༢༠༠༩ ཕྱི་ཟླ་ ༦ ཚེས་ ༨ རེས་གཟའ་ཟླ་བ།
བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་འགན་འཛིན་བསྟན་འཛིན་ནོར་བུ་ལགས་ནས་འཛམ་གླིང་སྤྱིའི་ཁོར་ཡུག་གནས་སྟངས་ཐོག་གཏམ་བཤད་གནང་བཞིན་པ།
༄༅། །ལོ་ལྟར་བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པས་འཛམ་གླིང་ཁོར་ཡུག་ཉིན་མོ་སྲུང་བརྩི་ཞུ་མུས་ལྟར། འདི་ལོའི་འཛམ་གླིང་ཁོར་ཡུག་ཉིན་མོའི་དུས་ཚེས་དང་སྟབས་བསྟུན་ཏེ་སའི་གོ་ལ་ཆེན་པོ་འདིར་ང་ཚོ་དགོས་མཁོ་ལྡན་ཡོད། ང་ཚོས་གཅིག་སྒྲིལ་གྱིས་གནམ་གཤིས་འགྱུར་ལྡོག་ལ་གདོང་ལེན་བྱེད་དགོས། ཞེས་པའི་བརྗོད་གཞི་གཙོ་བཟུང་ཐོག་ ༢༠༠༩ ཕྱི་ཟླ་ ༦ ཚེས་ ༥ ཉིན་སྔ་དྲོའི་ཆུ་ཚོད་ ༩།༣༠ ཐོག་གངས་སྐྱིད་ལས་བྱེད་གསོལ་མགྲོན་ཁང་གི་ཡང་སྟེང་ཚོགས་ཁང་དུ་སྲུང་བརྩི་ཞུས་ཡོད་པ་རེད།
བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་ལས་བྱེད་ཆོས་སྐྱིད་ལགས་ནས་བོད་ནང་གི་ཉམས་རྒུད་འགྲོ་བཞིན་པའི་རྩ་ཐང་དང་འབྲོག་པའི་གནས་སྟངས་སྐོར་ལ་གཏམ་བཤད་གནང་བཞིན་པ།
ཉིན་འདིར་བཀའ་བློན་དང་ལྷན་ཁང་ཁག་གི་དྲུང་ཆེ་ཆུང་གི་གཙོས་སྲི་ཞུའི་ལས་བྱེད་རྣམ་པ་ལྷན་འཛོམས་གནང་རྗེས་ཕྱི་དྲིལ་ཁོར་ཡུག་ཚན་པའི་འགན་འཛིན་བསྟན་འཛིན་ནོར་བུ་ལགས་ནས་གསུང་གསལ། སྤང་ལྗོངས་དང་རྩ་ཐང་རྒྱུན་གནས་མི་ཐུབ་པའི་རྒྱུ་མཚན་ནི། འཛམ་གླིང་གི་ཚ་དྲོད་འཕེལ་རྐྱེན་ཡིན་སྐོར་འགྲེལ་བརྗོད་བྱས་པ་དང་།
བོད་ནང་རྒྱ་ནག་གཞུང་གི་རི་ལིའི་ལྕགས་ལམ་བརྒྱ་ཆ་ ༧༠ ཙམ་ཞིག་གཏན་འཁྱགས་སྟེང་བཟོ་བསྐྲུན་བྱས་རྐྱེན་གཏན་འཁྱགས་ཀྱི་དྲོད་གྲང་མི་སྙོམས་པའི་དབང་གིས་རྩ་ཐང་གི་ས་བཅུད་མི་འདང་སྟབས་རྩ་ཐང་གང་སར་བརྡིབས་ཏེ་བེད་མེད་དུ་འགྲོ་ཚུལ། དེ་བཞིན་རྒྱ་ནག་གཞུང་གིས་བོད་ནང་གཏེར་ཁ་སྔོག་འདོན་བྱེད་སྐབས་ས་ཊོན་ ༡༢༥ བྲུས་ཁོངས་གཏེར་ཁ་ཊོན་ ༡ ལས་བེད་སྤྱོད་མེད་སྟབས་ས་བྲུས་པའི་སྙིགས་རོ་གང་སར་གཡུག་རྐྱེན་རྩ་ཐང་དང་སྤང་ལྗོངས་སོགས་ཉེ་གནས་ཁོར་ཡུག་བེད་མེད་དུ་འགྲོ་ཚུལ་སོགས་འགྲེལ་བརྗོད་གནང་རྗེས་ཁོར་ཡུག་ཚན་པའི་ལས་བྱེད་ཆོས་སྐྱིད་ལགས་ནས་རྒྱ་ནག་གཞུང་གི་འབྲོག་སའི་རྩ་ཐང་དང་རི་མགོ་སོགས་ལ་ལྕགས་སྐུད་ཀྱི་རྭ་བ་བསྐོར་རྐྱེན་བདག་མེད་ཀྱི་སེམས་ཅན་མང་པོ་ཞིག་ལྕགས་སྐུད་ཀྱི་དྲ་བའི་ནང་ཚུད་ནས་ཤི་སྟེ་སྟོང་འགྲོ་བ་དང་།
དེ་མཚུངས་འབྲོག་པ་མང་པོ་ཞིག་དཔལ་འབྱོར་གྱི་མཐུན་རྐྱེན་གང་ཡང་མེད་སའི་ས་ཁུལ་དུ་གནས་སྤོ་བྱེད་དུ་བཅུག་སྟེ་ཁོང་ཚོ་འབྲོག་ལས་མ་གཏོགས་གང་ཅིའི་བྱ་བར་རྒྱུས་མངའ་མེད་རྐྱེན་འབྲོག་པ་མང་པོ་ཞིག་ལས་མེད་ཀྱི་འཚོ་བ་སྐྱེལ་དུ་འཇུག་གི་ཡོད་ཚུལ་སོགས་འགྲེལ་བརྗོད་རྒྱས་པ་གནང་ཡོད་པ་བཅས།།
