ཕྱི་ལོ་ ༢༠༠༩ ཟླ་ ༤ ཚེས་ ༡ རེས་གཟའ་ཟླ་བ།
༄༅། །རྒྱ་གར་འཕགས་པའི་ཡུལ་གྱི་བྱང་ཕྱོགས་ཧི་མཱ་ལ་ཡའི་རི་རྒྱུད་ཀྱི་མཐོ་སྒང་དུ་ཆགས་པའི།བོད་གངས་ཅན་གྱི་ལྗོངས། སྟོན་པ་ཤཱཀྱ་ཐུབ་པས་བྱིན་གྱིས་རླབས་ཏེ་ནང་ཆོས་དར་བར་ལུང་བསྟན་པ་དང་། རྒྱ་གར་གྱི་གཡུང་དྲུང་ཆོས་ལུགས་པ་རྣམས་ཀྱིས་གཙོས་ཕྱི་ནང་ཡོངས་ཀྱིས་ཆེས་རྩ་ཆེར་འཛིན་པའི་རི་བོ་ཀེ་ལ་ཤ་དང་། ཡིད་ཀྱི་ཆུ་གཏེར་ཏེ་མཚོ་མ་དྲོས་པའམ་མ་ཕམ་པ་བཅས་གང་དུ་ཆགས་པའི་ལྗོངས། ཆུ་བོ་ཆེན་པོ་བཞི་རྒྱ་གར་དུ་བབས་ཏེ་རྒྱ་མཚོར་འགྲོ་བ། འཕགས་ཡུལ་གྱི་སྐྱེས་ཆེན་མང་པོས་སུམ་ཅུ་རྩ་གསུམ་དུ་འབོད་པའི་པུར་རྒྱལ་བོད་ནི་ས་བབ་ཀྱི་ཆ་ནས་རྒྱ་གར་གྱི་ཡང་ཐོག་ལྟ་བུ་དང་། དེར་མིའི་འགྲོ་བའང་ས་འོག་ནས་ཐོན་པའི་གནའ་རྫས་ལ་གཞིགས་ན་ལོ་ཁྲི་ཕྲག་སྔོན་ནས་ཡོད་པ་དང་། བོན་གཞུང་ནས་ཀྱང་དེ་མཚུངས་བཤད་ཅིང་། བངྒཱལ་གྱི་སློབ་དཔོན་ཤེས་རབ་གོ་ཆ་(པྲཇཉཱབརྨཱ་)ལྟར་ན་མ་ཧཱ་བྷཱ་རཏའི་དམག་འཁྲུགས་སྐབས་ལྷོ་ཕྱོགས་ཀྱི་རྒྱལ་པོ་རུ་པ་ཏི་དཔུང་དང་བཅས་པ་གངས་ལྗོངས་སུ་བྲོས་ཏེ་གནས་པ་ལས་མཆེད་པར་བཤད་པ་དང་། རྒྱལ་པོའི་ཐོག་མའང་ཕྱི་ལོ་སྔོན་གྱི་ལོ་བརྒྱ་ཕྲག་གཅིག་དང་ཕྱེད་ཙམ་དུ་མགངྷའི་རྒྱལ་སྲས་ཤིག་ཡུལ་ནས་བསྐྲད་པ་བོད་དུ་ཕྱིན་པར་བོད་མིས་གཉའ་ཁྲི་བཙན་པོར་འབོད་དེ་རྒྱལ་པོར་བསྐོས་པ་ནས་བོད་ཀྱི་རྒྱལ་རྒྱུད་བྱུང་བར་གྲགས་པ་བཅས་སྔོན་རབས་དང་དེ་བྱུང་གང་ནས་བལྟས་ཀྱང་བོད་དང་རྒྱ་གར་གཉིས་ས་བབ་དང་མི་རིགས་རྒྱལ་རྒྱུད་བཅས་གང་ས་ནས་ཧ་ཅང་འབྲེལ་ལམ་དམ་ཟབ་ཡོད་པ་དང་། ཕྱི་ལོ་བརྒྱ་ཕྲག་བདུན་པ་བརྒྱད་པའི་ནང་བོད་ཕྲུག་མང་པོས་རྒྱ་གར་ནས་རིག་གནས་བསླབས་ཏེ་སྐབས་དེའི་དེ་བ་ནཱ་གྷརི་ཡིག་གཟུགས་ལས་དཔེ་བླངས་ནས་གསར་གཏོད་དམ། སྔར་ཡོད་ཞང་ཞུང་སྨར་ཡིག་ལེགས་བཅོས་ཀྱིས་བོད་ཀྱི་ཡིག་གཟུགས་དང་། ལེགས་སྦྱར་གྱི་བརྡ་སྤྲོད་ལས་དཔེ་བླངས་ནས་བོད་ཀྱི་བརྡ་སྤྲོད་ཀྱི་བསྟན་བཅོས་བརྩམས་པ་ནས་བཟུང་བོད་དུ་སྤྱི་ཚོགས་ཀྱི་དཔལ་ཡོན་དར་འགོ་ཚུགས་པ་མ་ཟད། སངས་རྒྱས་ཀྱི་བསྟན་པའི་དབུ་བརྙེས། ལྷག་པར་ཕྱི་ལོ་བརྒྱ་ཕྲག་བརྒྱད་པའི་ནང་བངྒཱལ་གྱི་རྒྱལ་སྲས་ལས་རབ་ཏུ་བྱུང་བའི་དཔལ་ནཱལཎྡྲའི་འགྲན་བྲལ་གྱི་མཁས་དབང་སློབ་དཔོན་ཆེན་པོ་ཞི་བ་འཚོ་བོད་དུ་བྱོན་ཏེ་དགེ་འདུན་གྱི་སྡེ་བཙུགས་པ་དང་། རྒྱ་གར་ནུབ་ཕྱོགས་ནས་སློབ་དཔོན་ཆེན་པོ་པདྨ་སམ་བྷ་ཝ་བྱོན་ཏེ་གསང་སྔགས་ཀྱི་བསྟན་པ་དར་བར་མཛད་ཅིང་། དེའི་རྗེས་སླར་ཡང་སློབ་དཔོན་ཞི་བ་ཚོའི་དངོས་སློབ་ཀ་མ་ལ་ཤཱི་ལ་བོད་དུ་བྱོན་ཏེ་བསྟན་པ་ལ་དག་ཐེར་མཛད་པ་བཅས་ཀྱི་བཀྲིན་ལས་བོད་དུ་ཐེག་པ་གསུམ་དང་རྒྱུད་སྡེ་བཞིས་བསྡུས་པའི་རྒྱལ་བའི་བཀའ་སྡེ་སྣོད་གསུམ་དང་། ཤིང་རྟ་ཆེན་པོ་ཀླུ་སྒྲུབ་ཐོགས་མེད་ཀྱིས་དབུས་པཎ་གྲུབ་བཅུ་བདུན་སོགས་འཕགས་ཡུལ་གྱི་མཁས