ཕྱི་ལོ་ ༢༠༠༩ ཟླ་ ༤ ཚེ་ ༧ རེས་གཟའ་མིག་དམར།
འཕྲོད་བསྟེན་དྲུང་ཚབ་ནས་འཕྲོད་བསྟེན་བཀའ་བློན་གྱི་གཏམ་བཤད་སྒྲོག་སྦྱང་གནང་བཞིན་པ།
༄༅། །ཕྱི་ལོ་ ༢༠༠༩ ཕྱི་ཟླ་ ༤ ཚེས་ ༧ ཉིན་འཛམ་གླིང་འཕྲོད་བསྟེན་ཉིན་མོ་འཁེལ་གྱི་ཡོད་སྟབས། བོད་གཞུང་འཕྲོད་བསྟེན་ལས་ཁུངས་ནས་ཕྱེད་ཡོལ་ཆུ་ཚོད་ ༢ ནས་འཛམ་གླིང་འཕྲོད་བསྟེན་ཉིན་མོ་སྲུང་བརྩི་ཞུ་སླད་
སྨན་པ་པ་སངས་སྒྲོལ་མ་ལགས་ནས་ཛ་དྲག་གི་སྨན་བཅོས་བྱ་ཐབས་སྐོར་ལ་གཏམ་བཤད་གནང་བཞིན་པ།
གོ་སྒྲིག་ཞུས་ཏེ་ལས་བྱེད་གསོལ་ཚིགས་ཡང་སྟེང་ཚོགས་ཁང་དུ་ལས་ཁུངས་ཁག་གི་ལས་བྱེད་རྣམས་ཚང་འཛོམས་གནང་ཐོག་འཕྲོད་བསྟེན་ཟུང་དྲུང་ཚེ་རིང་དབྱངས་སྐྱིད་ལགས་ནས་མཛད་རིམ་ངོ་སྤྲོད་གནང་རྗེས་དཔལ་ལྡན་
འཕྲོད་བསྟེན་ལས་ཁུངས་ཀྱི་དྲུང་འཕར་སྟོབས་རྒྱལ་ཚེ་རིང་ལགས་ནས་ཐུགས་རྗེ་ཆེ་ཞུའི་གཏམ་བཤད་གནང་བཞིན་པ།
འཕྲོད་བསྟེན་བཀའ་བློན་མཆོག་ནས་འཛམ་གླིང་འཕྲོད་བསྟེན་ཉིན་མོའི་ཐོག་ཡོངས་ཁྱབ་ཀྱི་གཏམ་བཤད་འཕྲོད་བསྟེན་དྲུང་ཚབ་ཤོ་ཟུར་བསོད་ནམས་ཆོས་འཕེལ་ལགས་ནས་སྒྲོག་སབྱངས་གནང་བའི་ནང་འཁོད་དོན།
ཕྱི་ཟླ་ ༤ ཚེས་ ༧ ཉིན་མོ་འདི་ནི་ཕྱི་ལོ་ ༡༩༤༨ ལོར་འཛམ་གླིང་འཕྲོད་བསྟེན་ལྷན་ཚོགས་WHOདབུ་བརྙེས་པའི་ཉིན་མོ་དེ་ཡིན་ཅིང་། ཉིན་མོ་འདི་ལོ་ལྟར་འཛམ་གླིང་འཕྲོད་བསྟེན་ཉིན་མོར་ས་ཁུལ་གང་སར་སྲུང་བརྩི་ཞུ་གི་ཡོད་པ་དང་། འཛམ་གླིང་འཕྲོད་བསྟེན་ལྷན་ཚོགས་ནས་སྲུང་བརྩི་ཞུ་ཕྱོགས་ལོ་ལྟར་འཕྲོད་བསྟེན་གནས་དོན་གལ་གནད་ཆེ་བ་ཞིག་གི་ཐོག་དམིགས་བསལ་ལས་འཆར་གཏན་འབེབས་གསལ་བསྒྲགས་གནང་གི་ཡོད་པ་ལྟར། འདི་ལོ་ ༢༠༠༩ འཕྲོད་བསྟེན་ཉིན་མོ་འདི་ནས་བཟུང་ལོ་འཁོར་གཅིག་རིང་། ཛ་དྲག་སྨན་བཅོས་སླད་སྨན་ཁང་གི་མཐུན་རྐྱེན་ལེགས་སུ་་བཏང་སྟེ། ནད་པའི་སྲོག་སྐྱོབ་བྱ་རྒྱུ།(Save lives, Make hospitals safe in