སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་ས་ནས་ནོར་གླིང་ཉེ་འཁྲིས་སུ་གནས་པའི་བཙུན་དགོན་ཐོས་བསམ་གླིང་དང་དབང་པོ་སྐྱོན་ཅན་གྱི་སློབ་གྲྭ་སྙིང་སྟོབས་གླིང་ལ་ཆིབས་སྒྱུར་བསྐྱངས་པ།

གསར་ལས་ཁང་གི་གསར་འགོད་པས།

༢༠༠༩-༠༥-༡༦

༢༠༠༩ ཕྱི་ཟླ་ ༥ ཚེས་ ༡༦ རེས་གཟའ་སྤེན་པ།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཙུན་དགོན་ཐོས་བསམ་གླིང་གི་བཙུན་མ་གཉིས་ནས་ཕྱེ་མར་འདེགས་འབུལ་ཞུ་བཞིན་པ།

༄༅། །བོད་མིའི་ཆོས་སྲིད་གཉིས་ཀྱི་མངའ་བདག་འགྲོ་བ་ལྷ་དང་བཅས་པའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་ལ་བཙུན་དགོན་ཐོས་བསམ་གླིང་གི་འགོ་ལས་ཡོངས་ནས་མགྲིན་གཅིག་ཏུ་ཇི་ལྟར་གསོལ་འདེབས་ཞུས་པ་ལྟར་བཀའ་དྲིན་སྨིན་སྩལ་བྱུང་སྟེ་ ༢༠༠༩ ཕྱི་ཟླ་ ༥ ཚེས་ ༡༦ ཉིན་སྔ་དྲོའི་ཆུ་ཚོད་ ༨།༠༠ ཐོག་ཆིབས་སྒྱུར་གྱིས་གསར་དུ་བཞེངས་པའི་ཕྱི་རྒྱལ་མི་རིགས་ཀྱི་སློབ་གཉེར་ཁང་བཙུན་དགོན་ཐོས་བསམ་གླིང་དུ་༸ཞབས་སོར་འཁོད་དེ་རབ་གནས་བཀའ་དྲིན་སྩལ་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་ཞུ་བཞིན་པ།