་གྲུབ་གྲངས་ལས་འདས་པས་བརྩམས་པའི་མདོ་སྔགས་རིག་གནས་དང་བཅས་པའི་བསྟན་བཅོས་ཧ་ཅང་མང་པོ་བོད་སྐད་དུ་བསྒྱུར་ཏེ་དཔལ་ནཱལཎྡྲ་དང་། བིཀྲཱ་མཤཱི་ལ། ཏཀ་ཤཱི་ལ། ཨོད་ནྟཔུརི་ལ་སོགས་པའི་གདན་ས་ཆེན་པོ་རྣམས་ཀྱི་སྲོལ་རྒྱུན། ཚང་ལ་མ་ནོར་བའི་རྒྱལ་བའི་བསྟན་པ་བོད་དུ་དར་རྒྱས་སུ་གྱུར་པ་དང་། བོད་ཀྱི་མཁས་གྲུབ་ཚོས་ཀྱང་རྒྱལ་བའི་ལུང་དང་འཕགས་ཡུལ་གྱི་གཞུང་ལུགས་ཁོ་ནར་བརྟེན་པར་མཛད་པ་ལས་བསྲེ་ལྷད་མེད་པར་གནས་ཞིང་། དེང་གི་ཆར་རྒྱ་གར་གྱི་སྲོལ་རྒྱུན་དྲི་མ་མེད་པ་ཆ་ཚང་བ་ཞིག་བོད་ལས་གཞན་པའི་ཡུལ་ཁམས་གང་དུའང་མ་གནས་པར་མ་ཟད། རྒྱ་གར་དུའང་ཉམས་རྒུད་དུ་གྱུར་ཟིན། དུས་རབས་བདུན་པའི་ནང་ལོ་ཙ་བ་ཆེན་པོ་ཐོན་མི་སམ་བྷོ་ཊ་དང་ལོ་ཆེན་དྷརྨ་ཀོཤས་སྤྱན་རས་གཟིགས་ཀྱི་མདོ་རྒྱུད་དང་ཤེར་ཕྱིན་སྟོང་ཕྲག་བརྒྱ་པ་སོགས་དམ་ཆོས་མང་དུ་བསྒྱུར་བ་དེ་ནས་བཟུང་ཀ་ཅོག་ཞང་གསུམ་གྱིས་མཚོན་ལོ་ཙཱ་བ་ལེགས་པའི་བློ་གྲོས་བར་བོད་ཀྱི་ལོ་ཙཱ་བ་མཁས་དབང་གྲངས་ ༡༩༢ ཙམ་དང་། ཞུ་ཆེན་གྱི་སློབ་དཔོན་གྲངས་ ༩༣ བྱུང་བ་བུ་སྟོན་ཆོས་འབྱུང་དུ་གསལ་བ་དང་། སྔ་རྗེས་ལོ་ཙཱ་བ་བདུན་བརྒྱ་བརྒལ་བ་བྱུང་ཡོད། སློབ་དཔོན་ཞི་འཚོ་ཡབ་སྲས་དང་། སུ་རེན་དྲ་བོདྷི་སོགས་ནས་བཟུང་ཕྱི་ལོ་བརྒྱ་ཕྲག་བཅུ་བདུན་པའི་ནང་སློབ་དཔོན་བལ་བདྲ་སྐུ་མཆེད་རྣམ་པའི་བར་འཕགས་ཡུལ་གྱི་སློབ་དཔོན་བརྒྱ་ཕྲག་མང་པོས་ལེགས་སྦྱར་གྱིས་མཚོན་པའི་རྒྱ་གར་གྱི་སྐད་རིགས་ཁག་དང་། རྒྱ་ཡིག་བཅས་ནང་བཞུགས་པའི་བཀའ་བསྟན་འགྱུར་པོད་སུམ་བརྒྱ་བརྒལ་བ་བསྒྱུར་པའི་ནང་རྒྱ་ནག་ནས་བསྒྱུར་བ་པོད་བཅུ་ཙམ་ལས་དེ་འཕྲོས་རྒྱ་གར་ནས་བསྒྱུར་པ་བཅས་དེ་དག་ནི་གཞུང་གི་གྲངས་འབོར་མང་ཤོས་དང་། འགྱུར་གྱི་སྤུས་ཚད་བཟང་ཤོས་ཡིན་པ་དང་། དེ་དག་ལ་ཆ་ཤས་ཙམ་ཡང་བསྒྲུན་ཐུབ་པའི་སྒྲ་སྒྱུར་བྱས་པའི་གཞུང་སྐད་ཡིག་གཞན་དུ་དཀོན། དེ་ནི་བོད་ཀྱི་སྐད་དང་བརྡ་དག་ལེགས་སྦྱར་དང་དོ་མཉམ་པ་བཟོ་ཐུབ་པའི་དབང་གིས་ཡིན། བོད་ནི་ས་བབ་མཐོ་ཞིང་འགྲུལ་བཞུད་དཀའ་ཡང་འཕགས་པའི་ཡུལ་ནས་མཁས་གྲུབ་ཀྱི་སྐྱེ་བོ་གྲངས་ལས་འདས་པ་ཞིག་བསྟན་པ་དང་རིག་གཞུང་ཁོ་ནའི་ཆེད་ཕེབས་ཡོད་པ་རྣམས་ཀྱི་ནང་ཁ་ཆེ་པཎ་ཆེན་ཤཱཀྱ་ཤྲཱི་དང་། པཎྜི་ཏ་སྨྲི་ཏིཛྙཱ་ན། ཇོ་བོ་རྗེ་དཔལ་ལྡན་ཨ་ཏི་ཤ་ལ་སོགས་པ་ཆེས་གྲགས་ཅན་གྱི་མཁས་དབང་མང་པོ་ཡོད་པ་མ་ཟད། བོད་ནས་ཀྱང་མཁས་གྲུབ་སྟོང་ཕྲག་མང་པོ་རྒྱ་གར་དུ་ཕེབས་ཏེ་སློབ་གཉེར་བྱས་ནས་མང་ཆེ་བ་བོད་དུ་ཕྱིར་ལོག་བྱས་པ་དང་། རེ་ཟུང་རྒྱ་གར་དུའང་ཀུན་གྱི་བརྩི་མཐོང་ཡོད་པའི་གྲགས་ཅན་དུ་གྱུར་ཏེ་དཔེར་ན་ཙ་མི་སངས་རྒྱས་གྲགས་རྡོ་རྗེ་གདན་གྱི་མཁན་པོ་གནང་བ་ལྟ་བུ་ཇི་སྙེད་ཅིག་བྱུང་ཡོད། དུས་ཕྱིས་རྒྱ་གར་གྱི་ཆོས་སྡེ་རྣམས་ཏུ་རུ་ཁའི་དཔུང་གིས་བཅོམ་པ་ན་བོད་དུ་བཙན་བྱོལ་དུ་ཕེབས་པའི་མཁས་