༢༠༠༩ ཕྱི་ཟླ་ ༥ ཚེས་ ༡༢ རེས་གཟའ་མིག་དམར།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ཆབ་མདོ་ས་ཁུལ་འཇོ་མདའ་རྫོང་ཁོངས་ཁ་སྒང་ཤང་དང་། རོང་གསུམ་ཤང་། འཇོ་མདའ་གྲོང་རྡལ་བཅས་ཀྱི་ཁོངས་གཏོགས་ལྗི་བ་རུ་བ་དང་། འདྲ་རྒན། མཚན་འབའ། ཨམ་འབའ། མགོ་མདའ། རྡོ་ཕྲེང་མདའ། སྐེད་ཧྲེང་། འཇོ་མདའ། ཝ་ཤུལ། ག་གཟི། གཞི་ལུ། དངུལ་མདའ། ཐར་རྩེ། འབོད་ཐང་། ར་མདོ་རུ་བ་སོགས་སུ་བོད་མི་ཚོས་ས་ཞིང་འདེབས་ལས་མ་བྱས་པར་ཟླ་བ་གཅིག་མ་ཟིན་ཙམ་ཕྱིན་ཡོད་འདུག་པ་དང་། ས་གནས་དེ་དག་ཁོངས་ནས་ར་མདོ་ས་གནས་སུ་བོད་མིའི་ས་ཞིང་ཁག་ཅིག་རྒྱ་གཞུང་ནས་ཉོས་ཏེ་དམག་སྒར་རྒྱག་བཞིན་ཡོད་འདུག་ཅིང་། ས་ཞིང་འདེབས་ལས་མ་བྱས་པའི་གྲོང་ཚོ་སོ་སོར་ལས་དོན་རུ་ཁག་མི་གསུམ་རེ་བགོས་ཏེ་ཞིང་ཁར་ནམ་རྒྱུན་འདེབས་སྲོལ་གྱི་འབྲུ་རིགས་ད་ལྟ་བཏབ་ན་དུས་ཐོག་སྐྱེ་མི་སྲིད་ཀྱང་ཞོ་ཁོག་དང་། སྲན་མ། ཡུག་པོ་སོགས་འདེབས་ནས་ཞིང་ཁ་རྨོ་དགོས་པའི་བཙན་བཀའ་གཏོང་བཞིན་ཡོད་འདུག་ལ། གལ་སྲིད་བོད་མི་ཚོས་ས་ཞིང་མ་བཏབ་ཚེ་དམག་མིའི་འདྲུད་འཐེན་འཁོར་ལོ་བེད་སྤྱོད་ཀྱིས་ཞིང་ཁ་རྨོ་རྒྱུ་ཡིན་སྐོར་བཤད་ཡོད་འདུག་ཀྱང་བོད་མི་ཚོས་ཉན་འཇོག་བྱས་མེད་པ་རེད་འདུག
ད་ལྟ་ས་གནས་མང་པོ་ཞིག་ནས་བོད་མི་སྐྱེས་པ་ཕལ་ཆེ་བ་དབྱར་རྩ་དགུན་འབུ་བརྐོ་རུ་འགྲོ་རྒྱུ་ཡིན་ཚུལ་སོགས་ཀྱི་ཁག་བཏགས་ཏེ་རི་ལ་ཕྱིན་ཟིན་ནས་ས་ཞིང་རྨོ་མཁན་དང་། ལས་དོན་རུ་ཁག་གི་ཚོགས་འདུར་ཞུགས་མཁན་ཡང་ཉུང་ཉུང་ཞིག་ལས་མེད་པ་རེད་འདུག
བོད་མི་ཚོས་དེ་ལྟར་ངོ་རྒོལ་བྱ་དགོས་དོན་ནི་བོད་མི་རྣམས་རྡོག་རྩ་གཅིག་བསྒྲིལ་དང་། སྔ་ལོའི་ཞི་རྒོལ་ནང་རྐྱེན་འདས་མནར་གཅོད་མྱོང་མཁན་རྣམས་ཀྱི་སྡུག་བསྔལ་སྲུང་ཆེད་ཡིན་སྐོར་ས་གནས་མང་ཚོགས་ནས་འགྲེལ་བཤད་བྱ་གི་ཡོད་འདུག་ཅིང་། ས་གནས་ཡུལ་མི་ཚོས་ས་ཞིང་འདེབས་ལས་མ་བྱས་པར་བརྟེན་དེ་སྔ་རྫོང་སྲིད་གཞུང་ནས་ལམ་ཁ་དང་ཟམ་པ་བཟོ་རྒྱུའི་རོགས་དངུལ་སྤྲད་རྒྱུ་ཁས་བླངས་པའང་ཕྱིར་འཐེན་བྱས་པ་དང་། གྲོང་སྡེའི་འགོ་གཙོ་ཁག་གཅིག་ཕྱིར་འབུད་བཏང་བའི་གནས་ཚུལ་ཡང་ཐོན་ཡོད་འདུག
