༢༠༠༩ ཕྱི་ཟླ་ ༦ ཚེས་ ༥ རེས་གཟའ་པ་སངས།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ༢༠༠༩ ཕྱི་ཟླ་ ༦ ཚེས་ ༣ ཉིན་སྐྱེ་རྒུ་མདོ་ཁུལ་རག་ཤུལ་ཤང་ཉེ་འདབས་གཟུ་མོ་གྲོང་སྡེའི་བོད་མི་ཁག་གཅིག་གིས་ཡུལ་ཤུལ་ཁུལ་སྲིད་གཞུང་གི་གཞུང་སྒོའི་མདུན་དུ་ཞི་བའི་ཐོག་ནས་ས་གནས་དེ་ནས་གཏེར་ཁ་སྔོག་རྒྱུར་མཚམས་འཇོག་བྱེད་དགོས་པའི་ངོ་རྒོལ་བྱས་པའི་གནས་ཚུལ་བྱུང་འདུག
ས་གནས་དེ་ནས་ལོ་མང་སྔོན་ནས་རྒྱ་ནག་གཞུང་གིས་ཆོག་མཆན་སྤྲད་པའི་འོག་རྒྱ་རིགས་གཏེར་ཁ་སྔོག་འདོན་ཚན་པས་ཞྭ་ཉེ་སྔོག་འདོན་བྱེད་བཞིན་ཡོད་པའི་ལས་གཞི་འདི་ལོ་ལྔའི་དུས་བཀག་ཟིན་པ་གཞིར་བཟུང་དུས་བཀག་གཙང་རྗེས་མང་ཚོགས་ཚོའི་ངོས་ནས་གཏེར་ཁ་བསྔོག་འདོན་བྱེད་རྒྱུ་མཚམས་འཇོག་ཡོང་ཐབས་སླད་ས་གནས་འབྲེལ་ཡོད་ཚན་པར་ཞུ་བསྐུལ་བྱས་ཡོད་ཀྱང་བདག་སྤྲོད་གང་ཡང་བྱས་མེད་པ་མ་ཟད། དེ་ལས་ལྡོག་སྟེ་མུ་མཐུད་གཏེར་ཁ་བསྔོག་རྒྱུའི་གནས་ཚུལ་ཐོན་འདུག ཉིན་དེ་རང་དུ་དྲག་ཆས་དམག་མི་བླུགས་པའི་རླངས་འཁོར་ཧ་ཅང་མང་པོ་ཞིག་ས་གནས་འདིར་འབྱོར་ཏེ་བོད་མི་བཅུ་ཙམ་འཛིན་བཟུང་བྱས་ཡོད་པ་དང་།
སླར་ཡང་ཉེན་རྟོག་ས་གནས་སུ་སླེབས་ཏེ་དམ་བསྒྲགས་བྱེད་བཞིན་ཡོད་པར་གཞིགས་ན། ད་ལྟའི་ཆར་ས་གནས་དེའི་ནང་ཡུལ་མི་ཚོས་གཏེར་ཁ་བསྔོག་རྒྱུར་ངོ་རྒོལ་ཤུགས་ཆེ་བྱུང་བ་དེས་ས་གནས་ཁྱོན་ཡོངས་སུ་དམ་བསྒྲགས་བྱེད་ཤུགས་ཆེ་རུ་བཏང་ཡོད་པ་ཧ་ཅང་གསལ་པོ་ཆགས་ཡོད། ཡིན་ནའང་མི་སྣ་སུ་དང་སུ་ཞིག་འཛིན་བཟུང་བྱས་ཡོད་པའི་གནས་ཚུལ་ད་བར་ཁ་གསལ་གང་ཡང་ཤེས་རྟོགས་བྱུང་མེད་པ་བཅས།།
