ཕྱི་ལོ་ ༢༠༠༩ ཟླ་ ༤ ཚེས་ ༧ རེས་གཟའ་མིག་དམར།
༄༅། །བོད་གཞུང་ཆོས་རིག་ལས་ཁུངས་ནས་གནང་གནས་ནང་། སྔ་འགྱུར་རྙིང་མའི་དབུ་འཛིན་ཟུར་པ་གྲུབ་དབང་པད་ནོར་རིན་པོ་ཆེ་མཆོག་སྐུའི་སྙུང་གཞི་ཆེ་བཞེས་ཡོད་པར། མགོན་པོ་གང་ཉིད་ལ་ཕྱི་ལོ་ ༢༠༠༩ ཟླ་ ༣ ཚེས་ ༢༧ ཉིན་རྒྱ་གར་ལྷོ་ཕྱོགས་རྙིང་དགོན་ཐེག་མཆོག་རྣམ་གྲོལ་གླིང་བཤད་སྒྲུབ་དར་རྒྱས་གླིང་དུ་རྙིང་མའི་ཆོས་སྡེ་ཡོངས་ནས་བརྟན་བཞུགས་བསྟར་འབུལ་ཞུ་འཆར་ཡོད་པ་ལྟར། ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གཞུང་འབྲེལ་ཆེད་ཕེབས་ཀྱིས་གོང་ཚེས་ཉིན་སྔ་དྲོའི་ཆར། སྔ་འགྱུར་བའི་སྐྱེས་ཆེན་དམ་པ་རྣམས་དང་འབྲུག་སོགས་གནད་ཡོད་ཁག་གི་སྐུ་ཚབ་ལྷན་སྒྲུབ་ཞག་སྔོན་སོང་གིས་སྔ་དྲོར་བརྟན་བཞུགས་ཀྱི་གསུང་ཆོག་ལེགས་གྲུབ་རྗེས་རིམ་བཞིན་སྦེང་ལོར་སྨན་ཁང་དུ་ཆེད་བཅར་གྱིས་རྟེན་དང་གསོལ་འདེབས་སྙན་བསྐུལ་ཞུས། ཉིན་རྒྱབ་མགོན་པོ་གང་ཉིད་སྨན་ཁང་ནས་དགོན་པར་ཕྱིར་ཕེབས་གནང་ནའང་ཉིན་དེའི་མཚན་མོའི་ཚོུད་ ༨་༢༠ ཐོག་རེ་ཞིག་སྐུ་ཞི་བར་གཤེགས། ཕྱི་ཚེས་ ༢༨ ཉིན་གྱི་སྔ་དྲོ་ཆོས་རིག་བཀའ་བློན་མཆོག་ནས་བཙན་བྱོལ་བོད་གཞུང་གི་སྐུ་ཚབ་ཞུས་ཏེ་གྲྭ་ཚང་དང་བླ་བྲང་བཅས་ལ་ཐུགས་གསོའི་ཆེད་མཇལ་བཅར་ཞུས། ཕྱི་ཚེས་ ༣༡ ཉིན་ལྡི་ལི་ཕི་ཀི་[FICCI Auditorium]ཞེས་པའི་ཚོགས་ཁང་ཆེན་མོའི་ནང་ལོ་ ༥༠ བཙན་བྱོལ་དུ་འདས་པའི་བོད་མིའི་སྐྱིད་སྡུག་དྲན་གསོ་དང་འབྲེལ། རྒྱ་གར་གཞུང་མང་ཡོངས་ལ་བོད་མི་སྐྱབས་བཅོལ་བས་བཀའ་དྲིན་ཆེ་བའི་ཐུགས་རྗེ་ཆེ་ཞུའི་དུས་དྲན་མཛད་སྒོར་ཆེད་བཅར་ཞུས་ཏེ་འདི་ཚེས་ ༡ ཉིན་རྡ་སར་ཕྱིར་ཕེབས་གནང་བའི་གནས་བསྡུས་སུ།།