པའང་ཇི་སྙེད་ཅིག་བྱུང་བ་བཅས་མདོ་དོན་འཕགས་བོད་ཀྱི་ཆོས་དང་རིག་གཞུང་། ལེགས་བྱང་བཅས་ཀྱི་འབྲེལ་བ་ནི་ཐ་དད་དབྱེར་མེད་ལྟ་བུ་གྱུར་ཡོད། སྐུ་གཤེགས་མོ་རཱ་ཇི་དེ་ས་ཨི་མཆོག་གིས་ངོས་ལ་གནང་བའི་ཕྱག་བྲིས་ཤིག་གི་ནང་འཕགས་བོད་གཉིས་ནི་བྱང་ཆུབ་ལྗོན་ཤིང་རྩ་བ་གཅིག་གི་ཡལ་ག་གཉིས་དང་མཚུངས་པ་ཡིན་ཞེས་དཔེར་བཀོད་གནང་འདུག་པ་དོན་ལ་གནས། གོང་གི་གནས་ཚུལ་དེ་དག་ལ་བརྟེན་ནས་ངོས་རྒྱུན་དུ་རྒྱ་གར་ནི་ང་ཚོའི་སློབ་དཔོན་དང་ང་ཚོ་རྒྱ་གར་བའི་སློབ་མ་ཡིན་ཞེས་བརྗོད་ཀྱི་ཡོད་པ་ནི་རབ་བཏགས་མ་ཡིན་པར་རང་བཞིན་བརྗོད་པ་ཉིད་ཡིན། རྒྱ་གར་དུ་སངས་རྒྱས་ཀྱི་བསྟན་པ་ཉམས་པའི་རྗེས་ཆོས་དང་རིག་གཞུང་གི་འབྲེལ་བ་ཆད་པ་དང་མཉམ་དུ་སྤྱི་ཚོགས་ཀྱི་འབྲེལ་བ་ཡང་ཆད་པ་ལྟ་བུ་གྱུར་ཡོད་ཀྱང་། བོད་ནས་ནང་པའི་གནས་ཆེན་ཁག་མཇལ་མཁན་དང་། རྒྱ་གར་ནས་གངས་ཏི་སི་དང་མཚོ་མ་དྲོས་པ་སོགས་མཇལ་མཁན་གནས་སྐོར་བ་རྒྱུན་མ་ཆད་པ་ཞིག་ཕྱི་ལོ་ ༡༩༥༩ ལོ་བར་ལག་འཁྱེར་དང་ཐོངས་མཆན་སོགས་ཀྱི་དགོས་མཁོ་མེད་པར་རང་དབང་གིས་འགྲོ་འོང་དང་གནས་སྡོད་ཅི་དགར་བྱེད་བཞིན་པར་མཆིས། བོད་དང་ས་འབྲེལ་གྱི་ལ་དྭགས་ནས་ཨ་རུ་ནཱ་ཅལ་པྲ་དེཤ་བར། བངྒཱལ་དང་། ཨུཏ་ཏར་པྲ་དེཤ། ཧི་མ་ཅལ། ཨུཏ་ཏར་ཁཎཌ་སོགས་སུ་ས་མཚམས་ཀྱི་ཚོང་འབྲེལ་མུ་མཐུད་དུ་གནས་པར་མ་ཟད། ས་མཚམས་ཀྱི་རྒྱལ་ཕྲན་ཁག་དང་མཉམ་དུ་གནད་དོན་མང་པོའི་ཐོག་ཆོད་གན་འཇོག་པ་དང་། ས་མཚམས་ཀྱི་གནས་ཆེན་འགའ་ལ་བོད་ནས་རྒྱུན་དུ་མཆོད་འབུལ་བ་གཏོང་བ་སོགས་ཀྱི་ལམ་སྲོལ་རྒྱུན་གནས་ཡོད། དུས་རབས་ཉི་ཤུ་པའི་ནང་དུའང་མཧཱ་པཎྜིཏ་རཱ་ཧུལ་སམ་ཀྲི་ཏ་ཡཱ་ཡན་བོད་དུ་ལན་གསུམ་ཕེབས་ཏེ་རྒྱ་གར་དུ་མ་བཞུགས་པའི་ལེགས་སྦྱར་གྱི་གཞུང་ལུགས་མང་པོའི་མ་ཕྱི་བོད་ནས་བསྣམས་ཏེ་སངས་རྒྱས་ཀྱི་བསྟན་པ་ལ་ཕན་པ་རླབས་ཆེན་མཛད།
ཆབ་སྲིད་ཀྱི་ཕྱོགས་ནས་ཀྱང་ཕྱི་ལོ་ ༡༩༠༤ ལོར་དབྱིན་ཇིའི་དཔུང་འཇུག་དང་། དམག་མཚམས་ཆོད་པའི་ཆིངས་ཡིག་བཞག་པ། ཕྱི་ལོ་ ༡༩༡༠ ལོར་རྒྱལ་བ་སྐུ་ཕྲེང་བཅུ་གསུམ་པ་རྒྱ་གར་དུ་བཙན་བྱོལ་དུ་ཕེབས་པ། ཕྱི་ལོ་ ༡༩༡༣།༡༩༡༤ ལོར་སིམ་ལའི་ཆིངས་ཡིག་བཞག་པ། ཆིངས་དོན་རྣམས་ལོ་བཅུ་རེའི་མཚམས་འཆར་ཅན་བསྐྱར་གསོ། བོད་དང་རྒྱ་གར་དབར་ཚོང་འབྲེལ་དང་ཚོང་ལམ་སྲུང་སྐྱོབ་ཀྱི་དཔུང་ཚོ་བོད་དུ་གནས་སྡོད། ཡིག་ཟམ་དང་ལྕགས་སྐུད་ཀྱི་འབྲེལ་ལམ། ལྷ་སར་རྒྱ་གར་གཞུང་གི་ལས་དོན་ལས་ཁུངས་ཚུགས་པ་སོགས་འབྲེལ་ལམ་གཏིང་ཟབ་གོང་འཕེལ་དུ་ཡོད་མུར་ཕྱི་ལོ་ ༡༩༤༧ ལོའི་ཕྱི་ཟླ་གསུམ་པའི་ནང་རྒྱ་གར་བར་བརྒལ་གཞུང་གིས་ཤར་གླིང་འབྲེལ་ལམ་གྱི་ཚོགས་ཆེན་དུ་བོད་གཞུང་གི་སྐུ་ཚབ་གདན་ཞུ་གནང་བ། རྒྱ་གར་རང་བཙན་བྱུང་རྗེས་ཕྱི་ལོ་ ༡༩༥༦ ལོར་སྟོན་པ་མྱ་ངན་ལས་འདས་ནས་ལོ་ ༢༥༠༠ འཁོར་བའི་དུས་ཆེན་ཐོག་ངོས་དང་པཎ་ཆེན་རིན་པོ་ཆེས་གཙོས་བོད་ཀྱི་བླ་ཆེན་མང་པོ་མགྲོན་འབོད་གནང་བ། བོད་མི་ཡོངས་ལ་ནང་པའི་གནས་ཆེན་ཆ་ཚང་གནས་མཇལ་ཞུ་ཆེད་མེ་འཁོར་གླ་འབབ་ཕྱེད་བཅག་གནང་བ་སོགས་མཐུན་འགྱུར་རླབས་ཆེན་གནང་ཞིང་། སྐབས་དེར་ངོས་རང་རྒྱ་གར་དུ་གནས་སྡོད་རིང་ཕྱི་ནང་གི་གནས་ཆེན་མང་པོ་མཇལ་རྒྱུ་བྱུང་བར་མ་ཟད། རྒྱ་གར་གྱི་འཛུགས་སྐྲུན་རྟེན་གཞི་མང་པོར་ལྟ་སྐོར་གྱིས་ཡིད་འགུལ་དང་རྣམ་དཔྱོད་གསར་པ་མང་པོ་རྙེད་ཅིང་། ལྷག་དོན་རྒྱ་གར་གྱི་གལ་ཆེའི་དབུ་ཁྲིད་མང་པོ་དང་མཇལ་འཕྲད་ཀྱིས་རླབས་ཆེའི་སློབ་སྟོན་ཐོབ་པ་དང་། ཡང་སྒོས་སྲིད་བློན་དམ་པ་པཎྜི་ཏ་ནེཧ་རཱུས་ནང་ལུགས་ཀྱི་ལམ་སྟོན་ཐུགས་བརྩེ་ཆེན་པོས་གནང་བ་དེ་དག་བོད་མིའི་རྩ་དོན་ལ་ཕུགས་རྒྱང་རིང་པོའི་ཕན་ཐོགས་བྱུང་། སྐབས་དེར་ངོས་རང་སྐྱབས་བཅོལ་དུ་མ་བསྡད་པར་བོད་དུ་ཕྱིར་ལོག་བྱས་པའང་ད་ལྟ་ཕྱི་མིག་ལྟ་སྐབས་ཆོས་སྲིད་གཉིས་ཐད་ནས་ཐག་གཅོད་མ་ནོར་བ་ཞིག་བྱས་འདུག་སྙམ་པ་ཡོང་གི་འདུག ངོས་རང་བོད་དུ་ཕྱིར་ལོག་རྗེས་དགེ་བཤེས་དམ་འཇོག་སོགས་ཆོས་ཕྱོགས་ཀྱི་གལ་ཆེའི་བྱེད་སྒོ་མང་དག་ཅིག་གྲུབ་པར་མ་ཟད། རྒྱ་ནག་གི་འགོ་ཁྲིད་ཚོར་སླར་ཡང་མ་ལན་མ་འགྱོད་པའི་འབྲེལ་གཏུགས་གོ་བསྡུར་བྱ་རྒྱུའི་གོ་སྐབས་བྱུང་།ཀུན་གྱིས་མཁྱེན་གསལ་ལྟར་ངོས་དང་བོད་ས་གནས་གཞུང་གི་ངོས་ནས་གྲོས་མཐུན་དོན་ཚན་བཅུ་བདུན་འོག་བོད་རྒྱ་མཉམ་གནས་ཡོང་ཐབས་ཡོད་རྒུ་རྩལ་སྤྲུགས་གང་བྱས་དོན་མེད་དུ་སོང་རྗེས་ ༡༩༥༩ ཕྱི་ཟླ་ ༣ ཚེས་ ༡༠ ཉིན་ལྷ་སའི་མང་ཚོགས་ནས་ཞི་བའི་ངོ་རྒོལ་མ་བྱས་ཐབས་མེད་བྱུང་རྐྱེན་ཛ་དྲག་གི་གནས་ཚུལ་བྱུང་བ་དང་། དེའི་སྐབས་སུའང་ངོས་ནས་ཛ་དྲག་སེལ་ཐབས་དང་དྲག་གནོན་མི་ཡོང་བའི་འབད་རྩོལ་གང་ཐུབ་བྱས་ཀྱང་དོན་འབྲས་མ་སོན་པར་མཐའ་དོན་དེ་ཟླའི་ཚེས་ ༡༧ མཚན་མོ་བཀའ་ཤག་དང་། ལས་ཞབས་ཧྲག་བསྡུས་བཅས་གསང་བགྲོད་ཀྱིས་བོད་ལྷོ་ཁུལ་དུ་འབྱོར་སྐབས་ཡང་བསྐྱར་རྒྱ་གཞུང་དང་འབྲེལ་མོལ་བྱ་ཐབས་བྱས་ཀྱང་དེ་ཟླའི་ཚེས་ ༡༩ མཚན་མོ་ནས་ལྷ་སར་དྲག་གནོན་ཚད་མེད་ཀྱིས་ཉིན་མཚན་གཉིས་ཀྱི་རིང་ཉེས་མེད་བོད་མི་ཁྲི་ཚོ་གཉིས་ལྷག་བསད་པ་དང་། རྨས་སྐྱོན་འཛིན་བཟུང་བཙོན་འཇུག་སོགས་བྱས་སྟབས་དེ་འཕྲལ་རྒྱ་གར་དུ་བཙན་བྱོལ་བྱ་རྒྱུ་མ་གཏོགས་ཐབས་ལམ་གཞན་གང་ཡང་མ་ལྷག་པར་བརྟེན། ཉིན་མཚན་ཤད་བསྐྱོད་ཀྱིས་ཟླ་བ་དེའི་ཚེས་ ༣༡ ཉིན་རྒྱ་གར་གྱི་ས་མཚམས་ནང་འཛུལ་ཞུགས་ཐུབ་སྟེ་ལུས་སྲོག་གི་འཇིགས་པ་གྲོལ་ནས་རང་དབང་གིས་འཚོ་བའི་གོ་སྐབས་ཐོབ་པ་དེ་ངོས་ཀྱི་མི་ཚེའི་ནང་གལ་ཆེའི་ཉིན་མོ་ཞིག་ཡིན་པར་མ་ཟད། བོད་མི་རིགས་ཀྱི་བྱུང་རབས་སུའང་རླབས་ཆེའི་འགྱུར་བའི་སོ་མཚམས་ཤིག་ཏུ་གྱུར། བོད་ནང་དྲག་གནོན་མཚམས་འཇོག་མེད་ཁར་ས་ཁུལ་ཡོངས་སུ་ཁྱབ་པར་བརྟེན། བོད་མི་འབུམ་ལ་ཉེ་བ་ཞིག་དེ་ལོ་རང་དུ་མོན་ཡུལ་དང་འབྲུག་ཡུལ་བརྒྱུད་རྒྱ་གར་དུ་སྐྱབས་