༢༠༠༩ ཕྱི་ཚེས་ ༤ ཚེས་ ༢༨ རེས་གཟའ་མིག་དམར།
༄༅། །འགྲོ་བ་ལྷ་དང་བཅས་པའི་མགོན་༸སྐྱབས་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ ༢༠༠༩ ཕྱི་ཟླ་ ༤ ཚེས་ ༢༦ ཉིན་ཨ་རིའི་གྲོང་ཁྱེར་སན་ཕ་རན་སེ་སི་ཀོ་ནང་Forgotten Intenationalཞེས་པའི་ཚོགས་པས་གོ་སྒྲིག་ཞུས་ཐོག་གཏོང་ཕོད་ཅན་གྱི་འབྱོར་ལྡན་སྦྱིན་པའི་དགེ་ཚན་གྱི་བགྲོ་གླེང་ལྷན་ཚོགས་ཤིག་ཏུ་དབུ་བཞུགས་མཛད་དེ་བཀའ་སློབ་སྩལ་དོན། སྦྱིན་པའི་དགོས་པ་གཙོ་བོ་དེ་གཞན་ཕན་སེམས་ལ་བཅངས་ནས་རང་འཚོ་རྒྱུ་དང་། དེ་ཡང་ཕ་རོལ་པོར་ཕན་པ་ཞིག་དགོས་རྒྱུ་གལ་ཆེན་པོ་ཡིན་སྐོར་དང་། ལྷག་པར་དུ་སྦྱིན་པའི་ཉམས་ལེན་གནང་སྐབས་དུས་དང་། དགོས་པ། ངོ་བོ་སོགས་ཀྱི་ཐོག་ནས་གཏོང་རུང་དང་མི་རུང་གི་གནས་སྟངས་ཀྱང་ཡོད་སྐོར་བཀའ་སྩོལ་སྐབས་ཕྱི་དྲོའི་ཟས་ལ་མི་རོལ་བའི་དགེ་སློང་ཞིག་ལ་ཕྱི་དྲོའི་ཞལ་ལག་ཕུལ་བ་དང་། ཕ་རོལ་པོར་གོ་མཚོན་དང་དུག་སོགས་གཏོང་མི་རུང་བའི་སྦྱིན་པ་དཔེར་འཇོག་གནང་མཛད་ཡོད་པ་དང་། ད་དུང་ཕ་རོལ་པོར་སྦྱིན་པ་གཏོང་སྐབས་ཕ་རོལ་པོའི་ཡུལ་དེ་དམན་པར་འཛིན་ནས་སྦྱིན་པ་གཏོང་ན་མ་འགྲིག་པར་སྦྱིན་པ་གཏོང་སྐབས་གུས་པའི་བློ་དགོས་པ་གལ་ཆེ་ཡིན་སྐོར་བཀའ་སྩལ་བ་མ་ཟད། བཟང་པོའི་བསླབ་བྱ་རྒྱག་རྒྱུ་དང་། ཤེས་བྱ་ཡོན་ཏན་སློབ་རྒྱུ་སོགས་ཀྱང་སྦྱིན་པའི་རྒྱུ་གཙོ་བོ་ཡིན་སྐོར་བཀའ་སྩལ་ཡོད།
༸གོང་ས་༸སྐྱབས་མགོན་ཆེན་པོ་མཆོག་སན་ཕ་རན་སེ་སི་ཀོའི་ཁྱིམ་མེད་དབུལ་ཕོངས་ཁང་དུ་ལྗགས་སྨིན་མཛད་བཞིན་པ།
ཐེངས་འདིའི་མཛད་འཆར་གོ་སྒྲིག་ཞུ་མཁན་དབུལ་ཕོངས་ཉམ་ཐག་ལ་རོགས་སྐྱོར་གནང་མཁན་Forgotten Intenationalཞེས་པའི་ཚོགས་པའི་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སན་ཕ་རན་སེ་སི་ཀོ་ནང་གི་ཁྱིམ་མེད་ཉམ་ཐག་གནས་ཡུལ་Martin De Porres Houseཞེས་པར་ཆིབས་སྒྱུར་བསྐྱངས་ཡོད་པ་མ་ཟད། ཉམ་ཐག་རྣམས་ཀྱི་ཉིན་གུང་གི་ཞལ་ལག་བཞེས་ཡུལ་གྱི་གསོལ་ཚིགས་ཁང་Soup