༢༠༠༩ ཕྱི་ཚེས་ ༤ ཚེས་ ༢༨ རེས་གཟའ་མིག་དམར།
༄༅། །༢༠༠༩ ཕྱི་ཟླ་ ༤ ཚེས་ ༢༥ ཉིན་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མངའ་སྡེ་ཁལ་ལི་ཕོ་ནི་ཡའི་གྲོང་ཁྱེར་བར་ཀི་ལིའི་(Berkeley)དུ་ཆིབས་སྒྱུར་བསྐྱངས་པར་ཆེ་བསྟོད་ཀྱི་ཕེབས་བསུ་ཞུ་སླད་བར་ཀི་ལིའི་སྤྱི་ཁྱབ་མཆོག་ནས་བར་ཀི་ལིའི་གྲོང་སྡེ་ལས་ཁུངས་སུ་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་ཡོད་འདུག ཉིན་དེར་༸གོང་ས་མཆོག་ནས་བར་ཀི་ལིའི་གཙུག་ལག་སློབ་གཉེར་ཁང་དུ་སློབ་ཕྲུག་དང་མི་མང་ཁྲི་ཚོ་བརྒལ་བར་བྱམས་བརྩེ་བརྒྱུད་ནས་ཞི་བདེ་(Peace through Campassion)ཞེས་པའི་བརྗོད་གཞིའི་ཐོག་ལམ་སྟོན་བཀའ་སློབ་སྩོལ་སྐབས། མིའི་རྒྱུད་ལ་བྱམས་བརྩེ་དགོས་རྒྱུ་ནི་གལ་ཆེ་ཡིན་སྐོར་དང་། དེས་རང་ཉིད་ཀྱི་སེམས་དང་འཕྲོད་བསྟེན་ལ་ཕན་རླབས་ཆེན་པོ་ཡོད་པ་མ་ཟད། རིམ་པས་ཁྱིམ་ཚང་དང་། ཁྱིམ་མཚེས། དེ་ནས་སྤྱི་ཚོགས་བཅས་པར་ཕན་རླབས་ཤུགས་ཆེ་ཡོང་རྒྱུ་ཡིན་པ་སོགས་དང་། དེས་འཛམ་གླིང་འདིའི་ནང་གི་དཀའ་ངལ་མང་དག་ཅིག་སེལ་ཐུབ་ཀྱི་རེད། ཅེས་བཀའ་སྩལ་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བར་ཀི་ལིའི་གཙུག་ལག་སློབ་གཉེར་ཁང་དུ་བྱམས་བརྩེ་བརྒྱུད་ནས་ཞི་བདེ་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩོལ་བཞིན་པ།
ཐེངས་འདིར་ཧི་མ་ལ་ཡའི་ཐེབས་རྩས་གོ་སྒྲིག་ཞུས་པའི་འཛད་འཆར་དེའི་ཐོག་གཙུག་ལག་སློབ་གཉེར་ཁང་དེའི་སློབ་ཕྲུག་གཙོ་བོར་འགྱུར་བའི་གཞོན་སྐྱེས་རྣམས་ལ་དམིགས་ནས། དུས་རབས་ཉེར་གཅིག་པའི་མི་རྣམས་ཀྱིས་བྱམས་བརྩེ་དང་ཤེས་ཡོན་གཉིས་ལྡན་གྱི་མི་ཞིག་བྱ་རྒྱུར་འབད་རྩོལ་བྱ་དགོས་པ་དང་། དེ་འདྲ་བྱེད་ཐུབ་པ་བྱུང་ཚེ་སྤྱི་ཚོགས་ནང་དྲག་སྤྱོད་དང་ཉེས་སྤྱོད་ཀྱི་རིགས་རང་བཞིན་གྱི་ཉུང་དུ་འགྲོ་གི་རེད། ཅེས་བཀའ་ཕེབས་ཡོད་འདུག
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བྱམས་བརྩེ་བརྒྱུད་ནས་ཞི་བདེ་ཞེས་པའི་བརྗོད་གཞིའི་ཐོག་བཀའ་སློབ་མ་སྩོལ་སྔོན་འདི་གར་བཅར་མི་རྣམས་ལ་འཚམས་འདྲི་གནང་བཞིན་པ།
ཐེངས་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བར་ཀི་ལིའི་གཙུག་ལག་སློབ་གཉེར་ཁང་དུ་ཆིབས་སྒྱུར་བསྐྱངས་ཐེངས་གཉིས་པ་དེ་ཡིན་འདུག
