༢༠༠༩ ཕྱི་ཟླ་ ༦ ཚེས་ ༨ རེས་གཟའ་ཟླ་བ།

༄༅། །བོད་མིའི་ཆོས་སྲིད་གཉིས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ ༢༠༠༩ ཕྱི་ཟླ་ ༦ ཚེས་ ༧ རེས་གཟའ་ཉི་མའི་ཉིན་ཕ་རན་སིའི་རྒྱལ་ས་པ་རི་སེའི་གྲོང་ཁྱེར་སྤྱི་ཁྱབ་པས་རྒྱ་ནག་གཞུང་ནས་གནོན་ཤུགས་སྤྲོད་མིན་ལ་མ་ལྟོས་པར་གཞུང་འབྲེལ་གྱིས་གདན་ཞུས་དང་སྦྲགས་ཆེས་མཐོའི་མི་སེར་གྱི་ཕྱག་འཁྱེར་འབུལ་བཞེས་གནང་ཡོད་པ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་པཱརི་སེའི་གྲོང་ཁྱེར་སྤྱི་ཁྱབ་ནས་ཆེས་མཐོའི་མི་སེར་གྱི་ཕྱག་འཁྱེར་འབུལ་བཞིན་པ།

དེ་ཡང་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གྲོང་ཁྱེར་སྤྱི་ཁྱབ་ལས་ཁང་དུ་ཆེས་བསྟོད་ཆེན་པོའི་ཐོག་ནས་གདན་ཞུ་གནང་བ་བཞིན་ཆིབས་སྒྱུར་བསྐྱངས་སྐབས་གྲོང་ཁྱེར་པཱ་རི་སེའི་སྤྱི་ཁྱབ་པ་སྐུ་ཞབས་བར་ཊོ་རན་ཌེ་ཌི་ལ་ནོའི་ (Bertrand Delanoe) མཆོག་ཕེབས་བསུར་བཅར་ནས་སྐར་མ་ ༢༠ ཙམ་གྱི་རིང་མཇལ་མོལ་གནང་སྟེ་གྲོང་ཁྱེར་སྤྱི་ཁྱབ་པས་༸གོང་ས་མཆོག་ལ་ཆེས་མཐོའི་མི་སེར་གྱི་ཕྱག་འཁྱེར་འདི་འབུལ་རྒྱུའི་ཐག་གཅོད་བྱས་ཡོད། དེ་ནི་༸གོང་ས་མཆོག་ནས་འཛམ་གླིང་ཞི་བདེ་དང་། རང་དབང་། འགྲོ་བ་མིའི་ཐོབ་ཐང་། ལྷག་དོན་དུ་༸གོང་ས་མཆོག་ནས་འཚེ་མེད་ཞི་བའི་ཐོག་ནས་བོད་རྒྱ་གཉིས་ཕན་གྱི་ཐོག་ལ་ད་བར་སྐུ་ངལ་འཛད་མེད་སྐྱོན་ཡོད་པར་ངོས་འཛིན་དང་རྒྱབ་སྐྱོར་ཞུ་སླད་ཆེས་བསྟོད་འདི་འབུལ་ལམ་ཞུ་གི་ཡོད། ཅེས་དང་ལྷག་པར་དུ་ཁོང་གིས། ཕྱག་འཁྱེར་འདི་འབུལ་བཞེས་ཀྱི་གནད་དོན་འདིའི་ཐད་རྒྱ་ནག་གཞུང་ནས་གནོན་ཤུགས་ཤུགས་ཆེ་སྤྲད་ཀྱང་འགྱུར་བ་གང་ཡང་གཏང་མེད། སྤྱིར་རྒྱ་ནག་གཞུང་དང་འབྲེལ་ལམ་དེ་གལ་ཆེན་པོ་ཡིན་རུང་གཞི་རྩའི་ལངས་ཕྱོགས་འགའ་ཞིག་ཐད་ལ་འགྱུར་བ་གཏོང་ཐབས་མེད་པ་ཞིག་རེད། ཅེས་འགྲེལ་བརྗོད་ཁ་གསལ་གནང་ཡོད་པ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་པཱ་རི་སེའི་གྲོང་ཁྱེར་སྤྱི་ཁྱབ་མཆོག་ལ་མཇལ་དར་གནང་བཞིན་པ།

