༢༠༠༩ ཕྱི་ཟླ་ ༥ ཚེས་ ༦ རེས་གཟའ་ལྷག་པ།
༄༅། ཉེ་ཆར་རྒྱ་ནག་གཞུང་གི་ཀྲུང་གོའི་བོད་ལྗོངས་དྲ་བ་ཟེར་བའི་ཐོག ཕྱི་ལོ་ ༢༠༠༩ ཟླ་ ༣ ཚེས་ ༢༠ ཉིན་བཙན་བྱོལ་བོད་གཞུང་ཕྱི་དྲིལ་ལས་ཁུངས་ནས་བོད་ནང་སྔ་ལོའི་ཟླ་ ༣ ཚེས་ ༡༤ ཉིན་ཞི་བའི་ལས་འགུལ་ནང་ཞུགས་མཁན་གྱི་བོད་མི་ཁག་གཅིག་ལ་རྒྱ་ནག་གཞུང་གི་སྤྱི་བདེ་ཉེན་རྟོག་པ་དང་དྲག་ཆས་དམག་མིས་མི་ཆོས་ལས་འདས་པའི་རྡུང་རྡེག་མནར་གཅོད་བཏང་བའི་དངོས་བྱུང་བརྙན་འཕྲིན་དུམ་བུ་ཐུང་ངུ་ཞིག་རྒྱལ་སྤྱིའི་ནང་ཡོངས་གྲགས་བྱས་པར་བརྟེན་རྒྱ་ནག་གཞུང་ངོ་ཚ་ཁ་སྐྱེངས་ཀྱི་གནས་སུ་གྱུར་ནས་མངོན་གསལ་དེ་ཙམ་མེད་པའི་ཐོག་ནས་རྒོལ་གཏམ་སྤེལ་བ་མ་ཟད། བཙན་བྱོལ་བོད་གཞུང་གིས་དངོས་བྱུང་བརྙན་འཕྲིན་དེ་བཞིན་དྲ་གནས་ཐོག་བཞག་མ་ཐག་དྲ་གནས་དེ་ཚོའི་ཁ་བྱང་བཀག་འགོག་བྱས་པ་མ་ཟད། གཡུ་ཊབ་ (Youtube)དྲ་གནས་བརྙན་འཕྲིན་བརྒྱུད་ལམ་ཡང་འཕྲལ་མར་རྒྱ་ནག་ནང་བཀག་འགོག་བྱ་དགོས་པའི་འཇིགས་སྣང་དེ་ཚོས་རྒྱ་ནག་ནང་གཞུང་གིས་བྱས་ཉེས་ཡོངས་རྫོགས་རྦད་དེ་བཀབ་ཐབས་བྱ་གི་ཡོད་པ་རྒྱལ་སྤྱིའི་ཐོག་ཧ་ཅང་གསལ་པོ་ཆགས་ཡོད་པས་རྒྱལ་སྤྱིའི་གསར་འགྱུར་བརྒྱུད་ལམ་ཁག་གི་ཁ་རྡུང་ནན་པོ་ཕོག་ཡོད།
ལར་ནས་བརྙན་འཕྲིན་དེ་རྒྱལ་སྤྱིའི་ཐོག་ཁྱབ་སྤེལ་བྱུང་མ་ཐག་རྒྱ་ནག་གཞུང་གིས་གཞུང་འབྲེལ་གྱི་མངོན་གསལ་དོད་པོས་ལན་འདེབས་ཁ་གསལ་ཞིག་བྱ་མ་ཐུབ་པའི་ངོ་གནོངས་ངོས་ལེན་གྱིས་དྲ་རྒྱའི་བརྒྱུད་ལམ་བཀག་དགོས་ཆགས་པ་དེ་ནས་ར་འཕྲོད་གསལ་པོ་ཆགས་ཡོད།
