༢༠༠༩ ཕྱི་ཟླ་ ༤ ཚེས་ ༢༣ རེས་གཟའ་ཕུར་བུ།
༄༅། །བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱི་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་ནས་༢༠༠༩ ཕྱི་ཟླ་ ༤ ཚེས་ ༢༢ རེས་གཟའ་ལྷག་པའི་ཉིན་གསུང་གསལ། རྒྱ་ནག་གཞུང་ནས་བོད་ནང་གི་བོད་རིགས་བུད་མེད་གཅིག་ལ་ལོ་གཉིས་ཕྱིར་འགྱངས་ཀྱིས་སྲོག་ཐོག་ཉེས་ཆད་བཏང་བ་དང་བུད་མེད་གཞན་གཉིས་ལ་ཡུན་རིང་བཙོན་འཇུག་བྱ་རྒྱུའི་ཁྲིམས་ཆད་བཏང་བར་བཙན་བྱོལ་བོད་གཞུང་ངོས་ནས་བློ་འཚབ་ཆེན་པོ་ཡོད། དྲང་བདེན་གྱི་ཁྲིམས་ཞིབ་དང་ཡོངས་གྲགས་ཀྱི་ཁྲིམས་ཀྱི་བརྒྱུད་རིམ་སོགས་གང་ཡང་མེད་པར་ཁྲིམས་ཆད་ལྗིད་པོ་བཏང་བར་ངོ་རྒོལ་མཐའ་གཅིག་ཏུ་བྱ་རྒྱུ་ཡིན། ཞེས་དང་། ལྷག་པར་དུ་བཀའ་བློན་མཆོག་གིས། རྒྱ་ནག་གཞུང་ནས་འགྲོ་བ་མིའི་ཐོབ་ཐང་གོང་མཐོར་གཏོང་རྒྱུ་དང་སྲུང་སྐྱོབ་བྱ་རྒྱུའི་ཁས་ལེན་དམ་བཅའ་དེ་དག་ལས་འགལ་ཏེ་བོད་མི་བཞིར་ཕྱི་ལོ་ ༢༠༠༩ ཟླ་ ༤ ཚེས་ ༨ སྲོག་ཐོག་ཉེས་ཆད་བཏང་ཡོད་པ་དང་། དེ་རྗེས་བུད་མེད་གཅིག་ལ་སྲོག་ཐོག་གི་ཉེས་ཆད་བཏང་ཡོད་པར་ང་ཚོར་བློ་འཚབ་ཆེན་པོ་ཡོད། བཙན་བྱོལ་བོད་གཞུང་ནས་རྒྱ་ནག་གཞུང་དང་། རྒྱལ་སྤྱིིའི་ཚོགས་སྡེ་ཁག དམིགས་བསལ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་བཅས་ལ་ཉམས་རྒུད་དུ་འགྲོ་བཞིན་པའི་བོད་ཀྱི་འགྲོ་བ་མིའི་ཐོབ་ཐང་གི་གནས་སྟངས་ལ་དགོངས་བཞེས་གནང་རོགས་ཞེས་སླར་ཡང་འབོད་སྐུལ་ཞུ་རྒྱུ་ཡིན། ཡང་ཁོང་གིས་གསུང་དོན། བཙན་བྱོལ་བོད་གཞུང་གི་ཡུན་རིང་གི་འབོད་སྐུལ་ནི་རྒྱ་ནག་གཞུང་ནས་ངེས་པར་དུ་ཆབ་སྲིད་ཀྱི་བཙོན་པ་ཆ་ཚང་འཕྲལ་མར་གློད་བཀྲོལ་གཏོང་དགོས་རྒྱུ་དང་། བོད་ནང་གི་དངོས་ཡོད་ཀྱི་གནས་སྟངས་རྟོག་ཞིབ་ཡོང་སླད་རྒྱལ་སྤྱིའི་མི་སྣ་བོད་ནང་གཏོང་རྒྱུའི་ཁས་ལེན་གནང་རྒྱུ་དེ་ཡིན། ཞེས་གསུངས་ཡོད་པ་རེད།།
