ཕྱི་ལོ་ ༢༠༠༩ ཟླ་ ༣ ཚེས་ ༡༤ རེསགཟའ་སྤེན་པ།

༄༅། །ཁུངས་ལྡན་གྱི་གནས་ཚུལ་མུ་མཐུད་འབྱོར་བར་གཞིགས་ན། ད་རེས་ཕྱི་ཟླ་ ༣ ཚེས་ ༡༠ ཉིན་དགུང་ཆུ་ཚོད་ ༡༡ ཙམ་དུ་དགེ་འདུན་པ་ཞིག་ནས་ལི་ཐང་རྫོང་དུ་ཞི་བའི་སྐད་འབོད་བྱེད་སྐབས་རྒྱ་གཞུང་དྲག་ཆས་དམག་མིས་འཛིན་བཟུང་སྐབས་དམག་མི་དང་མི་མང་དབར་ཕར་འཐེན་ཚུར་འཐེན་བྱས་རྗེས་དགེ་འདུན་པ་དེ་འཛིན་བཟུང་བྱ་ཐུབ་ཡོད་མེད་ཀྱི་གནས་ཚུལ་ཁ་གསལ་གང་ཡང་མིན་འདུག

དེ་རྗེས་ཉིན་རྒྱབ་ཆུ་ཚོད་ ༣ ཙམ་ལ་སླར་ཡང་དགེ་འདུན་པ་ཞིག་ནས་ལི་ཐང་རྫོང་དུ་ཞི་བའི་སྐད་འབོད་བྱས་མ་ཐག་འཛིན་བཟུང་བྱས་ཡོད་འདུག འཛིན་བཟུང་དུ་ཚུད་པའི་དགེ་འདུན་པ་དེའི་མིང་ལ་བློ་བཟང་དབང་ཕྱུག་ཟེར་ཞིང་། ད་ལྟ་རང་ལོ་ ༢༩ ཙམ་ཡིན་ཅིང་། ལི་ཐང་རྫོང་འབྲང་ལ་ཤང་དབྲ་བ་ཀླད་དཀར་མདོ་ནས་ཡིན་ཅིང་། དགེ་འདུན་པ་དེ་གཉིས་ནི་ལི་ཐང་དགོན་ཆེན་གྱི་དགེ་འདུན་པ་ཡིན་བཟོ་འདུག་པ་ལས་ཞིབ་ཕྲའི་ལོ་རྒྱུས་ཁ་གསལ་མིན་འདུག