༢༠༠༩ ཕྱི་ཟླ་ ༥ ཚེས་ ༧ རེས་གཟའ་ཕུར་བུ།
༄༅། །ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་དཔལ་ས་སྐྱའི་ཆོས་ཚོགས་ཀྱི་ངེས་སྟོན་པ་དང་ཝིག་རམ་ཤཱི་ལ་རྨང་འཛུགས་གནང་མཁན་བླ་མ་པདྨ་དབང་གྲགས་ལགས་ལ་ཨ་རིའི་(National Ethics Coalition of Organization Foundation,Ins.)ཞེས་པའི་ཚོགས་པས་ཨི་ལིསེ་མཚོ་གླིང་གི་ཆེ་བསྟོད་གཟེངས་རྟགས་(Ellis Island Medal of Honor Award)ཞེས་པ་ཞིག་འབུལ་ལམ་ཞུ་འཆར་ཡོད་འདུག ཨི་ལིསེ་མཚོ་གླིང་གི་ཆེ་བསྟོད་ཀྱི་གཟེངས་རྟགས་དེ་བཞིན་ལོ་ལྟར་ལོ་རྒྱུས་ཀྱི་དོན་སྙིང་ལྡན་པའི་ཨི་ལིསེ་མཚོ་གླིང་དེའི་ཐོག་ཕུལ་སྲོལ་ཡོད་པ་ཞིག་དང་། དེ་ཡང་གང་ཟག་སུ་ཞིག་གིས་སྤྱི་ཚོགས་ནང་ཞབས་འདེགས་ཞུས་པ་ཙམ་མ་ཟད་མི་མང་ལ་ཕན་བདེ་སྐྲུན་ཐུབ་མཁན་འདེམས་ཐོན་བྱུང་བ་ཞིག་ལ་གཟེངས་རྟགས་དེ་འབུལ་སྲོལ་ཡོད་འདུག
བླ་མ་པདྨ་དབང་གྲགས་ལགས།
ཐེངས་འདིར་བླ་མ་པདྨ་དབང་གྲགས་ལགས་ལ་གཟེངས་རྟགས་འབུལ་རྒྱུ་ཐུགས་གཏན་འཁེལ་ཡོད་པ་དང་། དེ་ཡང་ཁོང་གིས་ནིའུ་ཡོག་གྲོང་ཁྱེར་ཁུལ་གྱི་མི་མང་རྣམས་ལ་ཞི་བདེ་དང་བཟོད་བསྲན་བཅས་ཀྱི་ཐོག་ལ་ལམ་སྟོན་ཟབ་མོ་གནང་རྐྱེན་དེའི་ཁུལ་གྱི་མི་མང་རྣམས་ལ་ཕན་རླབས་ཤུགས་ཆེ་བྱུང་བར་ཆེ་བསྟོད་ཞུ་སླད་འདེམས་ཐོན་བྱུང་བ་ཞིག་ཡིན་འདུག བྱ་དགའ་འབུལ་བཞེས་ཀྱི་མཛད་སྒོ་ནི་ ༢༠༠༩ ཕྱི་ཟླ་ ༥ ཚེས་ ༩ རེས་གཟའ་སྤེན་པའི་དགོང་དྲོའི་ཆུ་ཚོད་ ༦།༠༠ ཐོག་ཨི་ལིསེ་མཚོ་གླིང་དུ་སྐོང་ཚོགས་གནང་རྒྱུ་དང་མཛད་སྒོ་གྲུབ་རྗེས་ཨི་ལིསེ་མཚོ་གླིང་གི་ག་རེཌེ་ཚོགས་ཁང་དུ་དགོང་དྲོའི་གསོལ་སྟོན་གཟབ་རྒྱས་ཤིག་ཀྱང་བཤམ་རྒྱུ་ཡིན་འདུག
བླ་མ་པདྨ་དབང་གྲགས་ལགས་ཀྱི་སྐུ་ཚེའི་ལོ་རྒྱུས་སྙིང་བསྡུས།
