༢༠༠༩ ཕྱི་ཟླ་ ༦ ཚེས་ ༤ རེས་གཟའ་ལྷག་པ།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ༢༠༠༩ ཕྱི་ཟླ་ ༤ པའི་ནང་དཀར་མཛེས་ས་ཁུལ་སྤྱི་བདེ་འབྲེལ་ཡོད་ཚན་པས་སྔ་ལོ་ཟླ་ ༣ ཚེས་ ༡༨ ཉིན་དཀར་མཛེས་རྫོང་ཐོག་ཏུ་ཞི་རྒོལ་ནང་མཉམ་ཞུགས་གནང་མཁན་བསྟན་པ། རང་ལོ་ ༣༠ ཙམ་དང་། འཇམ་རྡོ། རང་ལོ་ ༢༥ ཙམ་ཡིན་པ། ཕ་མིང་བྱམས་དགའ་ཟེར་བའི་སྤུན་མཆེད་རྒན་གཞོན་གཉིས་སྐྱེ་རྒུ་མདོ་ཁུལ་ནས་འཛིན་བཟུང་བྱས་པའི་གནས་ཚུལ་ཐོན་འདུག སྔ་ལོ་ཕྱི་ཟླ་ ༣ ཚེས་ ༡༨ ཉིན་དཀར་མཛེས་རྫོང་ཐོག་ཏུ་བོད་མི་བཅོ་ལྔས་སྣེ་ཁྲིད་འོག་ཞི་བའི་སྐད་འབོད་བྱེད་སྐབས་མཉམ་ཞུགས་གནང་མཁན་གོང་གསལ་བོད་མི་གཉིས་པོ་དུས་ཡུན་ལོ་གཅིག་ཙམ་རིང་རི་མགོ་སོགས་གང་སར་གབ་ཡིབ་ཀྱིས་ཉེན་གཡོལ་དུ་གནས་ཡོད་ཀྱང་། ཉེ་དུས་ཕྱི་ཟླ་ ༤ པའི་ནང་དཀར་མཛེས་ས་ཁུལ་སྤྱི་བདེ་འབྲེལ་ཡོད་ཚན་པས་གློ་བུར་འཛིན་བཟུང་བྱས་ཡོད་པའི་གནས་ཚུལ་ཐོན་འདུག ཁོང་གཉིས་འཛིན་བྱས་རྗེས་ད་ལྟའི་ཆར་ས་གནས་གང་ཞིག་ཏུ་བཀག་ཉར་བྱེད་བཞིན་ཡོད་མེད་སོགས་ཀྱི་ཞིབ་ཕྲའི་གནས་ཚུལ་ཁ་གསལ་གང་ཡང་མི་འདུག
