༢༠༠༩ ཕྱི་ཟླ་ ༦ ཚེས་ ༤ རེས་གཟའ་ལྷག་པ།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ༢༠༠༩ ཕྱིཟླ་ ༣ ཚེས་ ༡༡ ཉིན་ལྷ་ས་གྲོང་ཁྱེར་གྱི་འབྲེལ་ཡོད་ཁྲིམས་ཁང་ཞིག་ནས་སེར་ཤུལ་རྫོང་ཁོངས་(རྫ་ཆུ་ཁ་)དབོན་པོ་དགོན་པའི་དགེ་འདུན་པ་ཡིན་པ་ལྷ་སའི་སེ་ར་དགོན་དུ་ཟུར་ཞུགས་སློབ་གཉེར་གནང་མཁན་གྲས་གྲྭ་བློ་གྲོས་ལགས་སུ་དུས་བཀག་བཙོན་འཇུག་ལོ་ ༡༠ ཁྲིམས་ཐག་བཅད་པའི་གནས་ཚུལ་ཐོན་འདུག གནས་ཚུལ་དེའི་སྐོར་སྔ་ལོར་རྒྱ་ནག་གཞུང་འབྲེལ་ཀྲུང་གོའི་བོད་ལྗོངས་ཞེས་པའི་ ༢༠༠༨ ཕྱི་ཟླ་ ༣ དུས་དེབ་ཐོག་བློ་གྲོས་དང་རྗེས་འབྲངས་པ་ ༡༣ ནས་ལྷ་སའི་གཙུག་ལག་ཁང་གི་ཐང་ཆེན་དུ་རང་གི་བཟོས་པའི་ལོག་སྤྱོད་པའི་དར་ཆ་འཕྱར་ཏེ་དཔུང་སྡེབ་ཀྱིས་ཟིང་ཆ་བསླངས་སྟབས་སྤྱི་བདེ་ཉེན་རྟོག་པས་འཛིན་བཟུང་བྱས་པའི་ཉེས་འཛུགས་བྱས་ཡོད་པ་རེད། ལྷག་པར་དུ་ཁོང་གི་ཕ་དགའ་ཡས་ཀྱང་སྐབས་དེར་ཁོང་གི་གནས་ཚུལ་དང་འབྲེལ་ཏེ་བཀག་ཉར་བྱས་ཡོད་པ་མ་ཟད། དངུལ་ཆད་ཀྱང་བཏང་ཡོད་པའི་གནས་ཚུལ་ཐོན་འདུག
དེ་བཞིན་སྐབས་དེར་དབོན་པོ་དགོན་པའི་དགེ་འདུན་པ་དེ་དག་འཛིན་བཟུང་བྱས་རྗེས་སེར་ཤུལ་རྫོང་ཁོངས་ནས་ལྷ་སར་སྨན་བཅོས་སོགས་ཀྱི་ཆེད་ཡོང་བའི་དབོན་པོ་དགོན་པའི་ཨ་དྲེལ་རིན་པོ་ཆེ་སོགས་ ༢༠༠༨ ཕྱི་ཟླ་ ༣ ཚེས་ ༡༦ ཉིན་ལྷ་ས་གྲོང་ཁྱེར་སྤྱི་བདེ་ཚན་པས་འཛིན་བཟུང་བྱས་རྗེས་ལྷ་སའི་བྱང་ཕྱོགས་སུ་ཡོད་པའི་བཙོན་ཁང་ཞེས་པའི་མདུན་ངོས་ཀྱི་ལྷ་ས་གྲོང་ཁྱེར་བདེ་འཇགས་ཚན་པའི་ལྟ་སྲུང་ཁང་དུ་བཀག་ཉར་བྱས་ཏེ་ཁོང་རྣམས་དང་འབྲེལ་ཡོད་ཀྱི་མི་སྣ་མང་དག་ཞིག་འཛིན་བཟུང་བྱས་རྗེས་ད་བར་ཁོང་རྣམས་ལ་ཁྲིམས་ཐག་བཅད་ཡོད་མེད་དང་། གཟུགས་བབས་ཀྱི་གནས་སྟངས་སོགས་གནས་ཚུལ་གང་ཡང་ཐོས་རྒྱུ་མེད་པར་གྱུར་ཡོད་འདུག
