༢༠༠༩ ཕྱི་ཟླ་ ༥ ཚེས་ ༦ རེས་གཟའ་ལྷག་པ།
༄༅། །བོད་གཞུང་ཤེས་རིག་ལས་ཁུངས་ནས་གོ་སྒྲིག་ཞུས་པའི་ཤེས་ཡོན་སྲིད་བྱུས་དང་འབྲེལ་བའི་གཞི་རིམ་འོག་མའི་དགེ་འོས་དང་ས་ར་བོད་ཀྱི་མཐོ་རིམ་སློབ་གཉེར་ཁང་གི་སྐབས་བརྒྱད་པའི་མཐོ་རིམ་རིག་གནས་རབ་འབྱམས་པའི་བསླབ་པ་མཐར་སོན་པའི་མཛད་སྒོ་ས་ར་བོད་ཀྱི་མཐོ་རིམ་སློབ་གཉེར་ཁང་གི་ཚོགས་ཁང་དུ་ ༢༠༠༩ ཕྱི་ཟླ་ ༥ ཚེས་ ༡ སྔ་དྲོ་ཆུ་ཚོད་ ༡༠།༣༠ ཚོགས་གནང་བ་དང་། མཛད་སྒོར་མགྲོན་གྱི་གཙོ་བོ་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་དང་རིགས་ལམ་སློབ་གཉེར་ཁང་གི་དབུ་འཛིན་གཞོན་པ་དགེ་བཤེས་སྐལ་བཟང་དགྲ་འདུལ་ལགས། ས་ར་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས། ཤེས་རིག་གི་ཤེས་ཡོན་འགན་འཛིན་ཚེ་རིང་བསམ་གྲུབ་ལགས། ས་ར་མཐོ་སློབ་ཀྱི་དགེ་སློབ་བཅས་ཚང་འཛོམས་ཐོག་ཤེས་ཡོན་འགན་འཛིན་ནས་གཞི་རིམ་འོག་མའི་དགེ་འོས་ཁོངས་སུ་འཛུལ་ཞུགས་གནང་མཁན་སློབ་མ་བཅོ་ལྔར་དུས་ཡུན་ལོ་གཉིས་རིང་སློབ་ཁྲིད་གནང་མཁན་རྒྱ་གར་དང་ཕྱི་རྒྱལ་གྱི་མཁས་དབང་གྲགས་ཅན་གྲངས་ ༥ དང་བོད་པའི་སློབ་ཁྲིད་གནང་མཁན་མཁས་དབང་ ༡༨ བཅས་གདན་ཞུས་ཀྱིས་འོས་སྦྱོང་སློབ་གཞི་དང་འབྲེལ་བའི་སྐོར་སློབ་ཁྲིད་གནང་ཡོད་འདུག གཞན་ཡང་ཉམས་གསོག་སླད་སམ་བྷོ་ཊ་དང་བོད་ཁྱིམ་ཁྱབ་ཁོངས་སུ་ཟླ་བ་གཅིག་རིང་སློབ་ཁྲིད་དང་།ལག་ལེན། བདེ་སྐྱིད་གླིང་དང་མ་སུ་རི་SIDHསློབ་ཁག དེ་བཞིན་ཨེམ་དྷ་བྷཌར་དམིགས་བསལ་སྦྱོང་བརྡར་ཟླ་བ་གཅིག་རིང་སྤྲད་ཡོད་པ་སོགས་ཀྱི་ལས་བསྡོམས་ཁག་སྙན་སྒྲོན་ཞུས་མཚམས་ཤེས་རིག་བཀའ་བློན་མཆོག་ནས་འོས་སྦྱོང་སློབ་ཁྲིད་གནང་མཁན་རྣམས་ལ་ཐུགས་རྗེ་ལེགས་གསོལ་གནང་།