བཅོལ་དུ་འབྱོར་ཞིང་། དེ་དག་འབྱོར་མ་ཐག་པ་ནས་ཨསམ་མི་ས་མ་རི་དང་། བངྒཱལ་གྱི་སྦག་ས་ཌོ་བ་གཉིས་སུ་འཕྲལ་སེལ་སྡོད་སྒར་གོ་སྒྲིག་གིས་ཟས་གོས་གནས་མལ་སྨན་བཅོས་བཅས་ཀྱི་མཐུན་རྐྱེན་ཆ་ཚང་བསྐྲུན་ཏེ་དབུགས་དབྱུང་མཛད་པ་དང་། དེ་ནས་རིམ་བཞིན་སོ་སོའི་འཁོས་ཀར་གཞིགས་པའི་གྲྭ་བཙུན་རྣམས་ལ་གཞུང་ཆེན་སློབ་གཉེར་དང་། ན་གཞོན་ཚོར་ཤེས་ཡོན་སློབ་སྦྱོང་། རྒས་འཁོགས་རྣམས་ལ་རྒས་གསོ། ལས་འཕེར་བ་རྣམས་ལ་འཚོ་ཐབས་ལས་རིགས་ལ་སྦྲར་བས་མཚོན། མདོ་དོན་བཙན་བྱོལ་བོད་མི་ཡོངས་རྫོགས་སྐབས་འཕྲལ་ཟས་གོས་གནས་མལ་གྱིས་མི་ཕོངས་ཤིང་། ཆོས་དང་ལེགས་བྱང་གི་རྒྱུན་འཛིན་དང་། བོད་མི་རིགས་ཀྱི་ངོ་བོ་མ་བརླགས་པའི་ཐབས་ཚུལ་ལ་འབད་འབུངས་ཐུབ་པ་བྱུང་ཡོད། ལྷག་པར་སྲིད་བློན་ནེཧ་རཱུས་སྐུ་སྒེར་གྱི་ཐུགས་འགན་བཞེས་ཏེ་བཙན་བྱོལ་བོད་མི་རྣམས་ཁ་མ་འཐོར་བར་མཉམ་སྡོད་ཐུབ་པའི་སོ་ནམ་གཞིས་ཆགས་ཁག་མང་གསར་འཛུགས་དང་། བོད་ཕྲུག་ཡོངས་ལ་དེང་དུས་ཀྱི་ཤེས་ཡོན་དང་མཉམ་དུ་བོད་ཀྱི་སྐད་ཡིག་དང་། ཆོས་རིག ལེགས་བྱང་བཅས་པའང་སློབ་སྦྱོང་བྱ་ཡུལ་གྱི་བོད་མིའི་སློབ་གྲྭ་ཁག་ཟུར་འཛུགས་གནང་བ་བཅས་ནི་ཕུགས་ཐག་རིང་པོའི་གཟིགས་རྒྱང་དང་ལྡན་པའི་ལམ་སྟོན་བླ་མེད་ཅིག་བྱུང་འདུག་པ་བཅས། མདོ་དོན་འདས་པའི་མི་ལོ་ལྔ་བཅུའི་རིང་བཙན་བྱོལ་བོད་མི་ཆིག་འབུམ་ཙམ་ཞིག་རྒྱ་གར་ཡུལ་མི་དང་ཆ་འདྲ་བའི་སྤྱི་ཚོགས་ཀྱི་ཐོབ་ཐང་ལ་རོལ་ཏེ་ད་ཆ་མི་རབས་གསུམ་པ་རྣམས་འཚར་ལོང་ཡོང་བཞིན་པ་དང་། དུས་ཡུན་དེ་སྲིད་དུ་རྒྱ་གར་དབུས་དང་མངའ་སྡེའི་གཞུང་འཛིན་ཚོགས་པ་མང་པོ་ཞིག་འཕོ་འགྱུར་སོང་ཡང་བོད་མིའི་བདེ་སྡུག་ལ་གཟིགས་སྐྱོང་གནང་རྒྱུའི་སྲིད་བྱུས་འགྱུར་མེད་བརྟན་འཛིན་གནང་བ་དང་། ཁྱད་པར་མང་ཚོགས་ཀྱི་ངོས་ནས་མཛའ་བརྩེ་དང་། ཆེ་མཐོང་གིས་བོད་མི་ཕལ་མོ་ཆེར་རང་ཡུལ་བྲལ་ཏེ་སྐྱབས་བཅོལ་དུ་གནས་པའི་ཚོར་སྣང་ཡང་ཕལ་ཆེར་མེད་པ་དང་། རང་ཉིད་ཤེས་འཇོན་ལྡན་ཚེ་ལས་ཞབས་དང་འཚོ་ཐབས་གང་གི་ནང་དུའང་རྒྱ་གར་ཡུལ་མི་དང་འདྲ་མཉམ་གྱིས་ཞུགས་ཆོག་པ་བཅས་ནི་རྗེས་སུ་ཡི་རངས་བྱ་ཡུལ་ཞིག་ཡིན། མདོར་ན་རྒྱ་གར་རང་ལ་སྤྱི་ཚོགས་དང་དཔལ་འབྱོར། ཆབ་སྲིད་བཅས་ཀྱི་སྐུ་ངལ་དང་མཛད་དཀའ་མང་དག་ཡོད་མིན་ལ་མ་ལྟོས་པར་ཕྱོགས་ཡོངས་ནས་བཙན་བྱོལ་བོད་མིར་རྒྱབ་སྐྱོར་དང་མཐུན་འགྱུར་ཆེ་ཤོས་གནང་མཁན་དེ་ཆགས་ཡོད། འདས་ལོ་ལྔ་བཅུའི་ཉམས་མྱོང་ལས་ད་ཆ་བཙན་བྱོལ་བོད་མི་ཡོངས་ལ་ང་ཚོས་སྐྱབས་བཅོལ་ཞུ་ཡུལ་ནོར་མི་འདུག་སྙམ་པའི་ཡིད་ཆེས་བརྟན་པོ་རྙེད་ཡོད།