བླ་མ་པདྨ་དབང་གྲགས་ལགས་ནི་ཕྱི་ལོ་ ༡༩༥༤ ལོར་སྟོད་སྤུ་ཧྲེང་དུ་སྐུ་འཁྲུངས་ཤིང་། ཕྱི་ལོ་ ༡༩༥༩ ལོར་བཙན་བྱོལ་དུ་འབྱོར་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་གཞིས་ཆགས། ཁོང་གི་ཁྱིིམ་དུ་ཕྲུ་གུ་ལྔ་ཡོད་པ་ནས་གསོན་པོར་གནས་པ་ཁོ་རང་གཅིག་པུ་ཡིན་འདུག ཁོང་དགུང་ལོ་བདུན་གྱི་སྐབས་རབ་ཏུ་བྱུང་ནས་ས་སྐྱ་ཁྲེི་འཛིན་རིན་པོ་ཆེ་དང་དེ་མིན་བླ་ཆེན་ཁག་གི་དྲུང་ནས་ནང་ཆོས་ཐོས་བསམ་གནང་། ཝར་ཎ་བོད་ཀྱི་མཐོ་སློབ་ཁང་དུ་སློབ་སྦྱོང་མཐར་ཕྱིན་གནང་སྟེ་ཕྱི་ལོ་ ༡༩༨༠ ལོར་སློབ་དཔོན་གྱི་མཚན་ཐོག་ནས་སློབ་ཐོན་གནང་། ཕྱི་ལོ་ ༡༩༨༢ ལོར་ས་སྐྱ་ཁྲི་འཛིན་རིན་པོ་ཆེ་མཆོག་ནས་ས་སྐྱ་སློབ་གྲྭ་ནས་ཁོ་རང་ཨ་རིར་བོད་རིགས་གཞོན་སྐྱེས་རྣམས་ཀྱི་དགེ་རྒན་གནང་བར་བཏང་གནང་མཛད། བོད་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་། ཤེས་ཡོན་བཅས་ཀྱི་དགོས་དོན་ལ་གཟིགས་ནས་སྐུ་ཉིད་ནས་ཕྱི་ལོ་ ༡༩༨༩ ལོར་ཝིག་རམ་ཤཱི་ལ་བསྟི་གནས་ཁང་གསར་འཛུགས་གནང་བ་དང་ཕྱིས་སུ་བསྟི་གནས་ཁང་དེ་ནིའུ་ཡོག་དང་ནིའུ་ཇར་སིའི་ནང་ཁྱབ་འཕེལ་ཕྱིན་ཡོད། བསྟི་གནས་ཁང་དེ་དག་ནས་བོད་ཀྱི་ནང་ཆོས་དང་སྒོམ་གྲུབ་ཚུལ་སོགས་སློབ་ཁྲིད་གནང་གི་ཡོད། བླ་མ་པདྨ་དབང་གྲགས་ལགས་ནས་ལོང་བ་ཚོའི་ཆེད་འབུར་ཡིག་གསར་བཏོད་གནང་བ་དང་། བལ་ཡུལ་སྤོག་ར་གཞིས་ཆགས་སུ་པདྨ་ཚལ་དགོན་སྡེའི་སློབ་གཉེར་ཁང་དང་། མོན་གྷོ་འདོད་རྒུ་གླིང་དུ་པདྨ་ཚལ་སློབ་གྲྭ་གསར་འཛུགས་གནང་ཡོད། འདས་པའི་ལོ་ངོ་ ༢༠ ནང་ཁོང་ནས་ནུབ་ཕྱོགས་ཡུལ་གྲུ་ཁག་གི་སློབ་ཕྲུག་རྣམས་ལ་སློབ་སྟོན་གནང་བ་མ་ཟད་ས་ཕྱོགས་གང་སར་ཕེབས་ནས་བོད་ཀྱི་ནང་ཆོས་དར་སྤེལ་བཏང་གནང་ཡོད། ཁོང་གི་བྱང་ཆུབ་པའི་དབྱིན་སྐད་དང་། ཁྱད་དུ་འཕགས་པའི་རྣམ་དཔྱོད། བྱམས་བརྩེའི་ཐུགས་ཀྱིས་རྐྱེན་པས་དེང་དུས་ཀྱི་སྤྱི་ཚོགས་ནང་སྙན་གྲགས་ཅན་གྱི་མི་སྣ་ཞིག་ཆགས་ཡོད།།