དེ་ནས་འོས་སྦྱོང་པ་རྣམས་དང་། མཐོ་རིམ་རིག་གནས་རབ་འབྱམས་པ་རྣམས་ལ་ལག་འཁྱེར་གནང་། དེ་རྗེས་སྐབས་བརྒྱད་པའི་མཐོ་རིམ་རིག་གནས་རབ་འབྱམས་པའི་སློབ་མ་རྣམས་ནས་རྩོམ་སྒྲིག་བྱས་པ་(འགུལ་གྱིན་པའི་རྣམ་ཤེས་)ཞེས་པའི་དཔེ་དེབ་དབུ་འབྱེད་གནང་ཡོད་འདུག དེ་རྗེས་ས་ར་མཐོ་སློབ་ཀྱི་སློབ་སྤྱི་ནས་འོས་སྦྱོང་དང་འབྲེལ་བའི་ལམ་སྟོན་གསུང་བཤད་དང་རིགས་སློབ་དབུ་འཛིན་གཞོན་པས་སློབ་མ་རྣམས་ལ་རིགས་སློབ་ཀྱི་དམིགས་ཡུལ་དང་མཐུན་པ་ཞིག་སློབ་ཐོན་ཡོང་ཐབས་གནང་རྒྱུ་གལ་ཆེ་ཡིན་སྐོར་སོགས་གནང་མཚམས་ཤེས་རིག་བཀའ་བློན་མཆོག་ནས་མཇུག་བསྡོམས་གཏམ་བཤད་གནང་བའི་ནང་། སློབ་ཐོན་པ་རྣམས་དགེ་རྒན་རྣམ་དག་ཅིག་གནང་སྟེ་འབྱུང་འགྱུར་བོད་ཀྱི་སོན་རྩ་རྣམས་བོད་མི་རྣམ་དག་ཅིག་ཏུ་གསོ་སྐྱོང་གནང་ཐུབ་པ་དགོས་རྒྱུ་དང་། དེ་བཞིན་དགེ་རྒན་གྱི་མཚན་ཉིད་དང་ལས་འགན། དེ་མཚུངས་ཤེས་ཡོན་སྲིད་བྱུས་བཅས་ཀྱི་དགོངས་དོན་དང་མཐུན་པར་ཞབས་འདེགས་ཞུ་དགོས། མཐོ་རིམ་རིག་གནས་རབ་འབྱམས་པ་སློབ་ཐོན་རྣམས་དང་ས་ར་མཐོ་སློབ་ཏུ་སློབ་སྦྱོང་གནང་བཞིན་ཡོད་པའི་སློབ་མ་རྣམས་ལ་བོད་ཀྱི་ཆོས་དང་རིག་གཞུང་ལ་དོ་སྣང་དང་འབྲེལ་བོད་རིགས་རྣམ་དག་ཅིག་ཆགས་ཐུབ་ཐབས་དང་འབྲེལ་བའི་སྒོ་ནས་བོད་པའི་སྤྱི་ཚོགས་ནང་ཞབས་འདེགས་རླབས་ཆེན་ཞུ་ཐུབ་པ་དགོས་རྒྱུ་དང་། ད་ཡོད་ཀྱི་ལག་འཁྱེར་དང་ཤེས་ཚད་ལ་ཡིད་ཚིམས་ནས་མ་བསྡ་ད་པར་སློབ་སྦྱོང་གང་གནང་མཐར་ཕྱིན་པའམ་རིགས་གཅིག་རྐང་འཛིན་གནང་ཐབས་སྐོར་ལ་བཀའ་སློབ་ཞིབ་ཕྲ་གནང་ནས་མཇུག་བསྡོམས་གནང་། དེ་རྗེས་ས་ར་མཐོ་སློབ་ཀྱི་དྲུང་ཡིག་ནས་ཐུགས་རྗེ་ཆེ་ཞུའི་གཏམ་བཤད་གནང་སྟེ་མཛད་སྒོ་ལེགས་པར་གྲུབ་པའི་གནས་བསྡུས་སུ།
