༢༠༠༩ ཕྱི་ཟླ་ ༥ ཚེས་ ༡༩ རེས་གཟའ་མིག་དམར།

༄༅། །༢༠༠༩ ཕྱི་ཟླ་ ༥ ཚེས་ ༡༨ རེས་གཟའ་ཟླ་བའི་ཉིན་ཧི་མ་ཅལ་མངའ་སྡེའི་གྲོས་ཚོགས་ཝི་ཌན་ས་བྷ་(Vidhan Sabha)གྱི་ཚོགས་གཙོ་སྐུ་ཞབས་ཤྲི་ཏུལ་སི་རམ་ (Shri Tulsi Ram)མཆོག་སྐུ་སྒེར་ཐོག་བོད་མི་མང་སྤྱི་འཐུས་ལྷན་ཚོགས་སུ་ཕེབས་པར་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་སྤྱི་འཐུས་རྒྱུན་ལས་ཁག་གཅིག་ནས་ཕེབས་བསུ་ཞུས་ཡོད། སྐབས་དེར་ཁོང་གིས་འདི་ལྟར་ཕེབས་བསུ་ཞུས་པར་ཐུགས་རྗེ་ཆེ་ཞུ་དང་སྦྲགས་ང་རང་རྡ་རམ་ས་ལར་ཐེངས་ཁ་ཤས་ཡོང་མྱོང་ཡོད། འོན་ཀྱང་བཙན་བྱོལ་གྲོས་ཚོགས་ལ་བཅར་བ་ཐེངས་དང་པོ་ཡིན། ཞེས་གསུངས་ཡོད།

བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་ནས་སྐུ་ཞབས་ཤྲི་རི་ཏུལ་སི་རམ་མཆོག་ལ་ཕེབས་བསུ་ཞུ་བཞིན་པ།

ཕེབས་བསུ་གྲུབ་རྗེས་གསོལ་ཇ་བཞེས་ཏོག་འདེགས་འབུལ་གྱིས་ནང་མོལ་སྐབས་སྤྱི་འཐུས་ཚོགས་གཞོན་མཆོག་ནས་ཧི་མ་ཅལ་མངའ་སྡེའི་གྲོས་ཚོགས་ནང་བོད་དོན་གླེང་སྟེགས་བསྐྱར་གསོ་གནང་རྒྱུའི་འབོད་སྐུལ་ཞུས་ཡོད་པ་རེད།

ཚོགས་གཞོན་མཆོག་ནས་སྐུ་ཞབས་ཤྲི་རི་ཏུལ་སི་རམ་མཆོག་ལ་ཕྱག་རྟགས་འབུལ་བཞིན་པ།

དེ་ནས་སྐུ་ཞབས་ཤྲི་ཏུལ་སི་རམ་ནས་གསར་འགོད་པའི་དྲི་བ་ཁག་ལ་ལན་གནང་དོན། རྒྱ་ནག་གཞུང་ནས་བོད་དབང་བསྒྱུར་བྱས་པ་དེ་ཁས་ལེན་བྱེད་ཐབས་མེད་པ་ཞིག་དང་། རྒྱ་ནག་གིས་བོད་འདྲ་བའི་སྟོབས་འབྱོར་དབུལ་བ་དང་ཞི་བདེའི་རྒྱལ་ཁབ་དབང་བསྒྱུར་བྱས་པ་དེ་ནི་ནོར་འཁྲུལ་རེད། དེ་ལྟ་བུའི་དྲང་བདེན་མིན་པའི་དྲག་གནོན་ནི་ཁས་ལེན་ཐུབ་ཐབས་མེད་པ་ཞིག་རེད། ཅེས་དང་ཡང་ཁོང་གིས་ངས་རྒྱ་གར་གཞུང་ནས་མུ་མཐུད་དེ་བོད་མིར་རོགས་སྐྱོར་དང་རྒྱབ་སྐྱོར་གནང་རྒྱུའི་རེ་བ་ཞུ་གི་ཡོད། ཅེས་གསུངས་ཡོད་པ་རེད།

སྐབས་དེར་ཚོགས་གཞོན་རྒྱ་རི་སྒྲོལ་མ་མཆོག་ནས་སྐུ་ཞབས་ཤྲི་ཏུལ་སི་རམ་མཆོག་ནི་དུས་རྟག་ཏུ་བོད་དོན་ལ་ཐུགས་སྣང་ཡོད་མཁན་ཞིག་དང་བོད་དོན་ལ་ཡུན་རིང་རྒྱབ་སྐྱོར་གནང་མཁན་ཞིག་ཀྱང་རེད། ཅེས་དང་མུ་མཐུད་ཁོང་གིས། ཧི་མ་ཅལ་མངའ་སྡེའི་ནང་བཙན་བྱོལ་བོད་གཞུང་ཆགས་ཡོད་སྟབས། མངའ་སྡེ་འདིའི་ཡུལ་མི་དང་བོད་མིའི་དབར་དམིགས་བསལ་གྱི་འབྲེལ་ལམ་ཞིག་ཆགས་ཡོད། ཅེས་གསུངས་པ་དང་འབྲེལ་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་སྐུ་ཞབས་ཤྲི་རི་ཏུལ་སི་རམ་དང་ཁོང་གི་སྐུ་ཟླ་རྣམ་གཉིས་ལ་ཕྱག་རྟགས་ཀྱང་ཕུལ་ཡོད་པའི་གནས་ཚུལ་དུ།།