༢༠༠༩ ཕྱི་ཟླ་ ༦ ཚེས་ ༣ རེས་གཟའ་ལྷག་པ།
གནས་ཆུང་ཆོས་རྒྱལ་ཆེན་པོས་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ལ་བཀའ་ལུང་གནང་བཞིན་པ།
༄༅། །དཔལ་ལྡན་བོད་གཞུང་བཀའ་ཤག་ནས་ཇི་ལྟར་གསོལ་འདེབས་ཞུས་པ་བཞིན། བོད་རྒྱལ་ལོ་ ༢༡༣༦ རབ་བྱུང་ ༡༧ ས་གླང་ལོའི་ས་ཟླའི་ཚེས་ ༡༡ དང་། ༢༠༠༩ ཕྱི་ཟླ་ ༦ ཚེས་ ༣ སྔ་དྲོའི་ཆུ་ཚོད་ ༧།༠༠ ཐོག་རང་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་སྲི་ཞུ་བའི་ལས་བྱེད་ཆེ་འབྲིང་ཆུང་གསུམ་གདན་འཛོམས་གནང་རྗེས་གནས་ཆུང་རྡོ་རྗེ་སྒྲ་དབྱངས་གླིང་གྲྭ་ཚང་དུ་དཀར་ཕྱོགས་སྐྱོང་བའི་བསྟན་སྲུང་སྤྲུལ་པའི་ཆོས་སྐྱོང་ཆེན་པོ་རྡོ་རྗེ་གྲགས་མཐུ་རྩལ་ཆེན་པོའི་འཕྲིན་ལས་ནམ་ཡང་དབྱེར་མེད་ཐོག་གངས་ཅན་པ་ཡོངས་ཀྱི་མགོན་སྐྱབས་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པ་སྡེ་དཔལ་བཟང་པོ་མཆོག་གི་སྐུའི་གསང་བ་གསུམ་ལ་བགེགས་རིགས་ཀྱི་མཚན་མ་ཕྲ་མོས་ཀྱང་མ་རེག་པར་བསྟན་པ་དང་འགྲོ་བ་སྤྱིའི་དོན་དུ་མཛད་འཕྲིན་གོ་ལའི་ཁྱོན་དུ་ཁྱབ་པ་དང་། ཡང་སྒོས་བོད་ཁ་བའི་ལྗོངས་སུ་བདེ་སྐྱིད་ཀྱི་ཉི་མ་མྱུར་དུ་འཆར་བ་སོགས་བསྟན་སྲུང་ཆོས་སྐྱོང་ཆེན་པོའི་གདོང་འགྲོགས་ཟབ་མོའི་སྔར་བཅོས་ལེགས་པའི་གཏང་རག་དང་། ཕྱིས་བྱུང་བསྟན་སྲུང་ཆེན་པོ་གང་ཉིད་ནས་གྲུབ་པའི་དབང་ཕྱུག་མཚོ་སྐྱེས་རྡོ་རྗེ་དང་། ཕྱག་ན་པདྨོ་སྐུ་ཕྲེང་རིམ་འབྱོན་གྱིས་བྱེད་པོར་ཉེར་དུ་གཏད་དེ་དམ་བཅས་པ་སོགས་རྣམ་བཞིའི་འཕྲིན་ལས་ཐོགས་མེད་དུ་བསྒྲུབ་པའི་ཐུགས་རྗེ་བསྐུལ་ཕྱིར་ཡེ་ཤེས་སེམས་དཔའི་རྟེན་གཙོར་གཞུང་འབྲེལ་དབྱར་གསོལ་སྤྱན་འདྲེན་ཞུས་པ་བཞིན་བཙན་བྱོལ་བོད་གཞུང་གི་བཀའ་བློན་ཁྲི་པས་དབུས་གཞུང་འཛིན་གྱིས་མཛད་གཙོ་རྣམ་པ་བཅས་ནས་མཇལ་ཕྱག་ཞུས་རྗེས་རིམ་པས་སྲི་ཞུའི་ལས་བྱེད་དང་སེར་སྐྱ་མི་མང་བཅས་ལ་མཇལ་ཕྱག་གནང་ཡོད་པ་རེད།
འདི་ལོའི་གཞུང་འབྲེལ་གྱི་དབྱར་གསོལ་་ཐོག་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན། སྤྱི་འཐུས་རྒྱུན་ལས། ལྷན་ཁང་སོ་སོའི་དྲུང་ཆེ་ཆུང་གཙོས་སྲི་ཞུའི་ལས་བྱེད་རྣམ་པ་དང་། མང་ཚོགས་བཅས་ནས་སྔར་སྲོལ་བཞིན་བོད་ལུགས་ཀྱི་གཟབ་མཆོར་བཞེས་ཏེ་བཅར་ཡོད་པ་བཅས་ཀྱི་གནས་བསྡུས་སུ།།
