༢༠༠༩ ཕྱི་ཟླ་ ༦ ཚེས་ ༡༡ རེས་གཟའ་ཕུར་བུ།
༄༅། །འདི་ལས་ཁུངས་སུ་མུ་མཐུད་གནས་ཚུལ་འབྱོར་བར་གཞིགས་ན། ཁམས་འཇོ་མདའ་རྫོང་ཁོངས་སུ་ཕྱི་ཟླ་ ༥ པའི་ཟླ་མཇུག་ཏུ་ས་ཞིང་འདེབས་ལས་མི་བྱེད་པའི་ངོ་རྒོལ་བྱུང་རིང་འཇོ་མདའ་རྫོང་ཁྲེན་ཀང་གྲོང་ཁུལ་དུ་འབྲེལ་ཡོད་ལས་བྱེད་པས་རྒྱན་དཀྲུགས་ཀྱིས་ས་ཞིང་འདེབས་ལས་བྱེད་དགོས་པའི་བཙན་བཀའ་གཏོང་སྐབས་མང་ཚོགས་གིས་དང་ལེན་མ་བྱས་རྐྱེན་རྒྱ་གཞུང་ནས་དམག་མི་བཏང་སྟེ་དྲག་གནོན་བྱས་ཏེ་བོད་མི་ཚེ་རིང་ལ་མེ་མདའ་ཕོག་པ་དང་། དཔའ་དགའ་དང་ལྷ་དར་གཉིས་ལ་ལྕགས་དབྱུག་གཞུས་ཏེ་རྨས་སྐྱོན་ཚབས་ཆེ་ཕོག་སྟེ་རྒྱ་དམག་གིས་བཙན་ཁྲིད་བྱས་ཡོད། བསམ་དགའི་ཁ་ནང་དུ་མེ་མདའ་བཙུགས་ནས་ཉེས་རྡུང་བཏང་རྗེས་འཆི་གསོན་གང་ཡིན་ཤེས་རྟོགས་མེད་པར་གྱུར་ཡོད་པ་དང་། ངོ་རྒོལ་བྱེད་མཁན་བོད་མི་ཕལ་ཆེ་བ་འཛིན་བཟུང་བྱེད་སྐབས་ཝ་ར་དགོན་དང་། འཇོ་ཕུ་དགོན་པའི་ལས་སྣེ་དང་བོད་མི་བསམ་ཡོད་ཁག་གཅིག་ནས་བར་འདུམ་བྱས་རྗེས་བསོད་ནམས་དཔལ་མོ་(བསོད་དཔལ་)དང་། བློ་བཟང་དཔལ་ལྡན། ཡེ་ཤེས་རྡོ་རྗེ་གསུམ་བྱེད་གཏེའི་གྲས་སུ་བརྩིས་ཏེ་བཀག་ཉར་བྱས་ཡོད་འདུག་པ་ལས་གཞན་རྣམས་གློད་བཀྲོལ་བཏང་བའི་གནས་ཚུལ་ཐོན་འདུག གཞན་ཡང་ས་གནས་དེའི་སྟག་གཟིག་སྟོད་སྨད་གཉིས་དང་། ལྷོ་སྟོད་མ་ཞེས་པའི་ས་གནས་སུ་ས་ཞིང་འདེབས་ལས་བྱས་ཡོད་ཀྱང་བདག་གཅེས་མ་བྱས་པར་བེད་མེད་དུ་འགྲོ་བཞིན་ཡོད་པའི་གནས་ཚུལ་ཐོན་འདུག
དེ་མིན་ཟླ་ཤས་སྔོན་ནས་རྫོང་དེའི་ཁོངས་ཀྱི་སྐུ་སེ་དགོན་དང་། ཅ་ཅེ་དགོན། དགོན་གསར་དགོན། གཏེར་སྟོན་དགོན། གདེང་ཕུ་དགོན། གྲུམ་རུམ་དགོན། དཔལ་ཆེན་དགོན། རྒྱུ་ནེ་དགོན་བཅས་སུ་རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་སྤེལ་སྐབས་དགེ་འདུན་པས་དང་ལེན་བྱེད་ཐབས་མེད་རྐྱེན་དགེ་འདུན་པ་རྣམས་དགོན་པར་གནས་མི་ཐུབ་པར་དགོན་པ་སྟོང་པ་ཆགས་ཉེན་ཡོད་མུས་དང་། རྒྱུ་ནེ་དགོན་དུ་མཚན་མོ་དམག་མིས་བསྐོར་ཏེ་གྲྭ་ཤག་སྔོག་བཤེར་བྱེད་རིང་དགོན་པར་རྒྱུན་བཞུགས་སྒྲུབ་བླ་ ༨ ཡོད་པ་རྣམས་ལ་གཅར་རྡུང་ཕོག་ཡོད། དེ་མཚུངས་དཔལ་ཆེན་དགོན་གྱི་སྒྲུབ་བླ་རྣམས་ལའང་གཅར་རྡུང་ཕོག་པའི་གནས་ཚུལ་ཐོན་འདུག
