༢༠༠༩ ཕྱི་ཟླ་ ༥ ཚེས་ ༢༢ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་སྐལ་བཟང་རྒྱལ་མཚན་མཆོག་ནས་ཉི་ཧོང་གི་རྒྱལ་ས་ཊོཀ་ཁྱོ་དུ་ ༢༠༠༩ ཕྱི་ཟླ་ ༥ ཚེས་ ༢༠ རེས་གཟའ་ལྷག་པའི་ཉིན་གསར་འགོད་ལྷན་ཚོགས་ཤིག་གི་ཐོག་གསུང་དོན། ང་ཚོའི་ངོས་ནས་རྒྱ་ནག་གི་འགོ་ཁྲིད་ཚོ་དང་ལྷན་དུ་འབྲེལ་མོལ་བྱ་རྒྱུར་གྲ་སྒྲིག་ཡོད། ང་ཚོས་བོད་མི་མང་ལ་རང་སྲིད་རང་སྐྱོང་གི་ཐོབ་ཐང་ཞིག་རྩོད་ཀྱི་ཡོད། ༸གོང་ས་༸སྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་གིས་བོད་རང་བཙན་དང་བོད་རྒྱ་ནག་ནས་ཁ་བྲལ་གཏོང་རྒྱུའི་འཐབ་རྩོད་གནང་གི་མེད། ཅེས་གསུངས་ཡོད།
དམིགས་བསལ་སྐུ་ཚབ་སྐལ་བཟང་རྒྱལ་མཚན་མཆོག་ནས་གསར་འགོད་ལྷན་ཚོགས་ཐོག་གཏམ་བཤད་གནང་བཞིན་པ།
ལྷག་པར་དུ་ཁོང་གིས་བོད་མི་མང་ལ་རང་སྲིད་རང་སྐྱོང་གི་ཐོབ་ཐང་ཞིག་ཐོབ་ཚེ་རང་གི་ཕ་ཡུལ་ནང་བོད་ཀྱི་ཐུན་མོང་མ་ཡིན་པའི་ཆོས་དང་། རིག་གཞུང་། བོད་མི་རིགས་ཀྱི་ངོ་བོ་བཅས་རྒྱུན་འཛིན་བྱེད་ཐུབ་ཀྱི་རེད་ཅེས་གསུངས་ཡོད། ཡང་ཁོང་གིས་སྔ་ལོ་ཕྱི་ཟླ་ ༣ ཚེས་ ༡༠ ནས་བཟུང་བོད་ཀྱི་ས་ཁུལ་ཡོངས་སུ་རྫོགས་པར་མདོ་དབུས་ཁམ་གསུམ་གྱི་གཞིས་ལུས་མི་མང་རྣམས་ནས་རྒྱ་ནག་གི་དབང་བསྒྱུར་ལ་ཞི་བའི་སྒེར་ལངས་བྱས་པར། རྒྱ་ནག་གཞུང་གིས་བོད་མི་ཞི་རྒོལ་བ་རྣམས་ལ་འཕྲལ་དུ་དྲག་གནོན་བྱས་པ་མ་ཟད་བོད་མི་ཁག་གཅིག་ལ་སྲོག་ཁྲིམས་དང་། ཚེ་བཙོན། ལོ་ངོ་བཅུ་ཕྲག་གཉིས་ཡས་མས་བཙོན་འཇུག་གི་ཁྲིམས་ཐག་བཅད་པ་དང་། བོད་མི་སྟོང་ཕྲག་མང་པོར་ཁྲིམས་ཞིབ་མ་བྱས་པར་བཙོན་འཇུག་བྱས་ཡོད། ད་ལོའི་གསུམ་བཅུའི་དུས་དྲན་གྱི་གསུང་འཕྲིན་ནང་༸གོང་ས་༸སྐྱབས་མགོན་ཆེན་པོ་མཆོག་ནས་བོད་པ་ཚོ་དམྱལ་བ་མི་ཡུལ་དུ་མྱོང་བཞིན་ཡོད། ཅེས་བཀའ་སློབ་ཀྱང་གནང་ཡོད་ཅེས་གསུངས་ཡོད།
གསར་འགོད་པས་བོད་རྒྱ་འབྲེལ་མོལ་ཐེངས་བརྒྱད་པའི་སྐོར་ལ་དྲི་བ་ཞུས་པར་ཁོང་གིས། བོད་རྒྱ་འབྲེལ་མོལ་ཐེངས་བརྒྱད་པའི་སྐབས་༸གོང་ས་མཆོག་གི་སྐུ་ཚབ་རྣམ་པས་རྒྱ་ནག་གཞུང་ལ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཞིག་ཕུལ་ཡོད་པ་དེའི་ནང་རྒྱ་ནག་གི་རྩ་ཁྲིམས་ནང་འཁོད་ཡོད་པའི་ཐོབ་ཐང་དེ་བོད་པ་ཚོར་སྤྲོད་དགོས། ཞེས་ནན་བརྗོད་བྱས་ཡོད་པ་ལས་ང་ཚོས་རྒྱ་ནག་གི་རྩ་ཁྲིམས་ནང་འཁོད་མེད་པའི་ཐོབ་ཐང་ཞིག་བོད་པ་ཚོར་སྤྲོད་དགོས། ཞེས་བརྗོད་ཀྱི་མེད་ཅེས་དང་ཡང་ཁོང་གིས། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་གྲངས་ཉུང་མི་རིགས་ལ་ཐོབ་ཐང་ཡོད། ཅེས་བཤད་ཡོད་པ་དེ་ནི་བོད་ལྟ་བུའི་གྲངས་ཉུང་མི་རིགས་ལ་གོ་དགོས་པ་ཡིན། སྐུ་ཚབ་རྣམ་པས་རྒྱ་ནག་གཞུང་ལ་སྤྲད་པའི་བསམ་ཤོག་དེར་རྒྱ་གཞུང་གི་དབང་འཛིན་པ་ཚོས་བོད་རྒྱ་དཀའ་རྙོག་སེལ་རྒྱུའི་ཐབས་ལམ་གཞན་ཞིག་འཚོལ་རྒྱུའི་ཚབ་ཏུ་མཐའ་གཅིག་ཏུ་དགག་པ་རྒྱག་གི་ཡོད། ཅེས་སོགས་གསར་འགོད་གསལ་བསྒྲགས་གནང་བ་བཅས།།
