༢༠༠༩ ཕྱི་ཟླ་ ༦ ཚེས་ ༤ རེས་གཟའ་ཕུར་བུ།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག ༢༠༠༩ ཕྱི་ཟླ་ ༦ ཚེས་ ༢ ཉིན་ཨཡི་སི་ལན་ཌེའི་གྲོས་ཚོགས་ཀྱི་ཚོགས་གཙོ་མཆོག་དང་ཕྱི་དྲིལ་ལས་དོན་ཚོགས་ཆུང་གི་ཚོགས་མི་རྣམས་ནས་གདན་ཞུ་གནང་བ་བཞིན་གྲོས་ཚོགས་སུ་ཆིབས་སྒྱུར་བསྐྱངས་ཡོད་པ་རེད། སྐབས་དེར་གྲོས་ཚོགས་ཀྱི་ཚོགས་གཙོ་ལྕམ་སྐུ་ཨ་སེ་ཏཱ་ར་གན་དྷུར་ཇོ་ཧན་ནི་སེ་ཌོ་ཏྲི་ (Mrs Asta Ragnheidur Johannesdottir)མཆོག་ཕེབས་བསུར་བཅར་ཏེ་༸གོང་ས་མཆོག་གལ་ཆེན་མི་སྣའི་མཚན་བཀོད་དེབ་ཐེར་ཐོག་མཚན་འགོད་གནང་རྒྱུར་གདན་འདྲེན་ཞུས་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨཡི་སི་ལན་ཌེའི་གྲོས་ཚོགས་སུ་ཆིབས་སྒྱུར་སྐྱོང་སྐབས་གྲོས་ཚོགས་ཀྱི་ཚོགས་གཙོ་མཆོག་དང་ཕྱི་སྲིད་ལས་དོན་ཚོགས་ཆུང་གི་ཚོགས་མི་བཅས་ནས་ཕེབས་བསུ་ཞུ་བཞིན་པ།
དེ་རྗེས་༸གོང་ས་མཆོག་ནས་གྲོས་ཚོགས་སུ་ཆིབས་སྒྱུར་གྱིས་འཚམས་འདྲི་གནང་ཡོད་པ་དང་། ཨཡི་སི་ལན་ཌེའི་ཕྱི་སྲིད་ལས་དོན་ཚོགས་ཆུང་གི་ཚོགས་མི་རྣམས་ནས་ཕེབས་སྒུག་ཞུ་བཞིན་ཡོད་པ་བཞིན་མགོན་པོ་གང་ཉིད་དང་། ཨཡི་སི་ལན་ཌེའི་གྲོས་ཚོགས་ཀྱི་ཚོགས་གཙོ་མཆོག་དང་། ཕྱི་སྲིད་ལས་དོན་ཚོགས་ཆུང་གི་ཚོགས་མི་རྣམས་དང་ལྷན་དུ་ཆུ་ཚོད་གཅིག་ཙམ་རིང་མཇལ་མོལ་གནང་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཨཡི་སི་ལན་ཌེའི་གྲོས་ཚོགས་ཀྱི་གལ་ཆེ་མི་སྣའི་མཚན་བཀོད་དེབ་ཐེར་ཐོག་མཚན་འགོད་གནང་བཞིན་པ།
སྐབས་དེར་ཁོང་རྣམ་པས་བོད་དོན་དང་འབྲེལ་བའི་གནད་དོན་ཐད་ལ་དྲི་བ་མང་པོ་ཕུལ་བ་མ་ཟད། ཨཡི་སི་ལན་ཌེ་རྒྱལ་ཁབ་འདི་ནི་རང་དབང་དང་མང་གཙོའི་རྒྱལ་ཁབ་གཅིག་ཡིན་སྟབས་གང་འདྲ་བྱས་ཏེ་བོད་མིའི་རང་དབང་སླར་གསོ་ཡོང་རྒྱུར་རོགས་རམ་དགོས་སྐོར་ལ་བཀའ་དྲི་ཞུས་ཡོད་པ་རེད། སྐབས་དེར་༸གོང་ས་༸མཆོག་ནས་ཁོང་རྣམ་པས་བོད་ཀྱི་གནད་དོན་ཐད་བཅོས་མིན་ཐུགས་ཁུར་དང་ཐུགས་སྣང་གནང་བར་ཐུགས་དགྱེས་ཚོར་ཆེན་པོ་བྱུང་སྐོར་དང་རྗེས་སུ་ཡི་རང་ཞུ་གི་ཡོད། ཅེས་བཀའ་ལན་སྩལ་ཡོད། ཨཡི་སི་ལན་ཌེའི་གྲོས་ཚོགས་དེ་བཞིན་འཛམ་གླིང་འདིའི་རྒྱལ་ཁབ་ཁག་གི་གྲོས་ཚོགས་རྙིང་ཤོས་ཤིག་ཡིན་འདུག