emergencies)ཞེས་གཏན་འབེབས་གསལ་བསྒྲགས་གནང་ཡོད། དེ་ནི་དེང་སང་འཛམ་གླིང་ས་ཁུལ་གང་སར་འགྲོ་བ་མིའི་ཤེས་ཚད་ཀྱི་ནུས་པ་གོང་མཐོར་ཕྱིན་ཡང་། བསམ་སྤྱོད་ཚུལ་མཐུན་མ་བྱུང་བའི་རྐྱེན་གྱིས་སྔར་མ་གྲགས་པའི་ནད་གཡམ་སྣ་ཚོགས་འཕེལ་བ། རི་ཀླུང་མེ་ཤོར། ས་གཡོམ་དང་ཆུ་ལོག སད་ཐན་སོགས་འབྱུང་བས་གནོད་སྐྱོན། འཕྲུལ་འཁོར་གྱིས་གནོད་སྐྱོན་སོགས་ཀྱི་རྐྱེན་པས་མི་ཙམ་མིན་པར་སེམས་ཅན་གྲངས་ལས་འདས་པར་ཛ་དྲག་རྐྱེན་ངན་སྔར་བས་མང་བ་འཕྲད་བཞིན་པར་བརྟེན། གང་སར་ཛ་དྲག་གནས་ཚུལ་འདི་རིགས་འབྱུང་སྐབས་སྨན་བཅོས་ཀྱི་མཐུན་རྐྱེན་དང་ལྟ་རྟོག་སྔར་ལས་གཟབ་ཏུ་གཏོང་རྒྱུ་གལ་ཆེར་མཐོང་བས་ཡིན། རང་རེ་བཙན་བྱོལ་བོད་མིའི་སྤྱི་ཚོགས་ཁྲོད་དུའང་དེ་རིང་གི་ཉིན་མོ་ནས་བཟུང་སོ་སོའི་སྡོད་ཡུལ་ས་གནས་སུ་ཡོད་པའི་སྨན་ཁང་སོ་སོར་ཛ་དྲག་སྨན་བཅོས་སྐབས་སུ་མཁོ་བའི་མཐུན་རྐྱེན་གང་ས་ནས་ཡར་རྒྱས་གཏོང་རྒྱུར་འབད་བརྩོན་གནང་དགོས་པ་དང་། ལྷག་པར་སྨན་ཁང་སོ་སོའི་ནང་ལས་ཀྱི་སྣེ་མོར་གཏོགས་པའི་གཙོ་བོ་སྨན་པ་དང་། སྨན་ཞབས། འཕྲོད་ལས། འབྲེལ་ཡོད་རྣམས་ནས་སྨན་བཅོས་དང་འབྲེལ་བའི་སྤྱི་ཚོགས་ཞབས་ཞུར་དུས་དང་རྣམ་པ་ཀུན་ཏུ་གྲ་སྒྲིག་ཨང་སར་དགོས་པ་མ་ཚད། ནད་པར་སྨན་བཅོས་དང་གཟིགས་རྟོག་གནང་རྒྱུ་སོ་སོའི་སྐབས་བབ་ལས་འགན་ཙམ་མ་ཡིན་པར་ནད་ཀྱིས་མནར་བའི་སྐྱེ་བོ་དེ་དག་སྡུག་བསྔལ་ལས་སྐྱོབ་ཐབས་བྱམས་བརྩེ་དང་། ཕན་སེམས་བཅས་ཀྱི་ཀུན་ནས་བླང་པའི་སེམས་སྐྱེད་ཀུན་སློང་བཟང་པོ་ངེས་པར་གཅང་དགོས་པ་ཡིན། དེ་ནི་རང་གཞན་གཉིས་ཕན་གྱི་གོ་སྐབས་བཟང་པོ་ཞིག་ཏུ་སྒྱུར་ཐུབ་པ་ཡིན་པས་རྒྱུན་དུ་སེམས་བཅང་བྱ་དགོས།
ད་ཆ་རང་རེའི་སྤྱི་ཚོགས་ནང་ཛ་དྲག་སྨན་བཅོས་ཀྱི་མཐུན་རྐྱེན་སྒོ་གང་ས་ནས་ཟབ་ཏུ་གཏོང་ཐབས་ལ་འབད་པ། དེ་དང་ཆབས་ཅིག་ཏུ་གཞིས་བྱེས་གཉིས་ཀྱི་སྤྱི་ཚོགས་ནང་གཉན་ནད་རེག་དུག་ (HIV/AIDS) གི་ནད་གཞི་འགོག་བཅོས་སྐོར་མང་ཚོགས་ཀྱི་གོ་རྟོགས་ཆུད་ཚད་སྤེལ་རྒྱུར་རང་ཅག་འབྲེལ་ཡོད་རྣམས་ནས་དམིགས་བསལ་ནུས་ཤུགས་སྤེལ་དགོས་རྒྱུ་དང་། མང་ཚོགས་ནས་ཀྱང་དོ་སྣང་སེམས་ཁུར་ལེན་དགོས་པའི་འབོད་སྐུལ་སྔ་ལོ་ནས་ཞུས་ཡོད་པ་དང་། དེ་བཞིན་མ་དང་བྱིས་པའི་འཕྲོད་བསྟེན། ཀྲི་སྦི་སྔོན་འགོག་དང་སྨན་བཅོས་ཚགས་ཚུད། འཕྲོད་བསྟེན་ཉེན་སྲུང་བྱ་རྒྱུ་སོགས་དེང་རབས་དང་མཐུན་པའི་མདུན་སྐྱོད་བྱ་རྒྱུ་ནི་ཧ་ཅང་གལ་ཆེ་ཡིན། ཡང་ནད་གཞི་མང་པོ་ཞིག་གང་ཟག་སོ་སོའི་ཟས་སྤྱོད་དང་ཁོར་ཡུག་གནས་སྟངས་ཐོག་ནས་ཡོང་གི་ཡོད་སྟབས་ཟས་སྤྱོད་སྐོར་གོ་རྟོགས་སྤེལ་རྒྱུ་དང་ཁོར་ཡུག་སྲུང་སྐྱོབ་བྱ་རྒྱུ་སོགས་ལས་ཁུངས་བྱེ་བྲག་པ་གཅིག་དང་། སྤྱི་ཚོགས་བྱེ་བྲག་པ་གཅིག འཕྲོད་བསྟེན་ལས་བྱེད་བཅས་ཀྱི་འགན་ཁུར་ཡིན་པ་ལྟར་སྣང་མེད་ཚོར་མེད་དུ་མ་སོང་བར་གང་ཟག་རེ་རེ་དང་འབྲེལ་བའི་འགན་ཞིག་ཡིན་སྟབས། མི་མང་ཚང་མས་འགན་ལེན་ཕྱར་གྲུ་མཉམ་འདེགས་གནང་དགོས་པའི་འབོད་སྐུལ་ནན་པོ་ཞུ་རྒྱུ་ཡིན། མཐའ་དོན་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱར་ཚུལ་བསྟན་འགེག་བར་ཕྲ་མོ་ཙམ་ཡང་མི་བཞེས་པར་སྐུ་ཚེ་མཛད་འཕྲིན་རྒྱས་པ་དང་། གཞིས་བྱེས་གཉིས་སུ་འཕྲོད་བསྟེན་གྱི་བྱ་གཞག་གོང་ནས་གོང་དུ་འཕེལ་བའི་རེ་སྨོན་ཞུ་རྒྱུ་བཅས། ཞེས་གཏམ་བཤད་གྲུབ་རྗེས་བདེ་ལེགས་སྨན་ཁང་གི་སྨན་པ་པ་སངས་སྒྲོལ་མ་ལགས་ནས་ཛ་དྲག་སྨན་བཅོས་སླད་སྨན་ཁང་གི་མཐུན་རྐྱེན་ལེགས་སུ་བཏང་སྟེ། ནད་པའི་སྲོག་སྐྱོབ་བྱ་རྒྱུ་ཞེས་པའི་བརྗོད་གཞིའི་ཐོག་གཏམ་བཤད་གནང་རྗེས་འཕྲོད་བསྟེན་དྲུང་འཕར་སྟོབས་རྒྱལ་ཚེ་རིང་ལགས་ནས་ཐུགས་རྗེ་ཆེ་ཞུའི་གཏམ་བཤད་དང་གྲུབ་མཚམས་ལྷན་ཁང་ཁག་ས་བགོས་གནང་བ་གཞིར་བཟུང་ཁོར་ཡུག་ཁག་གཙང་བཟོ་ལེགས་པར་གནང་། ལས་བྱེད་རྣམ་པས་ལྷག་བསམ་ཆེན་པོས་ཆ་བགོས་གནང་བའི་གཙང་བཟོའི་ལས་ཀ་གྲུབ་རྗེས་འཕྲོད་བསྟེན་ལས་ཁུངས་ནས་གསོལ་ཇ་དང་། བཞེས་ཏོག ཆབ་མངར་བཅས་ཀྱང་གནང་ཡོད་པ་དང་། འཛམ་གླིང་འཕྲོད་བསྟེན་ཉིན་མོར་མཉམ་ཞུགས་གནང་མཁན་བོད་མི་མང་སྤྱི་འཐུས་རྒྱུན་ལས་དང་། ལྷན་ཁང་སོ་སོའི་དྲུང་ཆེ་ཆུང་བཅས་ལས་བྱེད་ཆེ་ཕྲ་ཆུང་གསུམ་མཉམ་ཞུགས་གནང་བ་བཅས་ཀྱི་གནས་བསྡུས་སུ།
