༢༠༠༩ ཕྱི་ཟླ་ ༦ ཚེས་ ༢༦ རེས་གཟའ་པ་སངས།
༄༅། །རྡ་ས་ནང་ཆོས་གོ་སྒྲིག་ཚོགས་ཆུང་དང་། རྡ་སྟེང་བོད་ཁྱིམ་ཐུན་མོང་ནས་གོ་སྒྲིག་ཞུས་ཏེ། སྐལ་ལྡན་ལས་འཕྲོ་ཅན་གྱི་མི་རབས་གསར་པའི་གཞོན་སྐྱེས་རྣམས་ལ་ ༢༠༠༩ ཕྱི་ཟླ་ ༦ ཚེས་ ༢༤ ནས་ ༢༥ བར་ཉིན་གྲངས་གཉིས་རིང་སླར་ཡང་དམིགས་བསལ་ནང་ཆོས་ངོ་སྤྲོད་ཐེངས་གསུམ་པའི་འདུ་འཛོམས་རྡ་སྟེང་བོད་ཁྱིམ་ཚོགས་ཁང་དུ་བསྐྱངས་ཡོད་པ་རེད།
དེ་ཡང་ཉིན་དང་པོའི་སྔ་དྲོ་ཆུ་ཚོད་ ༨།༣༠ ཐོག་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ཁྱིམ་ཚོགས་ཁང་དུ་ཆིབས་སྒྱུར་བསྐྱངས་ཏེ་བཞུགས་ཁྲི་རིན་པོ་ཆེར་འཁོད་རྗེས་རྡ་ས་ནང་ཆོས་གོ་སྒྲིག་ཚོགས་ཆུང་གི་མཐུན་འགྱུར་འོག་ནང་ཆོས་སློབ་གཉེར་བ་སྐྱ་བོ་རྒན་གྲས་ཁག་གཅིག་ནས་ཁ་དོག་དང་རྒྱུ་འབྲས་ཆུང་ངུའི་རྣམ་གཞག་ཐོག་༸གོང་ས་མཆོག་གི་བཀའ་དགོངས་དང་རྒྱལ་བ་དགྱེས་པའི་མཆོད་སྤྲིན་གྱི་ཆེད་དུ་རིགས་ལམ་སྐོར་ལ་རྟགས་གསལ་དུས་ཡུན་སྐར་མ་ ༡༥ རིང་སྤྱན་འབུལ་གྲུབ་རྗེས་༸གོང་ས་མཆོག་ནས་ནང་ཆོས་ཀྱི་འཕེལ་རིམ་དང་ལྟ་གྲུབ་གཞི་མཐུན་ཡོད་པའི་ཐོག་ནང་ཆོས་ཉམས་ལེན་བྱེད་ཕྱོགས་སྐོར་ལ་རྒྱལ་སྲས་ལག་ལེན་སོ་བདུན་མའི་བཀའ་ཆོས་ཀྱི་ཐོག་མར་བཀའ་སློབ་ཕེབས་དོན། 
སྤྱིར་དེང་སང་ང་ཚོ་བོད་པའི་སྤྱི་ཚོགས་དང་། རླུང་འཕྲིན་སོགས་ཀྱི་ནང་བོད་སྐད་ཤོད་སྐབས་བོད་ཀྱི་སུམ་རྟགས་དང་། དག་ཡིག་གི་འགྲོ་སྟངས་དང་མི་མཐུན་པར་གནོད་གཞིའི་ཐ་སྙད་གསར་བཟོ་མང་པོ་ཞིག་ཡོང་གི་འདུག བོད་ཀྱི་ཤེས་རིག་གཏིང་ཟབ་ལ་རྒྱ་ཆེ་བ་ཞིག་ཡོད་པ་ནི་གནའ་སྔ་མོའི་མཁས་པས་བརྩམས་པའི་བསྟན་ཆོས་ཁག་ནང་ཐ་སྙད་ཀྱི་འགྲོ་སྟངས་ཡོད་པ་དེ་རྣམས་ནོར་འཁྲུལ་མེད་སྟབས་གསར་བཟོ་བྱེད་དགོས་དོན་གང་ཡང་མེད་པའི་ཐོག་གཙོ་སྦྱོང་བྱེད་ཐུབ་ན་ཡག་པོ་ཡོད། ཅེས་སོགས་བཀའ་སློབ་ཕེབས་བསྟུན་ལག་ལེན་སོ་བདུན་མ་ངོ་སྤྲོད་གནང་སྐབས་གཙོ་བོ་སྐྱེས་བུ་གསུམ་གྱི་ལམ་རིམ་དང་བློ་སྦྱོང་རྣམ་བཞི་བཅས་ཟུང་དུ་འབྲེལ་བའི་ཐོག་ནས་བཀའ་ཁྲིད་གནང་ཡོད། རྒྱལ་སྲས་ལག་ལེན་སོ་བདུན་མའི་བརྗོད་བྱ་གཙོ་བོ་ནི། དང་པོ། བསྟན་བཅོས་ཁག་གི་འགྲོ་སྟངས་བཞིན་མཆོད་བརྗོད་དང་། བརྩམ་པར་དམ་བཅའ་བའི་འགྲོ་སྟངས་སོགས་གསུངས་རྗེས་དངོས་གཞིའི་སྐབས་སྐྱེས་བུ་གསུམ་གྱི་ལམ་རིམ་ནང་བསྡུས་ཏེ་གསུངས་བ་དང་། སྐྱེས་བུ་ཆུང་ངུའི་སྐབས་ཆོས་