བསྡུ་སྐབས་རྒྱུགས་གཞིའི་སྟེང་བོད་ཡིག་འབྲི་ཆོག་པའི་གསལ་བཤད་ཙམ་མི་བྱེད་ཐབས་མེད་བྱུང་ཡོད།
གནད་དོན་དེའི་ཐོག་ནས་བོད་ནང་བོད་རིགས་གནས་སྡོད་བྱ་ཡུལ་གྱི་ས་ཁུལ་ཁག་ཏུ་བཙན་ཤུགས་ཀྱི་ཐོག་ནས་རྒྱ་ཡིག་བཀོལ་སྤྱོད་བྱ་རྒྱུའི་ལག་བསྟར་བྱས་ཏེ་དོན་དངོས་ཐོག་བོད་ནང་མི་རིགས་འདྲ་མཉམ་གྱི་སྲིད་བྱུས་ལྟར་བཞག་བོད་མི་རིགས་རྩ་མེད་བཟོ་རྒྱུའི་ཆབ་སྲིད་དངོས་ཤུགས་བརྒྱུད་གསུམ་ནས་སྤེལ་བཞིན་ཡོད་པའི་དཔེ་མཚོན་གསལ་པོར་བསྟན་ཡོད།
