༢༠༠༩ ཕྱི་ཟླ་ ༥ ཚེས་ ༥ རེས་གཟའ་མིག་དམར།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ ༢༠༠༩ ཕྱི་ཟླ་ ༥ ཚེས་ ༡ ཉིན་གྱི་སྔ་དྲོ་ཧར་ཝར་ཌེ་གཙུག་ལག་སློབ་གཉེར་ཁང་གི་སྨན་པའི་སློབ་གྲྭ་ (Harvard Medical School) དང་ཀེམ་བེ་རེ་ཇི་གཙུག་ལག་སློབ་གཉེར་ཁང་གི་འཕྲོད་བསྟེན་ཕྱོགས་སྒྲིལ་(Cambridge Health Alliance)ཞེས་པ་གཉིས་ཐུན་མོང་ནས་གོ་སྒྲིག་ཞུས་པའི་བཞུགས་མོལ་བཀའ་བསྡུར་ཁག་གཅིག་ནང་ལྷན་བཞུགས་མཛད་ཡོད་པ་དང་། དེ་ཉིན་ཕྱེད་ཡོལ༸གོང་ས་མཆོག་གི་བཞུགས་གནས་ཆལ་ལི་སེ་(Charles)མགྲོན་ཁང་དུ་ཆུ་ཚོད་ ༢ ལྷག་ཙམ་རིང་བོད་རྒྱ་གཉིས་དབར་གྱི་བསམ་ཚུལ་མི་འདྲ་བ་རྣམས་བརྗེ་ལེན་བྱེད་ཆེད་ལྷན་ཚོགས་ཤིག་ཏུ་དབུ་བཞུགས་མཛད་དེ་རྒྱ་རིགས་མཁས་དབང་ཁག་དང་། སློབ་ཕྲུག དེ་བཞིན་ཕྱི་རྒྱལ་བ་བཅས་ལ་བོད་རྒྱའི་གནད་དོན་ཐད་མགོན་པོ་གང་ཉིད་ཀྱི་དགོངས་ཚུལ་རྣམས་མཐིལ་ཕྱིན་པ་ངོ་སྤྲོད་མཛད་པ་མ་ཟད། དེ་དག་གི་ཐད་རྒྱ་ཕྱོགས་ནས་དོགས་པ་རྣམ་རྟོག་ཡོད་པ་རྣམས་སེལ་སླད་ཁོང་རྣམས་ལ་དྲི་བ་ཞུ་རྒྱུའི་གོ་སྐབས་ཀྱང་སྩལ་ཡོད།
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་བོད་རྒྱ་གཉིེས་དབར་གྱི་བསམ་ཚུལ་འདྲ་མིན་སྦས་གསང་མེད་པར་གྲོས་མོལ་ལྷུག་པོ་ཡོང་སླད་ཕྱོགས་གཉིས་ཀས་སྒྲ་འཇུག་སོགས་གང་ཡང་བེད་སྤྱོད་བྱ་རྒྱུ་མེད་པའི་ལམ་སྟོན་གནང་ཡོད་པ་དང་། མགོན་པོ་གང་ཉིད་ཀྱི་ངོས་ནས་བོད་རྒྱ་གཉིས་དབར་གྱི་དཀའ་རྙོག་དེ་སེལ་ཆེད་ཕྱི་ལོ་ ༡༩༧༤ ནས་བཟུང་གྲོས་མོལ་གྱི་ཐབས་ལམ་ཞིག་དགོངས་བཞེས་གནང་བ་དང་དེེའི་ཐད་ད་བར་ཕྱོགས་གཉིས་ཀྱི་སྐུ་ཚབ་མཇལ་འཕྲད་གནང་ཡོད་པ་དང་། དེའི་ཐོག་འཕྲད་པའི་དཀའ་ངལ་རྣམས་ཞིབ་ཕྲ་འགྲེལ་བརྗོད་མཛད་ཡོད་པ་མ་ཟད། སྔ་ལོ་བོད་ནང་དུ་ཞི་རྒོལ་ཆེན་པོ་བྱུང་བའི་རྗེས་རྒྱ་ནག་གཞུང་གིས་འཁྱོག་བཤད་ཀྱི་དྲིལ་བསྒྲགས་ལ་བརྟེན་ནས་རྒྱ་ནག་མི་མང་གི་ཁྲོད་བོད་མིར་འཁོན་འཛིན་ཤུགས་ཆེ་བྱུང་ཡོད་པ་དང་། དེ་དག་སེལ་སླད་༸གོང་ས་མཆོག་ནས་བོད་རིགས་རྣམས་ལ་རྒྱ་རིགས་དང་མཛའ་མཐུན་གྱི་འབྲེལ་བ་བསྐྲུན་པའི་ཐོག་ནས་དོགས་སེལ་བྱེད་དགོས་པའི་ལམ་སྟོན་གནང་གི་ཡོད་སྐོར་ཡང་བཀའ་གནང་ཡོད།