ཀྱི་བསམ་བློ་གཏོང་སྟངས་དང་འགྲོ་སྟངས་སོགས་ངོ་སྤྲོད་དང་།སྐྱེས་བུ་ཆུང་ངུའི་ལམ་རིམ་སྙིང་པོ་ནི།དལ་འབྱོར། མི་རྟག་པ། སྐྱབས་འགྲོ། ལས་འབྲས་སོགས་བཞི་པོ་དེ་རྣམས་སྐྱེས་བུ་ཆུང་ངུའི་ལམ་རིམ་གྱི་བསམ་བློ་གཏོང་སྟངས་དང་། བློ་ལྡོག་རྣམ་བཞི་ཟེར་ན། ཚེ་འདིའི་རྣམ་ཤེས་ལྡོག་ནས་སྐྱེ་བ་ཕྱི་མ་དོན་གཉེར་གྱི་བསམ་བློ་སྦྱང་རྒྱུ་གཙོ་བོ་ཡིན་སྐོར་ངོ་སྤྲོད་དང་། དེ་ནས་སྐྱེས་བུ་འབྲིང་གི་ལམ་རིམ་སྐོར་ལ་གཙོ་བོ་ནི་འཁོར་བའི་སྐྱོན་ཡག་པོ་ངོ་འཕྲོད་པ་ཞིག་དང་། དེ་ནས་འཁོར་བ་ལས་ཐར་བའི་ཐར་པའི་ཕན་ཡོན་དང་། ཐར་པ་དོན་གཉེར་གྱི་བསམ་བློ་སྦྱངས་རྗེས་ཐར་པ་དོན་དུ་གཉེར་ན་ཐར་པའི་ལམ་གང་འདྲ་ཞིག་ལ་རྟེན་དགོས་མིན་སོགས་ལམ་སྟོན་བཀའ་སློབ་སྩལ་ཡོད།
མཐའ་དོན། བོད་པའི་གཞོན་སྐྱེས་རྣམས་ནས་མ་འོངས་པར་འཛམ་གླིང་སྤྱིའི་འགན་ཁུར་དང་། ལྷག་པར་དུ་བོད་པའི་མི་ཞིག་ཡིན་པའི་ཆ་ནས་རྒྱ་ནག་མི་མང་ས་ཡ་མང་པོའི་ཡ་རབས་སྤྱོད་བཟང་སོགས་སྐྱོབ་ཆེད་བོད་མི་རིགས་ཀྱི་གོམས་གཤིས་ཡ་རབས་སྤྱོད་བཟང་དང་། ཆོས་རིག་སོགས་ཀྱི་ཐོག་ནས་རྒྱ་ནག་མི་མང་གི་ཡ་རབས་སྤྱོད་བཟང་རླག་འགྲོ་བཞིན་པ་དེ་རྣམས་ངེས་པར་དུ་བསྐྱབ་ཐུབ་དགོས་རྒྱུའི་བསམ་བློ་རྒྱ་ཆེ་གཏོང་དགོས་སྐོར་སོགས་བཀའ་སློབ་ཟབ་རྒྱས་སྤྱི་སྩལ་གནང་།
ཉིན་གཉིས་རིང་གི་སྔ་དྲོ་༸གོང་ས་མཆོག་ནས་ནང་ཆོས་ངོ་སྤྲོད་གནང་གྲུབ་མཚམས་དོགས་འདྲིའི་དྲི་བ་ཕུལ་བ་ཁག་ལ་མགོན་པོ་གང་ཉིད་ནས་ཐུགས་བརྩེ་ཆེན་པོའི་སྒོ་ནས་བཀའ་ལན་སྩལ་ཡོད། ཕྱེད་ཡོལ་ཙམ་ནས་ནང་ཆོས་གོ་སྒྲིག་ཚོགས་ཆུང་གི་ཚོགས་མི་རྣམ་གྲྭ་དཔེ་ཁྲིད་དགེ་རྒན་དགེ་བཤེས་བློ་བཟང་གྲགས་པ་ལགས་དང་། རིགས་སློབ་དཔེ་ཁྲིད་དགེ་རྒན་དགེ་བཤེས་བློ་བཟང་ཟླ་བ་ལགས། རིགས་སློབ་རིས་མེད་སློབ་ཐོན་པ་བསྟན་འཛིན་འགྱུར་མེད་ལགས། རྫོང་སར་མཁན་པོ་བྱམས་པ་བསྟར་དར་ལགས། དེ་བཞིན་སློབ་གྲྭ་ཁག་གི་ཆོས་དགེ་བཅས་ནས་རིམ་པས་༸གོང་ས་མཆོག་གིས་བཀའ་ཁྲིད་གནང་བ་གཞི་རྩ་བཟུང་སྟེ་བསྐྱར་བཤད་གནང་སྐབས་སློབ་ཕྲུག་ཁག་ནས་དོགས་འདྲི་ཞུས་པར་དགེ་བཤེས་རྣམ་པས་གསལ་བཤད་གནང་བ་སོགས་དགེ་མཚན་བླ་མེད་བྱུང་ཡོད་འདུག
ཐེངས་འདིའི་ནང་ཆོས་ངོ་སྤྲོད་དེའི་ཐོག་རྒྱལ་ཁབ་ཁག ༦ ནས་ཆོས་ཞུ་བ་བཅར་ཡོད་པ་དང་། དེ་མཚུངས་སེར་སྐྱ་མི་མང་བཅས་མི་གྲངས་ ༤༠༠༠ བརྒལ་བ་བཅས་བཅར་ཡོད་པ་བཅས།
