༢༠༠༩ ཕྱི་ཟླ་ ༥ ཚེས་ ༢༥ རེས་གཟའ་ཟླ་བ།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ༢༠༠༩ ཕྱི་ཟླ་ ༥ ཚེས་ ༢༤ བོད་ནང་གི་སྔ་དྲོའི་ཆུ་ཚོད་ ༡༡ ཙམ་དུ་ཁམས་དཀར་མཛེས་ས་ཁུལ་རྟའུ་རྫོང་འདྲ་པ་ཆུས་ཀྱི་ས་གནས་སུ་རྟའུ་རྫོང་དང་ཉག་ཆུ་རྫོང་ཁོངས་ཀྱི་མི་མང་ནས་ཡུལ་མི་གནས་སྤོ་བྱ་རྒྱུར་ངོ་རྒོལ་བྱས་པའི་གནས་ཚུལ་ཐོན་རྗེས་སྤྱི་བདེ་མི་སྣ་དང་དྲག་ཆས་ཉེན་རྟོག་དམག་མིས་མེ་མདའ་བརྒྱབ་པར་བརྟེན་ཉུང་མཐར་བུད་མེད་དྲུག་ལ་མེ་མདའ་ཕོག་སྟེ་རྨས་སྐྱོན་ཚབས་ཆེ་ཕོག་པའི་གནས་ཚུལ་ཐོན་འདུག
གནས་ཚུལ་དེའི་འབྱུང་རྐྱེན་གཙོ་བོ་ནི། ཕྱི་ལོ་ ༢༠༠༨ ལོ་ནས་བཟུང་རྟའུ་རྫོང་(དེ་སྔ་མི་ཉག་ཁུལ་དུ་བརྩི་སྲོལ་ཡོད་འདུག)ཁོངས་སུ་རྒྱ་གཞུང་ནས་གློག་ཁང་གསར་རྒྱག་བྱེད་རྒྱུའི་ཆེད་ཡུལ་མི་གནས་སྤོ་བྱེད་དགོས་པའི་བཙན་བཀའ་བཏང་སྟེ་ས་རྟགས་བཀོད་བཅུག་ཡོད་པ་མ་ཟད། ཕྱི་ལོ་ ༢༠༠༩ ལོར་སླར་ཡང་ཡུལ་མི་གནས་སྤོ་བྱེད་དགོས་པའི་བཙན་བཀའ་བཏང་བར་ཡུལ་མི་ཚོས་ཁ་གཅིག་མཐུན་གྱིས་ཕ་མེས་ནས་གཞིས་ཆགས་པའི་ས་ཞིང་ཁང་པ་སོགས་བློས་བཏང་བྱེད་མ་ཐུབ་པར་མུ་མཐུད་གནས་སྡོད་བྱས་རྐྱེན་ ༢༠༠༩ ཟླ་ ༥ ཚེས་ ༥ ཉིན་དྲག་ཆས་དམག་མི་མང་པོ་ས་གནས་སུ་སླེབས་ཏེ་ས་གནས་དེའི་ཨ་ཀྲི་རྒྱ་མཚོ་ཚང་དང་། ཆེ་གོ་པི་ཟི་ཚང་སོགས་མི་ཚང་ཁག་གཅིག་བཤིག་གཏོར་བཏང་ཡོད་པ་མ་ཟད། ས་གནས་དེའི་ཝ་ར་མ་ཀྲོ་(ས་མིང་ཁ་གསལ་མི་འདུག)ཞེས་པའི་གྲོང་སྡེ་རུ་ཉེ་སྔོན་ཡུལ་མི་གནས་སྤོས་བྱེད་དགོས་སྐོར་ཚོགས་འདུ་དང་མཛད་སྒོ་ཞིག་ཚོགས་ཏེ་རྡོ་རིང་ཡང་བཙུགས་ཡོད་འདུག་ཀྱང་། གྲོང་སྡེ་དེའི་ཡུལ་མི་རང་ལོ་བདུན་ཅུ་ལྷག་ཙམ་སོན་པའི་ལྷ་མོ་ཞེས་པའི་རྒས་མོ་ཞིག་གིས་སྣེ་ཁྲིད་དེ་ང་ཚོའི་ས་ཆ་ང་ཚོར་བདག་དབང་ཡོད་པས། གནས་གཞན་དུ་སྤོ་རྒྱུ་མིན་སྐོར་སྐད་འབོད་དང་འབྲེལ་རྡོ་རིང་དེ་བཤིག་གཏོར་བཏང་སྟེ་ཡུལ་མི་གནས་སྤོ་བྱ་རྒྱུར་ངོ་རྒོལ་གྱི་རྣམ་འགྱུར་ཤུགས་ཆེ་ཐོན་པར་བརྟེན། མཐར་ཕྱི་ལོ་ ༢༠༠༩ ཟླ་ ༥ ཚེས་ ༢༤ ཉིན་སྔ་དྲོ་དམག་མི་ཁྱོན་ཆེ་སླེབས་ཏེ་ས་གནས་དེར་དམ་བསྒྲགས་བྱེད་རིང་རྟའུ་རྫོང་དང་ཉག་ཆུ་རྫོང་ཁོངས་ཀྱི་མི་སྣ་མང་པོ་ཞིག་ས་གནས་དེར་འཛོམས་ཏེ་ཞི་བའི་ངོ་རྒོལ་བྱས་པར་དམག་མིས་མེ་མདའ་གང་བྱུང་རྒྱབ་སྟེ་བུད་མེད་དྲུག་ལ་རྨས་སྐྱོན་ཚབས་ཆེ་ཕོག་ཡོད་འདུག བུད་མེད་དྲུག་ནི། ཚེ་རིང་ལྷ་མོ་དང་། རིག་འཛིན་ལྷ་མོ། སྒྲོལ་མ། སྐལ་བཟང་། སྒྲོལ་དཀར། མཁའ་དབྱིངས་བཅས་ཡིན་པ་དང་། མེ་མདའ་ཕོག་རྗེས་དམག་མིས་བཙན་འཁྲིད་བྱས་ཏེ་ད་ལྟ་ཁོང་རྣམས་ཤི་གསོན་གྱི་གནས་སྟངས་ཇི་ཡིན་ཁ་གསལ་མེད་པར་གྱུར་ཡོད་པ་རེད།།
