༢༠༠༩ ཕྱི་ཟླ་ ༦ ཚེས་ ༢༢ རེས་གཟའ་ཟླ་བ།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ཕྱི་ཟླ་ ༦ ཚེས་ ༢༠ ཉིན་མལ་དྲོ་གུང་དཀར་རྫོང་རྒྱ་མ་ཤང་ཁོངས་སུ་རྒྱ་རིགས་གཏེར་ཁ་འདོན་མཁན་དང་ས་གནས་མང་ཚོགས་དབར་གཏེར་ཁ་སྔོག་འདོན་བྱེད་ཕྱོགས་ཐད་འཁྲུག་རྩོད་ཤོར་ཏེ་མཐར་བོད་རིགས་མི་གསུམ་ལ་རྨས་སྐྱོན་ཚབས་ཆེ་ཕོག་ཡོད་པ་དང་། རྨས་སྐྱོན་ཕོག་པའི་ཁྲོད་ནས་མི་གཅིག་རྫོང་སྨན་ཁང་ནས་ཁས་ལེན་མ་བྱས་རྐྱེན་ལྷ་སར་སྨན་ཁང་དུ་ཁྲིད་དེ་ད་ལྟ་ཤི་གསོན་གང་ཡིན་ཁ་གསལ་ཤེས་རྟོགས་མེད་པར་གྱུར་ཡོད།
གནས་ཚུལ་དེའི་འབྱུང་རྐྱེན་གཙོ་བོ་ནི་རྒྱ་མ་ཤང་ཁོངས་ནས་རྒྱ་གཞུང་གིས་རྒྱ་རིགས་གཏེར་ཁ་འདོན་མཁན་ཁག་གཅིག་ལ་ ༡༩༩༠ ལོ་ཙམ་ནས་གཏེར་ཁ་སྔོག་འདོན་བྱེད་དུ་བཅུག་ཡོད། ཉེ་ཆར་ཤང་དེར་རྒྱ་མ་ཤིང་ཆུ་ཞེས་པའི་ཆུ་ཞིག་ཡོད་པ་དེའང་གཏེར་ཁ་འདོན་ཡུལ་དུ་ཁ་བསྒྱུར་རྐྱེན་ས་གནས་མང་ཚོགས་ལ་ཞིང་ཆུ་གཏོང་རྒྱུར་དཀའ་ངལ་ཇེ་མང་ཞིག་འཕྲད་པར་བརྟེན་དེའི་ཐད་འབྲེལ་ཡོད་ཚན་པར་ཞུ་རྩོད་བྱས་ཀྱང་བདག་སྤྲོད་བྱེད་མཁན་མེད་སྟབས་མཐར་འདི་ལོ་ཕྱི་ཟླ་ ༦ ཚེས་ ༢༠ ཉིན་མང་ཚོགས་དང་རྒྱ་རིགས་གཏེར་ཁ་འདོན་མཁན་དབར་འཁྲུག་རྩོད་བྱུང་ཡོད་པ་རེད།
འཁྲུག་རྩོད་ཤུགས་ཆེ་བྱུང་རྗེས་རྒྱ་མ་ཤང་ཁོངས་སུ་རུ་ཁག་བཅོ་ལྔ་ཡོད་པའི་ཁོངས་ནས་འབྲོག་པ་རུ་ཁག་གཉིས་ཕུད་ཞིང་པ་རུ་ཁག་བཅུ་གསུམ་ནས་ཁྱིམ་ཚང་རེ་ནས་མི་རེའམ་མི་གཉིས་གསུམ་ཙམ་ཤང་མི་དམངས་སྲིད་གཞུང་གི་ལས་ཁུངས་མདུན་འཛོམས་ཏེ་ངོ་རྒོལ་སྐད་འབོད་བྱས་པར་བརྟེན་ཚེས་ ༢༡ ཞོགས་དྲོ་ལྷ་ས་ནས་རང་སྐྱོང་ལྗོངས་དཔོན་རིགས་ཁག་གཅིག་དང་། རྫོང་དཔོན་དང་ལས་བྱེད། དམག་མི་ཁག་གཅིག་བཅས་ཡོང་སྟེ་མང་ཚོགས་རྣམས་ཚོགས་འདུར་སྐོང་སྟེ་ཕན་ཚུན་གསལ་བཤད་བྱེད་སྐབས་མང་ཚོགས་ཁག་གཅིག་ནས་ངུ་བ་དང་ཁག་གཅིག་ནས་གཏེར་ཁ་འདོན་རྒྱུ་མཚམས་འཇོག་བྱེད་དགོས་པའི་སྐད་འབོད་བྱས་ཡོད་འདུག ད་ལྟ་བར་གཏེར་ཁ་སྔོག་འདོན་བྱས་རྐྱེན་ཡུལ་མིའི་འཐུང་ཆུ་འབག་བཙོག་ཆགས་ཏེ་སྒོ་ཕྱུགས་སེམས་ཅན་ཆིག་སྟོང་ལྷག་ཤི་བ་དང་། དེ་བཞིན་རི་དྭགས་བསད་པ་གྲངས་ལས་འདས་པ། རྩ་ཆུ་སྐམ་འགྲོ་བ་སོགས་གནས་ཚུལ་འདྲ་མིན་ཐོན་ཡོད་ཀྱང་། རྒྱ་གཞུང་ནས་བདག་སྤྲོད་རྩ་བ་ནས་བྱས་མེད་པ་མ་ཟད་དེ་ལས་ལྡོག་སྟེ་སྐྱོན་འཛུགས་ཀྱང་བྱས་ཡོད།
མཐའ་དོན་མང་ཚོགས་ངོས་ནས་གལ་སྲིད་གཏེར་ཁ་མུ་མཐུད་སྔོག་ཚེ་ང་ཚོ་ས་གནས་འདི་ནས་སྤོས་འགྲོ་རྒྱུ་ཡིན་སྐོར་འགྲེལ་བརྗོད་བྱས་པ་དང་། གལ་ཏེ་ང་ཚོ་སྤོ་རུ་མ་བཅུག་པར་མུ་མཐུད་གནས་སྡོད་བྱ་དགོས་ཚེ་རྒྱ་མི་གཏེར་ཁ་སྔོག་འདོན་བྱེད་མཁན་གཅིག་ཀྱང་ས་གནས་འདིར་བཞག་རྒྱུ་མིན་པ་སོགས་ཕན་ཚུན་ཞི་བའི་ཐོག་ནས་བཤད་རེས་བྱས་པར་བརྟེན་དམག་མི་རྣམས་འཕྲལ་དུ་ཕྱིར་འཐེན་བྱས་པ་དང་འབྲེལ་རྒྱ་མ་ཤང་ཁོངས་སུ་ཡོད་པའི་རྒྱ་རིགས་གཏེར་ཁ་སྔོག་འདོན་བྱེད་མཁན་སོགས་ཀྱི་ཕྱི་ཚེས་ ༢༡ དགོང་དྲོ་རླངས་འཁོར་ཁྲིད་དེ་ས་གནས་ནས་རྡོག་ཐོན་བྱས་འདུག་ཀྱང་། ཕྱི་ཚེས་ ༢༢ སྔ་དྲོ་མང་ཚོགས་ནས་མུ་མཐུད་ཤང་མི་དམངས་སྲིད་གཞུང་སྒོ་འགྲམ་སུ་ཉལ་ཏེ་དགོས་འདུན་མུ་མཐུད་འདོན་བཞིན་ཡོད་པ་རེད།