སྐབས་དེར་༸གོང་ས་མཆོག་གི་སྐུ་ཕྱྭའི་སླད་སྐུ་སྲུང་བ་ཤུགས་ཆེ་བཞག་ཡོད་པ་དང་གལ་ཆེའི་མི་སྣ་ཁག་མ་གཏོགས་གསར་འགོད་པ་སོགས་གང་བྱུང་ནང་དུ་འགྲོ་མི་ཆོག་པའི་དམ་བསྒྲགས་ཤུགས་ཆེ་བྱས་ཡོད་འདུག

ཆེས་མཐོའི་མི་སེར་གྱི་ཕྱག་འཁྱེར་འབུལ་བཞེས་ཀྱི་མཛད་སྒོའི་ཐོག་༸གོང་ས་མཆོག་ནས། འགྲོ་བ་མིའི་རིན་ཐང་དང་། ཞི་བདེ། འཚེ་མེད་ཞི་བ། དྲང་བདེན་བཅས་ཧ་ཅང་གལ་གནད་ཆེན་པོ་ཡིན་སྐོར་དང་། མགོན་པོ་གང་ཉིད་འགྲོ་བ་མི་ཞིག་ཡིན་པའི་ཆ་ནས་ག་དུས་ཡིན་རུང་འགྲོ་བ་མིའི་གཞི་རྩའི་རིན་ཐང་གོང་འཕེལ་གཏོང་རྒྱུར་འབད་བརྩོན་གནང་བཞིན་ཡོད་པ་དང་། ནང་པ་ཞིག་ཡིན་པའི་ཆ་ནས་ཆོས་ལུགས་ཕན་ཚུན་མཐུན་སྒྲིལ་དང་། མཉམ་རུབ་ཀྱི་ཐོག་ནས་ཆོས་ལུགས་དེ་དག་གི་བསླབ་བྱ་གཞི་ལ་བཞག་སྟེ་འགྲོ་བ་མིའི་རིགས་ལ་ཕན་ཐོགས་ཡོང་ཐུབ་པར་འབད་བརྩོན་གནང་གི་ཡོད། བྱེད་ལས་དེ་དག་ལ་གྲོང་ཁྱེར་སྤྱི་ཁྱབ་མཆོག་ནས་ངོས་འཛིན་གནང་བར་ཐུགས་དགྱེས་ཚོར་ཆེན་པོ་བྱུང་། ལྷག་དོན་དུ་ ༢༠༠༨ ཕྱི་ཟླ་ ༣ ནས་བཟུང་བོད་ནང་གི་བོད་མི་ཚོ་དཀའ་སྡུག་མང་པོ་མྱངས་ནས་ད་ལྟ་ཛ་དྲག་གི་གནས་སྟངས་འོག་གནས་པའི་སྐབས་འདིར་དེ་དག་ལ་ངོས་འཛིན་ལ་རྒྱབ་སྐྱོར་ཤུགས་ཆེ་གནང་བའི་ཐོག་ཕྱག་འཁྱེར་འདི་གནང་བར་ངོས་ཀྱིས་བོད་མི་ས་ཡ་དྲུག་གི་ཚབ་ཞུས་ཏེ་ཐུགས་རྗེ་ཆེ་ཞེས་ཞུ་རྒྱུ་ཡིན། ཞེས་དང་ཡང་༸གོང་ས་མཆོག་གིས། དེ་སྔ་མགོན་པོ་གང་ཉིད་ལ་ནོ་བེལ་ཞི་བའིེ་གཟེངས་རྟགས་གནང་སྐབས་རྒྱ་ནག་ནང་གི་རྒྱ་མི་ཤེས་ཡོན་ཅན་བསམ་བློ་དྲང་ལྡན་དང་། མིའི་རིན་ཐང་གལ་ཆེར་བརྩིས་མཁན་གྱི་རྒྱ་རིགས་མང་པོ་ཞིག་ནས་ནོ་བེལ་ཞི་བདེའི་གཟེངས་རྟགས་ཕུལ་བར་དགའ་པོ་ཞེ་དྲག་བྱུང་ཡོད་པ་རེད། དེར་བརྟེན་རྒྱ་ནག་ནང་མགོན་པོ་གང་ཉིད་ཀྱི་ཐུགས་བཞེད་དང་། བོད་རྒྱའི་གནས་ཚུལ་ཚ་ཆང་ཤེས་མཁན་གྱི་རྒྱ་རིགས་མང་པོ་ཞིག་དགའ་སྤྲོ་ཡོང་ངེས་རེད། དེ་དག་ཚང་མའི་ཚབ་ཞུས་ནས་ཐུགས་རྗེ་ཆེ་ཞུ་གི་ཡོད། ཅེས་བཀའ་སྩལ་ཡོད།།