དེ་རྗེས་མགོན་པོ་གང་ཉིད་བཞུགས་ཁྲི་རིན་པོ་ཆེར་འཁོད་མཚམས་སངས་རྒྱས་ཆོས་ཚོགས་འདོན་སྐུལ་གནང་སྟེ་གསོལ་ཇ་དང་འབྲས་བསིལ་འདེགས་འབུལ་ཞུས་རྗེས་བཙུན་དགོན་ཐོས་བསམ་གླིང་གི་ལས་ཀྱི་སྣེ་མོ་བ་གཉིས་ནས་མཎྜལ་རྟེན་གསུམ་འདེགས་འབུལ་ཞུས། དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་དེ་གར་སློབ་གཉེར་གནང་མཁན་ག་ཚོད་ཡོད་མེད་དང་རྒྱལ་ཁབ་གང་དང་གང་ནས་ཡིན་མིན། སློབ་གཉེར་གནང་མཁན་ག་ཚོད་ཙམ་ནས་བོད་ཀྱི་སྐད་ཡིག་སློབ་གཉེར་བྱེད་ཀྱི་ཡོད་མིན་སྐོར་ལ་བཀའ་དྲི་གནང་སྟེ། དོ་སྣང་ཆེན་པོས་ནང་ཆོས་སློབ་གཉེར་དང་ཉམས་ལེན་གནང་བར་བཀྲ་ཤིས་བདེ་ལེགས་ཀྱི་འཚམས་འདྲི་གནང་བ་དང་འབྲེལ་བཀའ་སློབ་ཕེབས་དོན། ཕྱི་ལོ་ ༡༩༥༩ ལོའི་སྔོན་ནས་ཤར་ཕྱོགས་རྒྱལ་ཁབ་ནང་དུ་ནང་ཆོས་སློབ་སབྱོང་གནང་མཁན་ཡོད་སྐོར་དང་། ཕྱི་ལོ་ ༡༩༦༠ ནང་ཤར་ཕྱོགས་རྒྱལ་ཁག་ཏུ་ནང་ཆོས་གོང་འཕེལ་ཕྱིན་ནས་ནང་ཆོས་ཀྱི་འབྲས་བུ་སྨིན་འགོ་ཚུགས་ཡོད། ཅེས་དང་ལྷག་པར་དུ་སེམས་ཅན་གྱི་ཁམས་དང་མོས་པ་ལ་གཞིགས་ཏེ་ཁག་གཅིག་གིས་ནང་ཆོས་ལ་སེམས་གཏིང་ནས་དོ་སྣང་བྱེད་ཀྱི་ཡོད། ཡང་ཁག་གཅིག་ནི་དར་སྲོལ་ཙམ་ཞིག་རེད། ཁ་འདོན་བྱ་རྒྱུ་དང་སྐུ་འདྲ་ཉར་ཚགས་བྱ་རྒྱུ་དེ་ཙམ་ཞིག་ལ་ནང་པ་ཟེར་གྱི་མེད་སྐོར་དང་། སངས་རྒྱས་ཀྱི་བཀའ་དགོངས་གྲུབ་རྒྱུ་གཙོ་བོ་ནི་ནང་ཆོས་ལ་སློབ་གཉེར་བྱས་ནས་ཉམས་སུ་ལེན་རྒྱུ་དེ་ཡིན། ནང་པ་ནི་སེམས་ལ་འགུལ་བསྐྱོད་ཐེབས་དགོས་པ་ལས་ཡིད་ཆེས་བྱས་པ་དེ་གཅིག་པུ་མ་ཡིན། ནང་ཆོས་ཀྱིས་སེམས་དང་། སེམས་བྱུང་། དོན་དངོས་ཤོད་ཀྱི་ཡོད། སེམས་ཀྱི་རང་བཞིན་ནི་གཙང་བའི་རང་བཞིན་ཞིག་ཡིན་སྐོར་དང་། འོན་ཀྱང་རྨོངས་པའི་རྐྱེན་གྱིས་ཉོན་མོངས་དུག་གསུམ་ཡོང་གི་ཡོད་པ་དང་། དེ་ཡོང་བྱེད་ཀྱི་རྒྱུ་གཙོ་བོ་རྨོངས་པ་ཡིན་པས་དེ་སེལ་ཐུབ་པ་ཡིན་ན་མཐར་ཐུག་གི་བདེ་སྐྱིད་ཐོབ་ཀྱི་ཡོད་སྐོར་སོགས་ཀྱི་བཀའ་སློབ་ཟབ་མོ་ཕེབས་ཡོད།

༸གོང་ས་མཆོག་བཀའ་སློབ་གྲུབ་བསྟུན་བཙུན་མ་གཉིས་ནས་རིགས་ལམ་གྱི་དགག་བཞག་སྤོང་གསུམ་གྱི་རྩོད་པ་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྙིང་སྟོབས་གླིང་དུ་ཆིབས་ཞལ་བསྒྱུར།༸གོང་ས་༸སྐྱབས་མགོན་ཆེན་པོ་མཆོག་སྙིང་སྟོབས་གླིང་གི་ཕེབས་སྒོ་བརྒྱུད་ཆིབས་སྒྱུར་གནང་སྐབས་བོད་གཞུང་ཟློས་གར་ཚོགས་པས་བཀྲ་ཤིས་ཞོལ་པའི་གར་གྱི་མཆོད་པས་ཕེབས་བསུ་ཞུས་བསྟུན་སྙིང་སྟོབས་གླིང་གི་འགན་འཛིན་སྤྱི་འཐུས་ངག་དབང་ལྷ་མོ་ལགས་ནས་སྤོས་སྣེས་ཕེབས་བསུའི་སྔོན་བསུས་དང་ལས་སྣེ་གསུམ་ནས་གྲོ་སོ་ཕྱེ་མར་འདེགས་འབུལ་ཞུས་ནས་ཕེབས་བསུ་གཟབ་རྒྱས་ཞུས་ཡོད།

