༢༠༠༩ ཕྱི་ཟླ་ ༥ ཚེས་ ༢༢ རེས་གཟའ་པ་སངས།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་བར་གཞིགས་ན། ཡུ་རོབ་སྤྱི་མཐུན་རྒྱལ་ཁབ་ཀྱི་ཆེས་མཐོའི་དཔལ་འབྱོར་ཀྱི་ཚོགས་འདུ་དེ་རྒྱ་ནག་དང་ལྷན་དུ་ ༢༠༠༩ ཕྱི་ཟླ་ ༥ ཚེས་ ༢༠ ཉིན་གྲོང་ཁྱེར་པ་རག་(Prague)ནང་ཚོགས་རྒྱུ་དང་སྟབས་བསྟུན་རྒྱལ་སྤྱིའི་བོད་དོན་ལས་འགུལ་ཁང་གིས་ཕྱི་ཟླ་ ༥ ཚེས་ ༡༨ ཉིན་ཡུ་རོབ་སྤྱི་མཐུན་རྒྱལ་ཁབ་ཀྱིས་བོད་ཐོག་སྲིད་བྱུས་གསར་པ་ཞིག་གཏན་འབེབ་བྱེད་དགོས་པའི་སྐུལ་མ་བཏང་ཡོད་པ་དང་། སྲིད་བྱུས་དེའི་ནང་ཡུ་རོབ་གཅིག་སྒྲིལ་ནང་ཡོད་པའི་རྒྱལ་ཁབ་ཚང་མས་ཐུན་མོང་ཐོག་ལག་བསྟར་བྱེད་དགོས་པའི་སྲིད་བྱུས་ཤིག་གཏན་འབེབ་བྱས་ཐོག་རྒྱ་ནག་གཞུང་གི་ད་ལྟ་བྱེད་བཞིན་པའི་ཡུ་རོབ་ཀྱི་རྒྱལ་ཁབ་བྱེ་བྲག་ཁག་ཐེར་འདོན་བྱས་ཏེ་བོད་ཀྱི་གནད་དོན་དང་བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་སོགས་ཀྱི་གནད་དོན་ཐོག་ལ་གནོན་ཤུགས་སྤྲོད་བཞིན་པའི་བྱ་སྤྱོད་དེ་དག་སྔོན་འགོག་བྱ་རྒྱུའི་ཐབས་ལམ་ཞིག་བཏོན་ཡོད་པ་རེད།
རྒྱལ་སྤྱིའི་བོད་དོན་ལས་འགུལ་ཁང་གིས་བཏོན་པའི་སྲིད་བྱུས་ཀྱི་ཡིག་ཆ་དེ་ནི་གཙོ་བོ་དོན་ཚན་བཞིའི་ཐོག་གསལ་འདོན་བྱས་ཡོད་པ་དེ་དག་ནི། ཡུ་རོབ་སྤྱི་ཡོངས་ཀྱིས་བོད་ཐོག་ལངས་ཕྱོགས་གཏན་འབེབ་བྱས་ནས་བོད་དོན་ཐོག་རྒྱབ་སྐྱོར་གྱིས་རྣམ་པ་གསལ་པོ་བཟོ་དགོས་པ་དང་། མ་འོངས་པར་ཡུ་རོབ་ཁུལ་དུ་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་གཟིགས་སྐོར་ཕེབས་ཕྱོགས་ཐད་ཐུན་མོང་གིས་ལངས་ཕྱོགས་གཏན་འབེབ་དགོས་པ། རྒྱ་བོད་དབར་གྱི་གྲོས་མོལ་ཐོག་གྲུབ་འབྲས་ཐོན་པའི་ལས་དོན་སྤེལ་དགོས་པ། ཡུ་རོབ་གཅིག་སྒྲིལ་རྒྱལ་ཁབ་ཀྱིས་གོ་སྐབས་ཚང་མ་བཟུང་ནས་བོད་ནང་གི་གནས་སྟངས་དང་རྒྱལ་སྤྱིའི་སྤྱི་ཚོགས་ལྷན་དུ་མཉམ་རུབ་བྱ་རྒྱུའི་ལས་དོན་ཐོག་ཤུགས་སྣོན་རྒྱག་དགོས་པ་བཅས་བཀོད་ཡོད།
དེ་ཡང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་མཆོག་ནས་ཡུ་རོབ་གཅིག་སྒྲིལ་རྒྱལ་ཚོགས་ཀྱི་རྒྱལ་ས་བུ་རུ་སལ་སི་(Brussels)ནས། རྒྱལ་སྤྱིའི་བོད་དོན་ལས་འགུལ་ཁང་གིས་ཡུ་རོབ་གཅིག་སྒྲིལ་རྒྱལ་ཚོགས་ཀྱིས་བོད་ཐོག་ལ་གཅིག་སྒྲིལ་དང་འགྱུར་བ་མེད་པའི་ལངས་ཕྱོགས་གསར་པ་ཞིག་གཏན་འབེབ་གནང་རྒྱུར་འབོད་སྐུལ་ཞུ་གི་ཡོད་ལ། སྔ་ལོ་རྒྱ་ནག་ཕྱོགས་ནས་ཚོགས་འདུ་དེ་ཕྱིར་འཐེན་བྱས་པ་ནས་བཟུང་ཡུ་རོབ་ཀྱི་རྒྱལ་ཁབ་བྱེ་བྲག་པ་ཟུར་འདོན་བྱས་ཏེ་༸གོང་ས་མཆོག་དང་ལྷན་དུ་མཇལ་འཕྲད་བྱས་མི་ཆོག་པའི་གནོན་ཤུགས་སྤྲད་པ་དེས་བོད་ཀྱི་གནད་དོན་དེ་གནད་འགག་ཆེན་པོ་ཞིག་ཡིན་པ་གསལ་འདོན་བྱས་པའི་ཐོག་ལ་གསུང་དོན། རྒྱ་ནག་གིས་ཆེས་མཐོའི་ཚོགས་འདུ་དེ་ནས་ཕྱིར་འཐེན་བྱས་པ་ནས་བཟུང་། བོད་ཀྱི་གནད་དོན་སྐོར་དང་དེ་བཞིན་༸གོང་ས་མཆོག་དང་ཡུ་རོབ་ཀྱི་དབུ་ཁྲིད་དབར་གྱི་མཇལ་འཕྲད་དེ་རྒྱ་གཞུང་ནས་ཡུ་རོབ་ཀྱི་གནད་དོན་ཐད་ཐག་གཅོད་བྱེད་ཡུལ་གྱི་གཞི་རྩ་ཞིག་ཏུ་འགྱུར་བ་དེས། བོད་དང་༸གོང་ས་༸སྐྱབས་མགོན་ཆེན་པོ་མཆོག་གི་གནད་དོན་དེ་རྒྱ་ནག་གཞུང་ལ་གནད་འགག་གང་འདྲ་ཆེན་པོ་ཡིན་པ་དེ་མངོན་པར་བྱས་ཡོད། རྒྱ་ནག་གིས་ཡུ་རོབ་ཀྱི་རྒྱལ་ཁབ་བྱེ་བྲག་པ་ཟུར་འདོན་བྱས་ནས་རྒྱལ་ཁབ་དེས་བོད་དོན་ཐོག་གི་ལངས་ཕྱོགས་ལ་གནོོན་ཤུགས་སྤྲད་པའི་སྲིད་བྱུས་འཛིན་བཞིན་ཡོད་པར་སོང་། རྒྱལ་སྤྱིའི་བོད་དོན་ལས་འགུལ་ཁང་ནས་ཐེངས་འདིའི་ལས་འགུལ་གྱི་དམིགས་ཡུལ་གཙོ་བོ་དེ་ནི་ཡུ་རོབ་གཅིག་སྒྲིལ་རྒྱལ་ཁབ་ཀྱི་ཚོགས་ཁོངས་སུ་ཡོད་པའི་རྒྱལ་ཁབ་ཚང་མར་ཐུན་མོང་གི་ལངས་ཕྱོགས་གཏན་འབེབ་བྱེད་ཐུབ་པ་བྱས་ནས་རྒྱ་ནག་གིས་རྒྱལ་ཁབ་བྱེ་བྲག་པ་ཞིག་ལ་ཟུར་དུ་སྐྱོན་བརྗོད་བྱེད་ཐབས་མེད་པ་ཞིག་བཟོ་རྒྱུའི་ཆེད་དུ་ཡིན་པ་སོགས་འགྲེལ་བརྗོད་གནང་ཡོད་པ་བཅས་ཀྱི་གནས་ཚུལ་དུ།།