གལ་སྲིད་རྒྱ་ནག་གཞུང་ཕྱོགས་ལ་གདེངས་སྤོབས་ཡོད་ཚེ་བརྙན་འཕྲིན་དེའི་ནང་ཉེས་རྡུང་གཏོང་མཁན་གྱི་དམག་མི་རེ་གཉིས་ཀྱི་གདོང་པའང་མངོན་གསལ་དོད་པོ་ཡོད་པས་རྒྱལ་སྤྱིའི་ཐོག་ཞིབ་འཇུག་བྱེད་རིན་ཡོད་པ་ཞིག་ཡིན་སྟབས། རྒྱ་ནག་གཞུང་གི་དབང་འཛིན་པ་ཚོས་དྲན་དགོས་པ་དེ་ནི་བཙན་བྱོལ་བོད་གཞུང་ངོས་ནས་སྔ་ལོའི་བོད་ནང་ངོ་རྒོལ་གྱེན་ལངས་བྱུང་མ་ཐག་ནས་བཟུང་རྒྱལ་སྤྱིའི་རང་དབང་ལྟ་རྟོག་ཚོགས་པ་ཞིག་བོད་ནང་གཏོང་དགོས་ཞེས་འབོད་སྐུལ་བྱས་པར་དང་ལེན་ཞུ་རྒྱུའི་བློ་སྟོབས་མེད་པ་དེའང་རང་སྐྱོན་འགེབས་ཐབས་བྱས་པའི་དཔང་རྟགས་ཤིག་ཆགས་ཡོད།
བརྙན་འཕྲིན་དེའི་ནང་དྲག་ཆས་ཉེན་རྟོག་དམག་དང་སྤྱི་བདེ་དམག་མི་དེ་ཚོས་བོད་མི་ཞི་རྒོལ་བ་དེ་དག་ལ་ལག་གཉིས་བསྡམས་བཀྱིགས་དང་ས་ལ་འགྱེལ་བའི་སྟེང་ཚད་ལས་འདས་པའི་ཉེས་རྡུང་གཏོང་སྐབས་འཁྲིས་སུ་ཡོད་པའི་ཉེན་རྟོག་པ་དེ་ཚོས་ད་འགྲིག་སོང་ཟེར་བའི་སྒྲ་སྐད་ཧ་ཅང་གསལ་པོ་ཐོས་རྒྱུ་ཡོད་ལ། ཁོང་ཚོའི་གྱོན་ཆས་དང་དངོས་སུ་འགུལ་བསྐྱོད་ཀྱིས་ཉེས་རྡུང་གཏོང་བའི་བརྙན་འཕྲིན་དུམ་བུ་དེར་ལྷད་རྩ་བ་ནས་མེད་པའི་བདེན་པ་བདེན་རྐྱང་ཞིག་ཡིན་པ་ཤེས་ཐུབ།
བཙན་བྱོལ་བོད་གཞུང་ངོས་ནས་རྒྱལ་སྤྱིའི་སྤྱི་ཚོགས་ལ་མགོ་སྐོར་གཏོང་རྒྱུའི་དམིགས་ཡུལ་མེད་ལ་མགོ་སྐོར་གཏོང་ཐུབ་ཐབས་ཀྱང་མེད་པས་བརྙན་འཕྲིན་དེ་རྒྱལ་སྤྱིའི་སྟེང་ཁྱབ་མ་ཐག་གསར་འགྱུར་བརྒྱུད་ལམ་ཁག་ནས་གཅིག་མཇུག་གཉིས་མཐུད་དུ་རྒྱ་ནག་གཞུང་ལ་བོད་ནང་དངོས་ཡོད་གནས་སྟངས་ཤེས་རྟོགས་སླད་རྒྱལ་སྤྱིའི་གསར་འགོད་པ་གཏོང་གི་མེད་པའི་ཁ་རྡུང་ཕོག་ཡོད།
ང་ཚོས་ཧ་ཅང་གསལ་པོ་ཤེས་ཐུབ་པ་ཞིག་ལ་ཕྱི་ལོ་ ༢༠༠༨ ཟླ་ ༣ ཚེས་ ༡༠ ནས་བཟུང་བོད་ཁྱོན་ཡོངས་སུ་ཞི་རྒོལ་བྱུང་རྗེས་རྒྱལ་སྤྱིའི་གསར་འགོད་པ་ཁག་གཅིག་ཡོངས་གྲགས་སུ་གཏོང་ཐེངས་གཉིས་ལ་བོད་མི་ཚོས་དངོས་ཡོད་ཀྱི་དཀའ་སྡུག་གང་འདྲ་བཤད་ཀྱི་ཡོད་པ་ད་ལྟའང་རྒྱལ་སྤྱིའི་གསར་འགྱུར་ཐོག་ཁྲ་ལྷམ་མེར་གསལ་བཞིན་ཡོད་པས་བོད་ནང་གིས་བོད་མིས་མྱངས་པའི་སྡུག་སྦྱོང་མནར་གཅོད་འཕྲལ་དུ་མཚམས་འཇོག་བྱེད་པ་དང་། ཁོང་ཚོའི་སེམས་ནང་གི་གཏམ་བརྗོད་དེ་ཚོར་ངེས་པར་བདག་སྤྲོད་བྱེད་དགོས་པ་ལས། སྔ་ལོའི་ཟླ་ ༣ ཚེས་ ༡༤ གོང་གི་གནས་ཚུལ་རྣམས་རྦད་དེ་ནག་བསུབ་ཏུ་བཏང་སྟེ་རྒྱ་ནག་གཞུང་གིས་འཆར་གཞི་དང་སྒྲིག་འཛུགས་ཡོད་པའི་སྒོ་ནས་དཔར་ལེན་འཁྲབ་འཁྲིད་བྱས་པའི་ཟླ་ ༣ ཚེས་ ༡༤ ཉིན་གྱི་བརྙན་དཔར་དེ་དག་ཁོ་ནས་ནམ་ཡང་བོད་ནང་གི་སྔ་ལོའི་བོད་མི་ཚོས་སྤེལ་བའི་ཞི་བའི་གྱེན་ལངས་ཀྱི་སྟོབས་ཤུགས་དང་བདེན་པ་བཀབ་མི་ཐུབ་པས་ཧམ་གཏམ་བརྒྱ་ཙམ་བཤད་དེ་བདེན་པ་གཅིག་ཏུ་གྱུར་རྒྱུའི་རེ་ངན་གྱིས་དུས་ཡུན་རིང་པོར་ཁུངས་འཁྱོལ་མི་ཐུབ་པའི་བསླབ་བྱ་སེམས་ལ་བཞག་སྟེ་དུས་རྟག་ཏུ་རྫུན་གཏམ་འབའ་ཞིག་བཤད་དེ་བདེན་པ་ཐོབ་ཐབས་མ་བྱས་པར། གཞན་ལ་ལྟ་བའི་མིག་ཡོད་ཀྱང་། རང་ཉིད་ལྟ་ན་མེ་ལོང་དགོས་ཞེས་པའི་ལེགས་བཤད་ལས་དཔེ་བླངས་ཏེ་རང་ཉིད་ཀྱི་ཉེས་སྐྱོན་འགེབས་ཐབས་ཆེད་མི་གཞན་ལ་མགོ་སྐོར་གཏོང་རྒྱུའི་ཐབས་བྱུས་དེ་ག་དུས་ཡིན་ནའང་ལམ་དུ་རྒྱུགས་མི་སྲིད་པས་སྔ་ཙམ་རྟ་ཁ་གཡང་ས་ནས་འཐེན་ཏེ་འཛམ་གླིང་འདིར་དྲང་བདེན་ལ་དགའ་བའི་སྐྱེ་བོ་ཀུན་གྱི་སེམས་ཁོངས་སུ་ཕོག་ཐུག་གཏོང་མཚམས་འཇོག་དགོས་ལ། གང་ལྟར་བདེན་པ་ནི་ནམ་ཞིག་མཐའ་གསལ་རྒྱུ་ཡོད་པ་ཞིག་ཡིན་པ་འདི་ཁས་ལེན་བྱ་དགོས་པའི་དུས་ལ་བབས་ཡོད།།
འབྲེལ་ཡོད་གནས་ཚུལ།
བོད་གཞུང་ཕྱི་དྲིལ་ལས་ཁུངས་ནས་བོད་ནང་གི་དོན་རྐྱེན་གཉིས་སྐོར་ལ་བརྙན་ཕབ་ཐོག་ནས་བདེན་དཔང་གསལ་སྟོན་གྱི་གསར་འགོད་ལྷན་ཚོགས་སྐོང་ཚོགས་གནང་བ།