དེ་མཚུངས་རྒྱ་གར་མང་ཚོགས་ཀྱི་ཁྲོད་རིགས་རུས་དང་། ཆོས་ལུགས། ཆབ་སྲིད་ཚོགས་པ་བཅས་ཀྱི་དབྱེ་བ་མེད་པར་འཕགས་བོད་མཛའ་འབྲེལ་ཚོགས་པ་དང་། འཕགས་བོད་མཐུན་འབྲེལ་སྡིངས་ཆ། རྒྱ་གར་བོད་ཀྱི་གྲོགས་པོ་སོགས་ཀྱིས་མཚོན་པའི་བོད་དོན་རྒྱབ་སྐྱོར་ཚོགས་པ་སྣ་མང་དང་། གཞན་ཡང་གང་ཟག་སྒེར་གྱི་ངོས་ནས་བཙན་བྱོལ་བོད་མིའི་བདེ་དོན་དང་བོད་ཀྱི་རྩ་དོན་ཐོག་རང་དོན་ལས་ལྷག་པའི་ཐུགས་ཁུར་བཞེས་མཁན་གྲངས་ལས་འདས་པ་ཞིག་བྱུང་དང་ཡོང་བཞིན་པ་དེ་ནི་རྒྱ་གར་གྱི་ཐུན་མིན་ལེགས་བྱང་དང་། དགེ་རྒན་གྱིས་དགེ་ཕྲུག་ལ་བརྩེ་གདུང་མཚོན་པ་ཞིག་ཡིན། བོད་མི་རིགས་ཀྱི་ངོ་བོ་དང་། རྒྱ་གར་ནས་བྱུང་བའི་བོད་མིའི་སྤྱི་ཚོགས་ཀྱི་དཔལ་ཡོན་བཅས་ཆགས་འཇིག་གི་སོ་མཚམས་སུ་གྱར་བའི་སྐབས་འདིར་རླབས་ཆེའི་གྲོགས་ཕན་འདི་ལྟ་བུ་གནང་བ་ནི་དགོས་དུས་སུ་ཕན་པའི་གྲོགས་པོ་ནི་གྲོགས་པོ་ངོ་མ་ཡིན་ཞེས་དབྱིན་སྐད་ཀྱི་གཏམ་དཔེ་ནང་ཡོད་པ་ལྟར་དངོས་སུ་བྱུང་ཡོད། སྐད་དང་གོམས་གཤིས། རྒྱུན་སྤྱོད་སོགས་མི་འདྲ་བའི་དབང་གིས་ཡུལ་མི་རྣམས་ལ་སྐུ་ངལ་དང་ཐུགས་བསུན་ཡོང་སྲིད་པ་ཡིན་ནའང་། ལོ་ལྔ་བཅུའི་རིང་གནས་ཚུལ་ཆུང་ཙག་ཉུང་ཤས་ཕུད་པའི་ཁྱོན་ཡོངས་ནས་བོད་མི་དང་ཡུལ་མིའི་དབར་དཀའ་རྙོག་མ་བྱུང་བ་ནི་ངོ་མཚར་དང་ཡི་རངས་བྱ་འོས་པ་དང་། རྒྱ་གར་གྱི་བཟོད་བསྲན་གྱི་ལེགས་བྱང་མཚོན་པ་ཞིག་ཀྱང་ཡིན། རྒྱ་གར་དུ་ཁྱིམ་མཚེས་རྒྱལ་ཁབ་ཅི་རིགས་ནས་ཡོང་བའི་སྐྱབས་བཅོལ་བ་གཞན་དང་བསྡུར་ན་གྲངས་འབོར་གྱི་ཆ་ནས་བོད་མི་སྐྱབས་བཅོལ་བ་ཉུང་ཤོས་ཡིན་རུང་། གཞུང་དང་མང་ཚོགས་ཀྱི་མཐུན་འགྱུར་དང་ངོས་འཛིན་ཆེ་ཤོས་འཐོབ་ཡོད་པར་མ་ཟད། རྒྱ་གར་གྱི་གྲོང་ཚོ་ཕལ་ཆེ་བའི་ནང་དགུན་ཁའི་སྐབས་བལ་གོས་ཚོང་པའི་ངོ་བོར་དངོས་གསལ་དོད་པོས་མཐོང་རྒྱུ་ཡོད་པ་ཞིག་ཀྱང་ཡིན། སོ་ནམ་ཞིང་ལས་ཐོག་འཚོ་ཐབས་ཁ་གསབ་ལྟ་བུར་བོད་མི་མང་ཆེ་བ་དགུན་དུས་ཟླ་ཤས་རིང་རྒྱ་གར་གྱི་གྲོང་ཁྱེར་ཕལ་མོ་ཆེའི་ནང་བལ་གོས་འཚོང་འགྲེམས་སུ་བསྐྱོད་རྒྱུའི་ལམ་སྲོལ་ཞིག་བྱུང་བ་དེ་བཙན་བྱོལ་བོད་མིའི་འཚོ་ཐབས་ལ་རོགས་སྐྱོར་མ་ཟད། འཕགས་བོད་མང་ཚོགས་དབར་འབྲེལ་ལམ་དང་གོ་རྟོགས་སྤེལ་རེས་ཀྱི་ཆ་རྐྱེན་བཟང་པོ་ཞིག་ཀྱང་བྱུང་ཡོད། བཙན་བྱོལ་བོད་མི་མང་ཆེ་བ་ད་ཆ་རང་ཁ་རང་གསོ་ཐུབ་པའི་གནས་སུ་སླེབས་ཡོད་ཀྱང་། གཞི་རིམ་སློབ་གྲྭ་ཁག་གིས་མཚོན་ད་ལྟའང་སྡེ་ཚན་དང་སྒྲིག་འཛུགས་མང་པོ་ཞིག་རྒྱ་གར་དབུས་སའི་གཞུང་གི་དཔལ་འབྱོར་གྱི་མཐུན་འགྱུར་ལ་བརྟེན་བཞིན་གནས་ཡོད། ངོས་རང་སྒེར་ལ་མཚོན་ནའང་རང་དབང་དང་བག་ཕེབས་ཀྱི་ངང་ཡིད་དྭོགས་བློ་ངལ་ཅིའང་མེད་པར་སྟོན་པ་ཤཱཀྱ་ཐུབ་པས་ལེགས་པར་བསྟན་པའི་དམ་པའི་ཆོས་ཀྱི་ཉམས་ལེན་དང་། དེ་ལ་བརྟེན་ནས་འཇིག་རྟེན་སྐྱེ་འགྲོ་ཡོངས་ཀྱི་ཕན་བདེ་སྒྲུབ་ཐབས་སུ་ཞབས་འདེགས་མི་དམན་ཙམ་བསྒྲུབས་ཐུབ་པའང་རྒྱ་གར་གྱི་བཀྲིན་ཡིན་ཞིང་། ངོས་ཀྱི་རང་རྣམ་གསར་པའི་མིང་བྱང་ཡང་༼བཙན་བྱོལ་དུ་རང་དབང་༽ཞེས་བཏགས་ཡོད། རྒྱ་གར་ངོས་རང་གི་ཆོས་ཀྱི་བསྟི་གནས་སུ་གྱུར་པ་ནི་དགའ་སྤོབས་འོས་པ་ཞིག་ཡིན་ཁར། ངོས་རང་གང་དུ་ཕྱིན་ཀྱང་ཡུལ་འདིའི་ལྟ་གྲུབ་ཡང་སྙིང་བྱམས་བརྩེ་དང་། འཚེ་བ་མེད་པའི་ལམ་བཟང་རྒྱ་གར་བའི་མགྲིན་ཚབ་པ་ལྟ་བུར་ཁྱབ་སྤེལ་བྱེད་ཀྱི་ཡོད། ངོས་རང་འགྲོ་བ་མི་ཞིག་ཡིན་པའི་ཆ་ནས་མིའི་བཟང་སྤྱོད་སྤེལ་རྒྱུ་དེ་ལས་འགན་གལ་ཆེ་ཤོས་སུ་འཛིན་གྱི་ཡོད། དེ་ནི་གང་ཟག་སྒེར་དང་། ཁྱིམ་ཚང་། སྤྱི་ཚོགས་བཅས་ལ་བདེ་སྐྱིད་འབྱུང་བའི་གཞི་རྩ་ཡིན་པར་སེམས། དེ་ནས་ཆོས་པ་ཞིག་ཡིན་པའི་ཆ་ནས་ངའི་དོ་སྣང་དང་ལས་འགན་གཉིས་པ་ནི་ཆོས་ལུགས་ཕན་ཚུན་མཐུན་ལམ་སྤེལ་རྒྱུ་དེ་ཡིན། ལྟ་བ་དང་གྲུབ་མཐའ་མི་འདྲ་བ་ཡོད་མིན་ལ་མ་ལྟོས་པར་ཆོས་ལུགས་ཚང་མར་བྱམས་པ་དང་། བརྩེ་བ། བཟོད་བསྲན། ཆོག་ཤེས། ཚུལ་ཁྲིམས་བཅས་ཀྱི་བསླབ་བྱ་གཅིག་མཚུངས་ཡོད་ལ། མི་ཚེ་བདེ་སྐྱིད་ཀྱི་ལམ་དུ་འཁྲིད་རྒྱུའི་ནུས་པའང་གཅིག་མཚུངས་ཡོད། བོད་ཀྱི་གནད་དོན་ཐད་བྱུང་རབས་ནང་ཆེས་གཉན་འཕྲང་ཆེ་བའི་དུས་སྐབས་འདིར་བོད་མི་ཚོས་ངོས་ལ་མུ་མཐུད་རེ་བ་དང་ཡིད་ཆེས་བྱེད་བཞིན་ཡོད་སྟབས་ངོས་ལ་དམིགས་བསལ་གྱི་ལས་འགན་ཡོད། བོད་མིའི་བདེ་དོན་ནི་ངའི་རྒྱུན་ལྡན་གྱི་སེམས་ཁུར་ཞིག་ཡིན་ལ། ངོས་རང་རང་དབང་ལུང་པར་ཡོད་པས་བཙན་འོག་ཏུ་ཡོད་པའི་བོད་མི་ཚོའི་མགྲིན་ཚབ་པ་ཞིག་ཡིན་པར་བསམ་གྱི་ཡོད། འདས་པའི་ལོ་ལྔ་བཅུའི་རིང་རྒྱ་གར་གྱི་ཆེས་མཐོའི་ཆབ་སྲིད་ཀྱི་དབུ་ཁྲིད་རྣམ་པ་དང་། སྤྱི་ཚོགས་ཞབས་ཞུ་བ། མཁས་དབང་སོགས་གྲངས་ལས་འདས་པ་ཞིག་གིས་ངོས་ལ་མཛའ་བརྩེ་ཆེན་པོས་རྒྱབ་སྐྱོར་དང་མཐུན་འགྱུར། ལྷག་པར་སྤྱི་སྒེར་གྱི་ལས་དོན་དུ་མའི་ཐོག་སློབ་སྟོན་གནང་བ་དང་། ཡིད་ཆེས་འཕེར་བའི་མཆེད་གྲོགས་ཀྱི་འདུ་ཤེས་འཛིན་པ་དེ་དག་ནི་ཆེས་རིན་ཐང་ཅན་གྱི་ཕན་གྲོགས་བརྗེད་ཐབས་བྲལ་བ་ཞིག་ཡིན། དེ་དག་གི་མཚན་ནས་སྨོས་ཀྱིས་མི་ལངས་མོད། མཚོན་དཔེ་ཙམ་འགའ་ཞིག་གི་མཚན་དེ་རིང་རྗེས་དྲན་ཞུ་ན། སྐུ་ཞབས་རཇ་གོ་པལཱ་ཅཱརི་དང་། ཌོག་ཊར་ར་ཇེན་དྲཱ་པྲཱ་སཱད། པཎྜི་ཏ་ཇ་ཝ་ཧར་ལལ་ནེཧ་རཱུ། ཨཱ་ཅརྱ་བི་ནོད་བྷཱ་ཝེ། སྐུ་ཞབས་ཇ་ཡ་པྲ་ཀཱ་ཤནཱ་ར་ཡཎ། ཨཱ་ཅརྱ་ཀྲི་པ་ལཱ་ནཱི་སོགས་དྲན་ཡུལ་དུ་ལྷམ་མེར་གསལ་ཞིང་། འདིར་མཚན་སྨོས་མ་ཐུབ་པ་རྣམས་གལ་གནད་ཆུང་བར་བརྩི་བ་ནམ་ཡང་མིན་པར། གྲངས་ལས་འདས་པས་མཚན་སྨོས་ཐབས་བྲལ་བ་ཡིན། ད་ལྟ་ཞལ་བཞུགས་པའི་གྲོགས་པོ་རྣམས་ཀྱང་མཚན་ནས་སྨོས་རྒྱུའི་ངལ་བ་མ་བྱས་པར་ཚང་མའི་བཀའ་དྲིན་རྗེས་དྲན་ཞུ་རྒྱུ་ཡིན།
འདས་པའི་མི་ལོ་ཉིས་སྟོང་བརྒལ་བའི་བྱུང་རབས་སུ་རྒྱ་གར་གྱིས་བོད་ལ་བསྐྱངས་པའི་བཀའ་དྲིན་དང་། ལྷག་པར་ད་ལྟའི་ལོ་ལྔ་བཅུའི་རིང་བོད་མིར་རྒྱ་གར་གཞུང་མང་གིས་བྱམས་གཟིགས་འཚོ་སྐྱོང་གནང་བའི་བཀའ་དྲིན་ནི་གསབ་ཐུབ་པ་ཞིག་མ་ཡིན་ཡང་། དེ་རིང་ངོས་རང་འཕགས་ཡུལ་འདིར་བཙན་བྱོལ་དུ་འབྱོར་ནས་ལོ་ལྔ་བཅུ་སོང་བའི་དུས་ཚིགས་དང་བསྟུན་བཀའ་དྲིན་རྗེས་དྲན་མཚོན་བྱེད་ཙམ་དུ་ཚོགས་འདུ་འདིར་དངོས་སུ་ཕེབས་པའི་མཆེད་གྲོགས་ཕོ་མོ་རྣམ་པའི་བརྒྱུད་རྒྱ་གར་གཞུང་མང་ཡོངས་ལ་སྙིང་ནས་ཐུགས་རྗེ་དང་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་ཡིན།