དེ་ནས་༸གོང་ས་མཆོག་ནས་སྙིང་སྟོབས་གླིང་གི་དབང་པོ་སྐྱོན་ཅན་ཚོའི་འཛིན་ཁང་དུ་གཟིགས་སྐོར་དང་སྦྲགས་སྙིང་སྟོབས་གླིང་གི་ལྷ་ཁང་དུ་ཆིབས་སྒྱུར་བསྐྱངས་ཏེ། འགོ་ལས་ཡོངས་ཀྱི་གཙོས་དབང་པོ་སྐྱོན་ཅན་གྱི་སློབ་ཕྲུག་ཚོར་ཞལ་མཇལ་དང་བཀའ་སློབ་སྩལ་བའི་ཐོག་མར་སྙིང་སྟོབས་གླིང་གི་འགན་འཛིན་སྤྱི་འཐུས་ངག་དབང་ལྷ་མོ་ལགས་ནས་༸གོང་ས་མཆོག་ལ་བསྟོད་པའི་མཆོད་སྤྲིན་ཕུལ་བ་དང་འབྲེལ་སྙིང་སྟོབས་གླིང་གི་ལས་བསྡོམས་སྙིང་བསྡུས་སྙན་སྒྲོན་ཞུས།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྙིང་སྟོབས་གླིང་དུ་༸ཞབས་སོར་འཁོད་བཞིན་པ།

༸གོང་ས་མཆོག་ནས་ཁོང་རྣམ་པའི་གཞན་ཕན་གྱི་སེམས་ཁུར་ལ་བསྔགས་བརྗོད་གནང་བ་དང་སྦྲགས་བཀའ་སློབ་སྩལ་དོན། ཡར་རྒྱས་སྔར་ལས་ལྷག་པ་གཏོང་དགོས་པ་དང་། ལས་ཀ་གང་འདྲ་ཞིག་བྱས་ཀྱང་ཕྱི་གསལ་ནང་གསལ་དང་གླེང་གཞི་མེད་པ་དགོས་གལ་ཆེན་པོ་ཡིན་སྐོར། དབང་པོ་སྐྱོན་ཅན་ཚོས་གཟུགས་པོའི་གནས་སྟངས་ལ་དཀའ་ངལ་ཕྲན་བུ་ཡོད་ནའང་མིའི་ཀླད་པ་ལྡན་ཡོད་སྟབས་ཞུམ་པ་མེད་པར་འབད་བརྩོན་བྱ་དགོས་པ། སྐྱབས་མེད་མགོན་མེད་དུ་ལུས་པའི་དཀའ་ངལ་ཅན་རྣམས་ལ་རོགས་རམ་བྱ་རྒྱུ་དེ་ནི་འཇིག་རྟེན་མི་སྤྱོད་ནས་བརྗོད་ན་ཀུན་སྤྱོད་ལེགས་པོ་ཞིག་དང་ནང་ཆོས་ཀྱི་ཐོག་ནས་བརྗོད་ནའང་ཕན་རླབས་ཆེ་ཤོས་ཤིག་ཡིན་སྐོར་སོགས་ཀྱི་བཀའ་སློབ་ལམ་སྟོན་ཕེབས་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དབང་པོ་སྐྱོན་ཅན་གྱི་སློབ་ཕྲུག་ཚོའི་འཛིན་ཁང་ཁག་ཏུ་གཟིགས་སྐོར་གནང་བཞིན་པ།

༸གོང་ས་༸སྐྱབས་མགོན་ཆེན་པོ་མཆོག་གི་སྙིང་སྟོབས་གླིང་ཁུལ་དུ་མཛད་འཆར་ཁག་གྲུབ་མཚམས་ཆུ་ཚོད་ ༩།༣༠ ཙམ་ལ་བཙུན་དགོན་འཇམ་དབྱངས་ཆོས་གླིང་ལ་ཆིབས་ཞལ་བསྒྱུར་གནང་ཡོད་པའི་གནས་བསྡུས་སུ།།