༢༠༠༩ ཕྱི་ཟླ་ ༦ ཚེས་ ༩ རེས་གཟའ་མིག་དམར།

བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་ ༢༠༠༩ ཕྱི་ཟླ་ ༦ ཚེས་ ༥ ཉིན་རྒྱབ་རྡ་ས་ནས་པ་ཀོཊ་བརྒྱུད་ལྡི་ལིར་ཕེབས་ཏེ་ཚེས་ ༦ དང་ ༧ ཉིན་གྲངས་གཉིས་རིང་ལྡི་ལིར་རྒྱ་གར་གནད་ཡོད་མི་སྣ་ཁག་གཅིག་དང་ཐུག་འཕྲད་གནང་རྗེས་བོད་མི་མང་སྤྱི་འཐུས་ཚོགས་གཞོན་མཆོག་དང་། སྤྱི་འཐུས་ངག་དབང་ལྷ་མོ་ལགས། སྤྱི་འཐུས་ཚེ་བརྟན་ནོར་བུ་ལགས། སྤྱི་འཐུས་རྒྱུན་ལས་རྒྱལ་རོང་ཟླ་བ་ཚེ་རིང་ལགས་བཅས་ཚེས་ ༨ ཕྱི་དྲོ་ལྡི་ལི་ནས་མཁའ་ལམ་བརྒྱུད་དབྱིན་ཡུལ་དུ་ཕེབས་ཏེ་ཚེས་ ༡༣ བར་དབྱིན་ཡུལ་དུ་ (Tibet Society UK) ནས་དབྱིན་ཡུལ་གྲོས་ཚོགས་ཀྱི་འཐུས་མི་དང་བོད་མི་མང་སྤྱི་འཐུས་དབར་མཐུན་འབྲེལ་གྱི་ལས་གཞི་ (Exchange Programme) ལས་འཆར་ཐོག་མཉམ་ཞུགས་གནང་རྒྱུ་དང་། དེ་ནས་ཚེས་ ༡༤ ཉིན་དབྱིན་ཡུལ་ཁུལ་གནས་བོད་མི་རྣམས་དང་ལྷན་འཛོམས་གནང་རྗེས་ཚེས་ ༡༥ སྔ་དྲོ་དབྱིན་ཡུལ་ནས་སྦར་སིལ་དུ་ཕེབས་ཐོན་གྱིས་ཕྱི་དྲོ་སྦར་སིལ་ཁུལ་གནས་བོད་མི་རྣམས་དང་ལྷན་འཛོམས་གནང་རྒྱུ་ཡིན་འདུག ཚེས་ ༡༦ ནས་ ༡༨ བར་ཉིན་གྲངས་ ༢ རིང་ (ICT Europe) ནས་གོ་སྒྲིག་ཞུས་པའི་གལ་ཆེའི་མི་སྣ་ཁག་དང་མཇལ་འཕྲད་གནང་རྒྱུ་ཡིན་འདུག ཚེས་ ༡༩ སྔ་དྲོ་སྦར་སིལ་ནས་དབྱིན་ཡུལ་བརྒྱུད་ལྡི་ལིར་ཕེབས་འབྱོར་གྱིས་ཚེས་ ༢༡ ཉིན་བོད་མི་མང་སྤྱི་འཐུས་ཚོགས་གཞོན་མཆོག་བཞུགས་སྒར་དུ་ཕེབས་འབྱོར་གནང་རྒྱུ་ཡིན་པ་བཅས་ཀྱི་གནས་བསྡུས་སུ།