བར་ཀི་ལིའི་གཙུག་ལག་སློབ་གཉེར་ཁང་གི་མཛད་འཆར་ཁག་གྲུབ་རྗེས་མགོན་པོ་གང་ཉིད་ནས་བྱང་ཁལ་ལི་ཕོ་ནི་ཡ་དང་དེའི་ཉེ་འཁོར་ནས་ཕེབས་པའི་བོད་རིགས་དང་། ཧི་མ་ལ་ཡའི་རི་རྒྱུད་ཀྱི་མི་རིགས། སོག་པོ་བཅས་དད་ལྡན་མི་གྲངས་ ༣༠༠༠ ལྷག་ཙམ་ལ་བཀའ་སློབ་བཀའ་དྲིན་སྩོལ་སྐབས་རྒྱུན་ལྡན་བཞིན་མགོན་པོ་གང་ཉིད་ཀྱི་སྐུ་ཚེ་ཧྲིལ་པོའི་རླབས་ཆེན་གྱི་མཛད་འཁུར་གསུམ་གྱི་ནང་ནས་གསུམ་པ་སྟེ་བོད་དོན་སྐོར་བཀའ་སློབ་ཕེབས་དོན། བོད་མིའི་འཐབ་རྩོད་དེ་ནི་ལོ་ངོ་ ༥༠ འདས་ཟིན་པའི་འཐབ་རྩོད་ཅིག་ཡིན་རུང་། དེ་ནི་དྲང་བདེན་གྱི་འཐབ་རྩོད་ཅིག་ཡིན་སྟབས་ད་དུང་ཡང་འཐབ་རྩོད་དེར་རྒྱབ་སྐྱོར་གནང་མཁན་ནུབ་ཕྱོགས་པའི་རྒྱལ་ཁབ་གཙོ་བོར་འགྱུར་བའི་རྒྱ་མི་རིགས་དང་བཅས་པ་ཇེ་མང་དུ་འགྲོ་བཞིན་པ་དེ་ནི་འཐབ་རྩོད་དེའི་རྒྱལ་ཁ་ཞིག་ཡིན་ལུགས་དང་། ཚང་མས་རེ་བ་བཟང་ས་ནས་རྒྱག་རྒྱུ་དང་གྲ་སྒྲིག་སྡུག་ས་ནས་བྱས་ཏེ་སེམས་ཤུགས་ཞུམ་པ་མེད་པའི་ཐོག་གནས་ཐུབ་པ་དགོས་ཀྱི་རེད། ཅེས་བཀའ་སྩལ་ཡོད།
ཐེངས་འདིར་བྱང་ཁལ་ལི་ཕོ་ནི་ཡའི་བོད་རིགས་སྤྱི་མཐུན་ཚོགས་པས་གོ་སྒྲིག་ཞུས་པའི་བཀའ་སློབ་དེར་བཅར་མི་མང་ཆེ་བས་གོ་རྟོགས་ཡོང་སླད་བཀའ་སློབ་དབྱིན་སྐད་ཐོག་གནང་སྐྱོང་ཡོང་བའི་འབོད་སྐུལ་ཞུས་ཡོད་པར་མགོན་པོ་གང་ཉིད་ནས། དཔལ་ན་ལ་ནས་བོད་དུ་དར་བའི་དྲི་མ་མེད་པའི་ཆོས་བརྒྱུད་ཆེན་པོ་དེ་ཁ་གསལ་དང་གཏིང་ཟབ་ཅིག་རྟོགས་སླད་བོད་མི་ཙམ་མ་ཟད། བོད་བརྒྱུད་ནང་བསྟན་ལ་ཐུགས་སྣང་གནང་མཁན་ཚང་མས་བོད་སྐད་སྦྱོང་རྒྱུ་གལ་ཆེ་ཡིན་སྐོར་བཀའ་སློབ་སྩལ་བ་མ་ཟད། བོད་མི་ཚོས་སོ་སོའི་བུ་ཕྲུག་ཚོར་རང་མི་རིགས་ཀྱི་སྐད་ཡིག་དང་གོམས་སྲོལ་སོགས་ངོ་སྤྲོད་བྱ་སླད་བོད་ཡིག་སློབ་ཁྲིད་བྱ་རྒྱུ་ནི་དེ་བས་གལ་ཆེ་བ་ཡིན་ཞེས་སོགས་ཀྱི་བཀའ་སློབ་ཟབ་མོ་སྩལ་ཡོད།
ཐེངས་འདིའི་མཛད་སྒོ་དེའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བྱང་ཁལ་ལི་ཕོ་ནི་ཡའི་བོད་རིགས་སྤྱི་མཐུན་ཚོགས་པའི་ལོ་འཁོར་གྱི་ལས་བསྡོམས་སྙན་སྒྲོན་ཞུས་ཡོད་པ་དང་ཆབས་ཅིག་ཁོང་རྣམ་པས་འདི་ལོ་བཙན་བྱོལ་ནང་འབྱོར་ཏེ་ལོ་ངོ་ལྔ་བཅུ་འཁོར་བའི་དུས་དྲན་དང་སྟབས་བསྟུན་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་ཞུ་ཆེད་དཔའ་བོ་དཔའ་མོའི་མཚན་རྣམས་ཕོ་ཁེབས་ཅིག་གི་སྟེང་ལ་འཁོད་རྒྱུའི་ལས་འགུལ་ཞིག་སྤེལ་གནང་ཡོད་པ་དང་། ཕོ་ཁེབས་ཀྱི་ཕུད་དེ་མགོན་པོ་གང་ཉིད་ལ་གཟིགས་འབུལ་ཞུས་ཡོད་པ་མ་ཟད། དེའི་ཐོག་མགོན་པོ་གང་ཉིད་ནས་མཚན་རྟགས་ཀྱང་བཀོད་གནང་བཀའ་དྲིན་ཆེ་བ་མཛད་ཡོད་འདུག
