༢༠༠༩ ཕྱི་ཟླ་ ༥ ཚེས་ ༨ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༠༩ ཟླ་ ༥ ཚེས་ ༥ ཉིན་གྱི་སྔ་དྲོ་ཨ་རིའི་གྲོང་ཁྱེར་ནིའུ་ཡོཀ་དང་ནིའུ་ཇར་སིའི་མངའ་ཁུལ་དུ་གནས་པའི་ཧི་མ་ལ་ཡའི་རི་རྒྱུད་ནས་ཡིན་པའི་གནད་ཡོད་མི་སྣ་ཁག་གཅིག་དང་དེ་སྔ་ཕྱི་ལོ་ ༡༩༥༩ སྔོན་བོད་ནང་ཕེབས་མྱོང་བའི་ཕྱི་རྒྱལ་གནད་ཡོད་མི་སྣ་ཁག་གཅིག་དང་མཇལ་འཕྲད་མཛད་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་ཧི་མ་ལ་ཡའི་རི་རྒྱུད་ནས་ཡིན་པ་ཤར་པ་དང་རྟ་མང་། དེ་བཞིན་ཡོལ་མོ་སོགས་དང་། འབྲུག་པ། སོག་རིགས། བོད་རིགས་སོགས་ཁྱོན་མི་གྲངས་ ༡༠༠ བརྒལ་བ་ཞིག་ལ་མཇལ་འཕྲད་མཛད་སྐབས་ཤར་པའི་སྐུ་ཚབ་བསོད་ནམས་ལགས་ཀྱིས། ང་ཚོ་ཤར་པའི་ངོས་ནས་ནིའུ་ཡོཀ་ནང་བཅའ་བཞུགས་བོད་ཀྱི་སྐུ་ཚབ་དོན་གཅོད་ཁང་དང་འབྲེལ་བ་ཞུས་ཏེེ་བོད་ཀྱི་ཐུན་མོང་མིན་པའི་རིག་གཞུང་དང་ནང་ཆོས་སོགས་འཕེལ་རྒྱལ་གཏོང་རྒྱུའི་ལས་དོན་ཁག་གི་ཐོག་གོ་བསྡུར་ཞུ་བཞིན་ཡོད། ཅེས་སོགས་ལྷན་ཚོགས་དེར་སྙན་སྒྲོན་ཞུས་ཡོད། ལྷན་འཛོམས་དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་མཇལ་བཅར་བ་རྣམས་ལ་དོན་ཚན་གསུམ་གྱི་ཐོག་བཀའ་སློབ་སྩལ་ཡོད།
དེ་ཡང་དོན་ཚན་དང་པོ་ནི། འགྲོ་བ་མིའི་རིགས་ཀྱི་དཀའ་ངལ་སེལ་ཐབས་བྱེད་རྒྱུ་དེ་ནི་ཕྱིའི་དཔལ་འབྱོར་ཁོ་ནས་དཀའ་ངལ་སེལ་ཐུབ་རྒྱུ་མིན་པར་ནང་སེམས་ཀྱི་བྱམས་སྙིང་རྗེའི་ཐོག་ནས་དཀའ་ངལ་སེལ་དགོས་ཀྱི་ཡོད་པ་བཀའ་སྩལ་ཡོད། དོན་ཚན་གཉིས་པ་ནི། ཧི་མ་ལ་ཡའི་རི་རྒྱུད་ཀྱི་མི་མང་ཚོས་བོད་པའི་ནང་ཆོས་ཐོག་དོ་སྣང་སླར་སྐྱེས་གནང་བར་བསྔགས་བརྗོད་མཛད་ཡོད། དོན་ཚན་གསུམ་པ་ནི། བོད་པའི་ནང་ཆོས་དངོས་སུ་གསལ་པོ་ཤེས་འདོད་ཡོད་པ་ཡིན་ན་བོད་ཀྱི་སྐད་ཡིག་ཡག་པོ་ཤེས་ཐུབ་པ་གནང་དགོས་རྒྱུ་གལ་ཆེན་པོ་ཡིན་ལུགས་སོགས་དོན་ཚན་གསུམ་གྱི་ཐོག་བཀའ་སློབ་ཟབ་མོ་སྩལ་ཡོད།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་དེ་སྔ་ཕྱི་ལོ་ ༡༩༥༩ སྔོན་བོད་ནང་ཕེབས་མཁན་ཨ་མི་རི་ཁ་དང་ཁེ་ན་ཌའི་མི་སྣ་ཁག་གཅིག་ལ་མཇལ་འཕྲད་མཛད་དེ། ཁོང་རྣམས་ལ་བཀའ་སློབ་ཕེབས་དོན། ཕྱི་ལོ་ ༡༩༥༩ སྔོན་གྱི་བོད་ནང་གི་གནས་སྟངས་གང་འདྲ་ཞིག་ཡོད་མེད་ཀྱི་གནས་ཚུལ་ཐོག་དཔང་རྟགས་གནང་མཁན་ཁྱེད་རྣམ་ཆགས་ཡོད་ལ་ངོས་ཀྱང་གཅིག་ཡིན། ཞེས་སོགས་ཀྱི་བཀའ་སློབ་ལྷུག་པོར་སྩལ་གནང་། དེ་བཞིན་༸གོང་ས་མཆོག་ནས་དེར་བཅར་ཏེ་མཇལ་ཁ་ཞུ་མཁན་གྱི་མི་སྣ་ཚོས་དྲི་བ་ཕུལ་བར་བཀའ་ལན་མཛད་ཡོད་པ་དང་སྦྲགས་དེང་སྐབས་བོད་རྒྱའི་འབྲེལ་བའི་གནས་སྟངས་སྐོར་ཡང་གསལ་སྟོན་གནང་ཡོད་པ་རེད།།
