ཕྱི་ལོ་ ༢༠༠༩ ཟླ་ ༤ ཚེས་ ༡༨ རེས་སྤེན་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ། ཕྱི་ཟླ་ ༤ ཚེས་ ༡༤ གཡས་གཡོན་དུ་ཁམས་འབའ་ཐང་རྫོང་ཁོངས་སྤོ་གུར་གཤིས་ཤང་ཁོངས་སྒང་རུ་ལུང་པར་སྤྱི་བདེ་ཉེན་རྟོག་པ་དང་དྲག་ཆས་ཉེན་རྟོག་དམག་མི་གྲངས་ ༧༠ ཙམ་སླེབས་ཏེ་གྲོང་ཚོའི་ནང་གི་དུད་ཚང་རེ་རེ་བྱས་ཏེ་སྔོག་བཤེར་བྱས་ཡོད་པ་དང་། ཉུང་མཐར་བོད་མི་གྲངས་ ༡༠ ཙམ་འཛིན་བཟུང་བྱས་མ་ཚར་བར་རྒྱ་དམག་གིས་ས་གནས་ནས་ཕྱིར་ཐོན་རྒྱུ་མིན་པའི་ཁ་གཏམ་ཡང་ཤོད་བཞིན་ཡོད་འདུག ས་གནས་སུ་གནས་ཚུལ་དེ་ལྟར་ཐོན་དགོས་པའི་རྒྱུ་རྐྱེན་གཙོ་བོ་ནི་ད་ལོའི་ཕྱི་ཟླ་ ༣ ཚེས་ཤར་དུ་སུས་བརྒྱབ་མིན་མི་ཤེས་པར་འབའ་ཐང་རྫོང་ཁོངས་གུར་གཤིས་ཤང་ཉེན་རྟོག་ལས་ཁུངས་སུ་འབར་གས་ཀྱི་དོན་རྐྱེན་ཞིག་བྱུང་ཡོད། དུས་ཚོད་དེའི་གཡས་གཡོན་དུ་ས་གནས་དེར་རྒྱ་བོད་ཡིག་རིགས་གཉིས་ཐོག་རྒྱ་མི་བོད་ནས་མར་རྒྱུག བོད་ཀྱི་བདག་པོ་བོད་མི་ཡིན། ཞེས་པ་སོགས་ཀྱི་འཕྲེད་དར་ཆེན་པོ་བཀལ་བ་སོགས་ཀྱི་གནས་ཚུལ་ཐོན་རྗེས། བོད་རྒྱ་ཡིག་རིགས་ཤེས་མཁན་གྱི་བོད་མི་བཞིར་དོགས་གཞི་བྱས་ཏེ་འཛིན་བཟུང་བྱེད་པར་ཡོང་སྐབས། བོད་མི་དེ་དག་ས་གནས་ནས་བྲོས་བྱོལ་དུ་འགྲོ་དགོས་བྱུང་ཡོད།
སྤྱི་བདེ་ཉེན་རྟོག་པས་མུ་མཐུད་ཞིབ་འཇུག་བྱས་ཏེ་ས་གནས་སུ་ཡོད་པའི་སྐྱེས་པ་ཚང་མར་བསུན་གཙེར་ཤུགས་ཆེ་བཟོས་སྟབས་སྐྱེས་པ་མང་པོ་ཞིག་རང་གནས་སུ་སྡོད་མ་ཐུབ་པར། ས་ཆ་གཞན་ལ་ཉེན་གཡོལ་དུ་བསྐྱོད་ཡོད་པར་བརྟེན་ས་གནས་དེར་ས་ཞིང་རྨོས་མ་ཐུབ་པར་ལུས་ཡོད་པའི་གནས་ཚུལ་ཐོན་འདུག ཕྱི་ཟླ་ ༣ པའི་ནང་འབར་གས་ཀྱི་དོན་རྐྱེན་དང་། ཕྱི་ཟླ་ ༤ ཚེས་ ༡༤ མཚན་མོར་ས་གནས་སུ་དམག་མིའི་སྡོད་སྒར་མེ་བསྲེགས་ཐེབས་པའི་གནས་ཚུལ་ཐོན་ཡོད་ཀྱང་མི་སྣ་ཤི་རྨས་སོགས་གང་ཡང་མ་བྱུང་བར་གཞིགས་ན། ས་གནས་སུ་ཡོད་པའི་དྲག་ཆས་དམག་མི་དེ་ཚོས་ཡུལ་མིར་དམ་བསྒྲགས་བྱ་རྒྱུའི་ཆེད་དུ་དྲག་པོའི་རྣམ་པ་མངོན་པའི་ལས་འགུལ་རང་བཞིན་བརྩམས་ཀྱི་མེད་དམ་སྙམ་པའི་དོགས་པ་བྱ་དགོས་པ་ཞིག་རང་བཞིན་དུ་ཆགས་ཡོད་པ་རེད། ཡིན་ནའང་རྩ་བའི་ཆར་ས་གནས་ཡུལ་མི་ཚོས་སྔོག་བཤེར་བྱེད་མཁན་གྱི་དམག་མི་ཚོར་ངོ་རྒོལ་གྱི་རྣམ་འགྱུར་ཤུགས་ཆེ་འདོན་བཞིན་ཡོད་པ་མ་ཟད། སྔ་ལོའི་ཕྱི་ཟླ་ ༥ པའི་ནང་དུའང་རྒྱ་ནག་གཞུང་ནས་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་མཁན་གྱི་ལས་བྱེད་ས་གནས་སུ་ཡོང་སྐབས་མང་ཚོགས་ནས་ངོ་རྒོལ་གྱི་རྣམ་འགྱུར་ཤུགས་ཆེ་བཏོན་ཡོད་པའི་གནས་ཚུལ་ཡང་ཐོན་མྱོང་ཡོད།།