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨཡི་སི་ལན་ཌེའི་གཙུག་ལག་སློབ་གཉེར་ཁང་གི་འགན་འཛིན། དེ་བཞིན་དམིགས་བསལ་སྐུ་མགྲོན་རྣམས་དང་མཇལ་མོལ་གནང་བཞིན་པ།
དེ་ཉིན་༸གོང་ས་༸སྐྱབས་མགོན་ཆེན་པོ་མཆོག་ནས་ཨཡི་སི་ལན་ཌེ་ཁུལ་གྱི་མི་མང་ ༣༠༠༠ བརྒལ་བར་བྱམས་བརྩེའི་རིན་ཐང་དང་བདེ་སྐྱིད་ཅེས་པའི་བརྗོད་གཞིའི་ཐོག་བླང་དོར་གྱི་བཀའ་སློབ་སྩལ་དོན། དོན་དམ་པར་བྱམས་བརྩེ་ནི་བདེ་སྐྱིད་ཀྱི་རྩ་བ་ཡིན་སྐོར་དང་། རང་གི་དགྲ་བོས་གཙོས་མི་གང་འདྲ་ཞིག་ཡིན་རུང་མི་ཞིག་དང་འགྲོ་བ་མིའི་ཁྱིམ་ཚང་ཆེན་པོ་འདིའི་ཆ་ཤས་ཤིག་ཡིན་པར་བསམས་ནས་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་དེ་དག་ལ་བསམ་ཤེས་དགོས་སྐོར་བཀའ་སྩལ་བ་མ་ཟད། མང་ཚོགས་ཀྱི་དྲི་བ་མང་དག་ཅིག་ཕུལ་ཡོད་པ་རྣམས་ལའང་བཀའ་ལན་སྩལ་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མི་མང་ལ་བཀའ་སློབ་སྩལ་གྲུབ་ནས་ཆིབས་སྒྱུར་སྐྱོང་བཞིན་པ།
ཡང་དེ་ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་ཨཡི་སི་ལན་ཌེའི་གཙུག་ལག་སློབ་གཉེར་ཁང་ཆེ་ཤོས་ཤིག་ལ་ཆིབས་སྒྱུར་བསྐྱངས་ཏེ་སློབ་གཉེར་ཁང་དེའི་དགེ་ལས་ཡོངས་ལ་བཀའ་སློབ་དང་། དེ་བཞིན་གཙུག་ལག་སློབ་གཉེར་ཁང་དེའི་མཁས་དབང་རྣམ་དང་ལྟ་གྲུབ་དང་ཀུན་སྤྱོད་ཅེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་ཞུས་པར་དབུ་བཞུགས་གནང་སྟེ་རྒྱུན་དུ་ཤེས་ཡོན་སབྱང་པ་དང་ལྷན་དུ་ནང་སེམས་ཀྱི་ཤེས་ཡོན་གོང་འཕེལ་གཏོང་རྒྱུ་དེ་ནི་གལ་ཆེ་ཡིན་སྐོར་ཐོག་བཀའ་སློབ་སྩལ་འདུག སྐབས་དེར་ཆེས་མཐོའི་གཙུག་ལག་སློབ་གཉེར་ཁང་དེའེི་དབུ་ལས་ཚང་མ་ཙམ་དུ་མ་ཟད། ཚན་རིག་དང་འཕྲུལ་འཁོར་བློན་ཆེན་དང་། ཨཡི་སི་ལན་ཌེའི་སྲིད་འཛིན་ཟུར་པ་ཡང་བཅར་ཡོད་པ་རེད། དྲི་བ་དྲིས་ལན་གྱི་སྐབས་༸གོང་ས་མཆོག་ནས་འདས་པའི་དུས་ལ་ཨཡི་སི་ལན་ཌེ་དང་བོད་གཉིས་དབར་ལ་འདྲ་མཚུངས་གཅིག་ཡོད་པ་ནི། བོད་ཀྱི་ས་ཁུལ་ཡོངས་རྫོགས་རིས་སྐོར་ཏེ་ཁེར་རྐྱང་དུ་གནས་ཡོད་པ་དང་། དེ་བཞིན་ཨཡི་སི་ལན་ཌེ་མཐའ་ཡོངས་རྫོགས་སུ་ཆུས་སྐོར་ཏེ་ཁེར་རྐྱང་དུ་གནས་ཡོད་པ་དེ་རེད། ཅེས་བཀའ་སློབ་སྩལ་ཡོད།