Kitchenདུ་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་ཏེ་སྐུ་ཉིད་ནས་ཁྱིམ་མེད་དབུལ་ཕོངས་ཉམ་ཐག་དེ་དག་ལ་ཉིན་གུང་གི་ཞལ་ལག་བཀྱགས་གནང་མཛད་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་ནས་སན་ཕ་རན་སེ་སི་ཀོའི་ཁྱིམ་མེད་དབུལ་ཕོངས་ཁང་དུ་ཉམ་ཐག་རྣམས་ལ་ཉིན་གུང་གསོལ་ཚིགས་བཀྱགས་གནང་བཞིན་པ།
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་ཕེབས་དོན། མགོན་པོ་གང་ཉིད་ས་གནས་དེར་ཆིབས་སྒྱུར་བསྐྱངས་རྒྱུ་བྱུང་བར་ཐུགས་དགྱེས་ཚོར་ཆེན་པོ་བྱུང་། ཞེས་དང་ལྷག་དོན་དུ་མགོན་པོ་གང་ཉིད་ནས། ང་ཚོའི་མི་ཚེ་ནི་གཞན་ལ་བརྟེན་ཏེ་གནས་ཡོད། ངོས་ཀྱང་གཞན་ལ་བརྟེན་ནས་ཡོད། ཁྱེད་རང་ཚོ་ཚང་མ་མིའི་སྤྱི་ཚོགས་ཤིག་ནང་གནས་ཡོད་སྟབས་བདེ་སྐྱིེད་དང་སྤོབས་པ་སྐྱེས་དགོས་ཀྱི་རེད། ཅེས་བཀའ་སྩལ་ཏེ་ཁོང་རྣམ་པར་སེམས་ཤུགས་སྤར་གནང་སྟེ་མགོན་པོ་གང་ཉིད་ཀྱང་ཁྱིམ་མེད་པ་ཞིག་ཡིན། ཞེས་བཀའ་སྩལ་ཡོད།
༸གོང་ས་༸སྐྱབས་མགོན་ཆེན་པོ་མཆོག་ནས་སན་ཕ་རན་སེ་སི་ཀོའི་ཁྱིམ་མེད་དབུལ་ཕོངས་ཉམ་ཐག་པ་རྣམས་ལ་བཀའ་སློབ་སྩོལ་བཞིན་པ།
དབུལ་ཕོངས་ཉམ་ཐག་ལ་རོགས་སྐྱོར་གནང་མཁན་ Forgotten Intenational ཞེས་པའི་ཚོགས་པའི་གཙོ་འཛིན་ཊོམ་ནཱ་ཛ་རའོ་(Tom Nazario) ཡིས་མཛད་རིམ་ངོ་སྤྲོད་གནང་སྐབས་ཁོང་གིས་ལོ་ངོ་གཉིས་ཙམ་སྔོན་ལ་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ནང་ཆིབས་སྒྱུར་བསྐྱངས་སྐབས་དབུལ་ཕོངས་རྣམས་ལ་ཞལ་མཇལ་གསོལ་འདེབས་ཞུས་ཡོད་པར་མགོན་པོ་གང་ཉིད་ནས་འཕྲན་མར་ཞལ་བཞེས་བཟང་པོ་སྩལ་བ་མ་ཟད། ད་ལྟ་རང་མཇལ་འཕྲད་གནང་རྒྱུར་ཐུགས་འདོད་ཡོད། ཅེས་བཀའ་ལན་ཕེབས་སྐོར་ལུང་འདྲེན་གནང་བ་དང་སྦྲགས་༸གོང་ས་༸སྐྱབས་མགོན་ཆེན་པོ་མཆོག་ནི་དབུལ་ཕོངས་ཉམ་ཐག་རྣམས་ལ་ཐུགས་བརྩེ་བ་ཆེན་པོས་གཟིགས་རྟོག་གནང་མཁན་ཞིག་རེད། ཅེས་གསུངས་ཡོད། ཐེངས་འདིའི་མཛད་འཆར་དེའི་ཐོག་ཁྱིམ་མེད་དབུལ་ཕོངས་ཉམ་ཐག་བརྒྱ་ལྷག་ཙམ་བཅར་ཡོད་འདུག