གོང་དུ་ཞུས་པ་ལྟར་བོད་མི་རིགས་ཀྱི་འདས་པའི་ལོ་ ༡༥༠༠ ཙམ་གྱི་རིང་རྒྱ་གར་ནས་བརྒྱུད་པའི་ནང་པའི་ཆོས་དང་དེའི་རིག་པའི་གཞུང་ལུགས། དེ་ལས་བྱུང་བའི་ལེགས་བྱང་བཅས་རྒྱུན་འཛིན་དང་སྲུང་སྐྱོབ་དར་རྒྱས་རླབས་ཆེན་ཞུས་ཐུབ་པ་དེ་ནི་དྲིན་ལན་བསབས་པའི་བྱ་བ་ཞིག་ཏུ་ངོས་འཛིན་བྱེད་ཀྱི་ཡོད་ཅིང་། དེ་དག་རྒྱ་གར་དུ་ཉམས་དམས་སོང་བ་རྣམས་བསྐྱར་གསོའི་ལམ་ནས་རྒྱ་གར་ལ་ཕྱིར་འབུལ་ཞུ་རྒྱུའི་རེ་འདུན་ཤུགས་ཆེ་ཡོད། སྲིད་བློན་ནེཧ་རཱུས་གནད་དོན་དེའི་ཆེད་འབྲས་ལྗོངས་བོད་རིག་པའི་ཉམས་ཞིབ་ཁང་དང་། ལ་དྭགས་མཚན་ཉིད་སློབ་ཁང་། ཝ་ཎ་དབུས་བོད་ཀྱི་གཙུག་ལག་སློབ་ཁང་བཅས་ཆེད་འཛུགས་བསྐྱངས་པ་ལྟར་ལེགས་སྦྱར་གྱི་མ་དཔེ་རྩ་བརླགས་ཟིན་པའི་གཞུང་ལུགས་བོད་སྐད་དུ་བཞུགས་པ་རྣམས་ནས་ལེགས་སབྱར་གྱིས་མཚོན་རྒྱ་གར་གྱི་སྐད་རིགས་ཁག་ཏུ་བསྒྱུར་ཏེ་བསྐྱར་གསོ་བྱེད་རྒྱུའི་ལས་རིམ་གཞི་རྒྱ་ཆེ་བ་ཞིག་བརྩམས་ཡོད་པ་དེ་དག་ད་ལྟ་གང་ལེགས་སྒྲུབ་བཞིན་ཡོད་པ་ནི་འདོད་བློ་ཚིམས་པའི་གནས་དང་། བོད་མིས་འཛིན་སྐྱོང་བྱེད་པའི་རྒྱ་གར་གྱི་རིག་གཞུང་རྣམས་ད་ཆ་རྒྱ་གར་ལ་བསྐྱར་དུ་འབུལ་ལམ་ཞུ་རྒྱུའི་ལས་རིམ་མཚོན་པའི་ཆེད་བོད་སྐད་ཀྱི་བཀའ་འགྱུར་དང་བསྟན་འགྱུར་ཆ་ཚང་། ཝཎ་དབུས་བོད་ཀྱི་གཙུག་ལག་སློབ་ཁང་ནས་ད་བར་ལེགས་སྦྱར་དུ་བསྐྱར་གསོ་ཟིན་པའི་ཆོས་ཚན་གྲངས་ ༦༣ དང་། ཧིན་སྐད་སོགས་སུ་ཕབ་བསྒྱུར་ཟིན་པའི་ཆོས་ཚན་གྲངས་ ༡༥༠ ལྷག་ཙམ་ཞིག་རྒྱ་གར་རྒྱལ་ཁབ་ལ་འབུལ་ལམ་ཞུ་འཆར་ཡོད། དེ་རིང་ཁྱེད་རྣམ་པར་སྙན་གསན་ཞུ་བ་དང་ཆབས་ཅིག་ངོས་ནས་གཞིས་བྱེས་བོད་མི་ཡོངས་ཀྱི་ཚབ་བྱས་ཏེ་རྒྱ་གར་གྱི་དབུས་དང་མངའ་སྡེའི་གཞུང་དང་མི་མང་ཡོངས་ལ་སྙིང་ནས་ཐུགས་རྗེ་དང་བཀའ་དྲིན་བླ་མེད་དུ་ཆེ་ཞེས་ཡང་ཡང་ཞུ་རྒྱུ་ཡིན།
དེ་བཞིན་བལ་ཡུལ་དང་འབྲུག་ཡུལ་གཉིས་ཀྱང་བོད་ཀྱི་ཁྱིམ་མཚེས་ཆོས་དང་རིག་གཞུང་། སྤྱི་ཚོགས་བཅས་ཀྱི་འབྲེལ་ལམ་དམ་ཟབ་ཡོད་པའི་ཡུལ་ལུང་ཞིག་ཡིན་པ་དང་། རྒྱལ་ཁབ་དེ་གཉིས་ཀའི་ནང་བཙན་བྱོལ་བོད་མི་མི་ཉུང་བ་ཞིག་ད་བར་གནས་སྡོད་ཀྱིས་འཚོ་བ་བཟང་པོ་སྐྱེལ་བཞིན་ཡོད་པས་བལ་འབྲུག་གཉིས་ཀྱི་གཞུང་དང་མང་ཚོགས་བཅས་པར་བཀའ་དྲིན་རྗེས་དྲན་ཞུ་རྒྱུ་ཡིན།
དེ་བཞིན་འཛམ་གླིང་ཡུལ་གྲུ་གང་སར་བཙན་བྱོལ་བོད་མི་མང་ཉུང་ཅི་རིགས་གནས་སྡོད་ཡོད་པའི་རྒྱལ་ཁབ་ཁག་གི་གཞུང་མང་ཡོངས་ལའང་བཀའ་དྲིན་རྗེས་དྲན་ཞུ་རྒྱུ་ཡིན།
འགྲོ་ཀུན་བདེ་བའི་སྨོན་ལམ་དང་བཅས་
ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མ་སྐྱེ་ཕྲེང་བཅུ་བཞི་པས་ ༢༠༠༩ ཕྱི་ཟླ་ ༣ ཚེས་ ༣༡ ལ།།