རྒྱ་མ་ཤང་ཁོངས་སུ་གཏེར་ཁ་སྔོག་འདོན་བྱེད་བཞིན་པར་བརྟེན་ ༡༩༩༢ ལོར་མང་ཚོགས་ངོས་ནས་འདོད་མོས་མེད་པའི་རྣམ་འགྱུར་ཤུགས་ཆེ་བསྟན་པ་ཙམ་དུ་མ་ཟད། སྐབས་དེར་ཚོགས་འདུའི་ཐོག་མང་ཚོགས་ཁག་གཅིག་ནས་སྐད་འབོད་བྱས་རྐྱེན་དུས་ཡུན་ལོ་ ༡༥ ཙམ་གྱི་ཁྲིམས་ཐག་བཅད་མྱོང་ཡོད་འདུག སླར་ཡང་རྒྱ་གཞུང་ནས་རྒྱ་མ་ཤང་ཁོངས་ནས་གཏེར་ཁ་སྔོག་འདོན་བྱེད་རྒྱུར་ལོ་ངོ་བཅུ་ལྷག་གོང་ནས་ངོ་རྒོལ་གྱི་རྣམ་འགྱུར་ཤུགས་ཆེ་བསྟན་ཡོད་མིན་ལ་མ་ལྟོས་པར་རྒྱ་ནག་གཞུང་ཕྱོགས་ནས་ལོ་རེར་རྒྱ་རིགས་ཧ་ཅང་མང་པོ་ས་གནས་དེར་གནས་སྤོ་བྱེད་ཤུགས་ཆེ་རུ་བཏང་ཡོད་པ་མ་ཟད། ཕྱི་ལོ་ ༢༠༠༩ ཕྱི་ཟླ་ ༡ དང་ཕྱི་ཟླ་ ༣ པའི་ནང་ས་གནས་དེའི་མང་ཚོགས་ཀྱི་ས་ཞིང་རྒྱ་གཞུང་ནས་ཡར་བསྡུས་བྱས་ཏེ་ལོ་ན་རྒན་པ་ཚོར་ཟླ་རེ་འཚོ་སྡོད་སྒོར་ ༨༠༠ མཁོ་སྤྲོད་དང་། གཞོན་སྐྱེས་རྣམས་གཏེར་ཁ་སྔོག་འདོན་བྱ་ཡུལ་དུ་སྡུག་ལས་བྱེད་པར་ཕྱིན་ཚེ་ཉིན་རེར་སྒོར་ ༥༠ རེ་སྤྲད་དེ་ཁྱིམ་ཚང་གི་ཡོང་འབབ་འཕར་རྒྱུའི་ལས་གཞི་ལག་བསྟར་བྱེད་རྩིས་བྱས་པར་ལམ་ལྷོངས་བྱུང་མེད་པ་དང་། མང་ཚོགས་ནས་མལ་དྲོ་ཀ་ཚལ་ཞེས་པའི་ས་གནས་སུ་འགྲམ་ཐང་ཞིག་ཡོད་ས་དེར་སྤོ་རྒྱུའི་འཆར་གཞི་བཀོད་པ་སོགས་སྔ་རྗེས་ཐབས་ལམ་སྣ་ཚོགས་སྤྱད་དེ་མལ་དྲོ་རྒྱ་མ་ཁུལ་གྱི་གཏེར་ཁ་འདོན་ཡུལ་གྱི་ལས་གཞི་རྒྱ་བསྐྱེད་བྱ་རྒྱུར་རྒྱ་ནག་གཞུང་གིས་ས་གནས་མང་ཚོགས་ཀྱི་དགོས་མཁོ་དང་མི་འཚམས་པའི་བྱ་ཐབས་སྣ་ཚོགས་ལག་བསྟར་བྱས་རྐྱེན་མང་ཚོགས་རྣམས་འུ་ཐུག་ཐབས་ཟད་ཀྱི་གནས་སུ་གྱར་ཏེ་ངོ་རྒོལ་མ་བྱེད་ཐབས་མེད་ཀྱི་གནས་སུ་ལྷུང་བ་བཅས་ཀྱི་གནས་བསྡུས་སུ།