མགོན་པོ་གང་ཉིད་ནས་ད་དུང་འདས་པའི་ལོ་ངོ་ ༦༠ ནང་རྒྱ་ནག་དམར་པོའི་གཞུང་ལ་འགྱུར་བ་གང་འདྲ་ཕྱིན་ཡོད་མེད་དང་། རྒྱ་ནག་འཛམ་གླིང་ནང་གི་སྟོབས་ཆེན་རྒྱལ་ཁབ་གཅིག་ཆགས་འགྱུར་ཆ་རྐྱེན་གང་ཞིག་ཚང་མེད་པ་བཅས་ཀྱི་ཐོག་ལ་ངོ་སྤྲོད་གནང་བ་དང་འབྲེལ། རྒྱ་ནག་གཞུང་ནས་མི་མང་ཁྲོད་ཡིད་ཆེས་བསྐྲུན་དགོས་པ་དང་། དེ་ནི་འཇིགས་སྣང་དང་དངངས་འཚབ་ནང་བསྐྲུན་ཐུབ་ཐབས་མེད་སྐོར། དེ་ལས་ལྡོག་སྟེ་འཇིགས་སྣང་གིས་ཡིད་ཆེས་མེད་པ་བཟོ་གི་ཡོད་པ་བཅས་ཀྱི་བཀའ་སྩལ་ཡོད། དེར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གིས། རྒྱ་ནག་གི་སྲིད་འཛིན་ཧུའུ་ཅིང་ཐའོ་ནས་འཆམ་མཐུན་གྱི་སྤྱི་ཚོགས་ཡོང་རྒྱུའི་དམིགས་ཡུལ་བཟང་པོ་ཞིག་འཛིན་བཞིན་ཡོད་པ་ལྟར་དེར་རྒྱ་རིགས་མི་མང་ནས་ཞབས་འདེགས་གང་ཐུབ་བསྒྲུབ་དགོས་པའི་ལམ་སྟོན་ཡང་གནང་ཡོད།
དེ་རྗེས་༸གོང་ས་མཆོག་ནས་རྒྱ་རིགས་ཀྱི་མཁས་དབང་རྣམས་དང་སློབ་མ་རྣམས་ལ་དྲི་བ་ཕུལ་རྒྱུའི་གོ་སྐབས་གནང་བར་མང་ཆེ་བས་བོད་ཀྱི་རང་སྲིད་རང་སྐྱོང་ཐོག་ལ་དྲི་བ་ཕུལ་ཡོད་པ་དང་། ཁག་གཅིག་གིས། བོད་པའི་ཕྱོགས་ནས་བོད་མི་གནས་ཡུལ་ས་ཁུལ་ཡོངས་རྫོགས་ནས་འཐབ་རྩོད་བྱ་རྒྱུའི་ཚབ་ཏུ་བོད་ཀྱི་ཆོས་དང་རིག་གཞུང་སྲུང་སྐྱོབ་བྱ་རྒྱུ་དང་། ༸གོང་ས་མཆོག་ལ་མཚན་སྨད་ཞུ་བཞིན་ཡོད་པ་མཚམས་འཇོག་ཡོང་སླད་འབད་བརྩོན་གནང་ན་བཟང་བ་ཡོད་པའི་བསམ་ཚུལ་བརྗོད་ཡོད་པ་མ་ཟད། ཡང་ཁག་གཅིག་ནས་སྔ་ལོ་རང་ཉིད་བོད་ནང་བསྐྱོད་སྐབས་བོད་ནང་འཛུགས་བསྐྲུན་སོགས་ཆ་རྐྱེན་བཟང་པོའི་འོག་བདེ་སྐྱིེད་ཀྱི་འཚོ་བར་རོལ་བཞིན་ཡོད་པ་མིག་མཐོང་ལག་ཟིན་བྱུང་སྐོར་ཡང་བརྗོད་ཡོད་པར། ༸གོང་ས་མཆོག་ནས་བོད་མི་གནས་ཡུལ་ས་ཁུལ་ཡོངས་ལ་རིག་གཞུང་རྩ་བརླག་འགྲོ་རྒྱུའི་ཉེན་ཁ་གཅིག་མཚུངས་ཡོད་པ་ངོ་སྤྲོད་གནང་ཡོད་པ་མ་ཟད། གཞིས་བཞུགས་བོད་མི་ཚོར་སེམས་ནང་གི་ཚོར་བ་ཡོངས་བསྒྲགས་བྱ་རྒྱུའི་བློ་ཁོག་མེད་པའི་གནས་ཚུལ་ཁག་གཅིག་ལུང་འདྲེན་དང་སྦྲགས་ཀུན་གཟིགས་པཎ་ཆེན་རིན་པོ་ཆེ་མཆོག་ནས་ཀྱང་བོད་ནང་གི་བོད་མི་རྣམས་དཀའ་སྡུག་ཚད་མེད་མྱོང་བཞིན་ཡོད་པའི་སྐོར་ཡོངས་བསྒྲགས་གསུང་ཡོད་པ་བཅས་ངོ་སྤྲོད་གནང་ཡོད།།
