༢༠༠༩ ཕྱི་ཟླ་ ༥ ཚེས་ ༨ རེས་གཟའ་པ་སངས།
༄༅། །བཞུགས་སྒར་གྱི་ཉེ་འཁྲིས་སུ་སྒ་རྗེ་ཁམས་སྤྲུལ་འཇམ་དབྱངས་དོན་གྲུབ་རིན་པོ་ཆེ་མཆོག་ནས་ཕྱག་བཏབ་པའི་འཆི་མེད་དགའ་ཚལ་གླིང་དགོན་དུ་བོད་རྒྱལ་ལོ་ ༢༡༣༦ རབ་བྱུང་བཅུ་བདུན་པའི་ས་གླང་ ༢༠༠༩ ཕྱི་ཟླ་ ༥ ཚེས་ ༡ ཉིན་དཔལ་ས་སྐྱ་ཕུན་ཚོགས་ཕོ་བྲང་གི་གདུང་སྲས་ཨ་སངྒ་བཛྲ་རིན་པོ་ཆེ་དགུང་གྲངས་བཅུར་ཕེབས་པའི་འཁྲུངས་སྐར་སྲུང་བརྩི་ཞུས་ཡོད།
དེ་ཡང་སྔ་དྲོ་ཆུ་ཚོད་ ༩ ཡོལ་ཙམ་ལ་སྐུ་ཉེ་ཁག་ལྷན་འཛོམས་ཀྱིས་བཞུགས་གནས་ནས་གདུང་སྲས་སྤོས་སྣེ་སྤྱན་རྒྱས་གདན་ཞུས་ཀྱིས་བཞུགས་ཁྲིར་འཁོད་རྗེས་༸གོང་ས་ལྔ་པ་ཆེན་པོའི་དག་སྣང་རྒྱ་ཅན་ཉེར་ལྔའི་ཆོས་སྡེའི་ནང་ཚན་འཆི་མེད་དྭངས་མ་བཅུད་འདྲེན་གྱི་ཆོ་ག་བཏང་གྲུབ་མཚམས་བརྟན་བཞུགས་འབུལ་ལམ་ཞུས་ཡོད་འདུག དགོང་དྲོ་ཆུ་ཚོད་ ༥།༥༠ ཐོག་དཔལ་ས་སྐྱའི་འཁོན་གདུང་སྲས་ཨ་ནནྟ་རིན་པོ་ཆེ་དང་། བདག་མོ་འཆི་མེད་ལགས། རྗེ་བཙུན་མ་ཨ་ལོ་ཀི་དང་མ་མ་ཀཱི་རྣམ་གཉིས། སྒ་རྗེ་ཁམས་སྤྲུལ་རིན་པོ་ཆེའི་སྐུ་འཁོར་རྣམ་པ། དགོན་སྡེ་ཁག་གི་བླ་སྤྲུལ་མཁན་པོ་དང་སྐུ་ཚབ་རྣམ་པས་དབུས་སྐྱབས་གནས་དགེ་འདུན་རྣམ་པ། སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་དབུས་སྤྱི་འཐུས་རྒྱུན་ལས་རྣམ་པ། བཙན་བྱོལ་བོད་གཞུང་གི་མཛད་གཙོ་ལས་ཟུར་རྣམ་པ། བོད་གཞུང་ཆོས་རིག་ལས་ཁུངས་ཀྱི་དྲུང་ཚབ་མགོན་པོ་ལགས། དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འགན་འཛིན་དང་གསར་འགོད་པ་བཅས་ལྷན་འཛོམས་ཐོག་གདུང་སྲས་ཨ་སངྒ་བཛྲ་རིན་པོ་ཆེར་མལ་རྟེན་གསུམ་འདེགས་འབུལ་གནང་གྲུབ་མཚམས་བཀྲ་ཤིས་མཇལ་དར་ཕུལ་ཏེ་དགོང་དྲོའི་གསོལ་སྟོན་བཤམས་པ་བཅས་ཀྱི་གནས་བསྡུས་སུ།།