ཨཡི་སི་ལན་ཌེའི་མི་མང་རྣམས་ནས་དགའ་དད་སྤྲོ་གསུམ་གྱི་ངང་༸གོང་ས་མཆོག་ལ་ཕེབས་བསུ་ཞུ་བཞིན་པ།
བགྲོ་གླེང་གནང་ཡུལ་གྱི་ཚོགས་ཁང་དེ་ཡོངས་སུ་མིས་ཁེངས་ནས་མི་མང་པོ་ཞིག་ཤོང་མེད་སྟབས་སློབ་གཉེར་ཁང་དེས་རས་ཀྱི་ཡོལ་བ་ཆེན་པོའི་སྟེང་བརྙན་འཕྲིན་ལམ་ནས་བསྟན་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གཙུག་ལག་སློབ་གཉེར་ཁང་དེ་ནས་ཆིབས་ཞལ་བསྒྱུར་སྐབས་སློབ་གཉེར་ཁང་དེའི་ཕྱི་ནང་ཡོངས་སུ་གནས་པའི་མི་མང་ཁོང་རྣམས་ནས་དགའ་དད་སྤྲོ་གསུམ་གྱི་ངང་ཕེབས་སྐྱེལ་ཞུས་ཡོད་པ་རེད།
ཐེངས་འདིའི་ཆིབས་སྒྱུར་སྐབས་༸གོང་ས་མཆོག་ནས་ཁུལ་དེར་གནས་སྡོད་བོད་མི་དང་། སོག་པོ། བོད་དོན་རྒྱབ་སྐྱོར་བ་རྣམས་ལ་མཇལ་ཁ་དང་བཀའ་སློབ་སྩལ་ཡོད། དེ་བཞིན་བརྙན་འཕྲིན་བརྒྱུད་ལམ་གྱི་གསར་འགོད་པས་བཅའ་དྲི་དང་ལེན་གནང་བ་དང་། ཨཡི་སི་ལན་ཌེའི་ཁོར་ཡུག་དང་། འཕྲོད་བསྟེན། བཟོ་ལས་བཅས་ཀྱི་བློན་ཆེན། དེ་སྔ་པེ་ཅིང་དུ་རྒྱ་གཞུང་གི་དཔོན་རིགས་ཚོར་བོད་དོན་སྐོར་གླེང་སློང་གནང་མཁན་ཚོང་འབྲེལ་བློན་ཆེན་ཟུར་པ་བཅས་དང་མཇལ་མོལ་གནང་བ་བཅས་ཨཡི་སི་ལན་ཌེའི་མཛད་འཕྲིན་ཁག་ལེགས་པར་གྲུབ་རྗེས་ཕྱི་ཟླ་ ༦ ཚེས་ ༣ ཉིན་༸གོང་ས་༸སྐྱབས་མགོན་པོ་མཆོག་སྐུ་བཅར་དང་བཅས་ནི་ལྷར་ལནཌེ་སི་ (Netherlands) ཁུལ་དུ་ཆིབས་ཞལ་བསྒྱུར་ཡོད་པ་རེད།
ཐེངས་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨཡི་སི་ལན་ཌེར་ཆིབས་སྒྱུར་བསྐྱངས་དོན་གཙོ་བོ་ནི་ཨཡི་སི་ལན་ཌེའི་ཏཱ་ལའི་བླ་མའི་ཚོགས་པ་ཞེས་པ་དང་། ཨཡི་སི་ལན་ཌེའི་ཆོས་དཔོན་དང་གྲོས་ཚོགས་ཀྱི་ཚོགས་གཙོ་བཅས་ནས་གདན་ཞུ་གནང་བ་ཞིག་ཡིན་པ་དང་། ཨཡི་སི་ལན་ཌེར་ཆིབས་སྒྱུར་བསྐྱངས་ཐེངས་དང་པོ་དེ་ཆགས་ཀྱི་ཡོད་པའི་གནས་ཚུལ་དུ།།
