ཕྱི་ལོ་ ༢༠༠༩ ཟླ་ ༣ ཚེས་ ༡༦ རེས་གཟའ་ཟླ་བ།
ཕྱི་ལོ་ ༢༠༠༩ ཟླ་ ༣ ཚེས་ ༡༣ ཉིན་གསར་འགོད་གསལ་བསྒྲགས་ཤིག་གི་སྐབས་སྲིད་བློན་ཝུན་ཅ་པའོ་ཡིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབུ་ཁྲིད་རྣམ་པས་༸གོང་ས་མཆོག་གི་སྐུ་ཚབ་དང་ལྷན་འབྲེལ་གཏུགས་གྲོས་མོལ་མུ་མཐུད་བྱ་འདོད་ཡོད་ཚུལ་གསུངས་པར་ང་ཚོས་དགའ་བསུ་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་ག་དུས་ཡིན་ནའང་རྒྱ་ནག་གི་དབུ་ཁྲིད་ཚོ་དང་མཉམ་དུ་བོད་ཀྱི་དཀའ་རྙོག་སེལ་རྒྱུར་གཉིས་མོས་ཀྱི་ཐབས་ལམ་འཚོལ་བ་གནང་རྒྱུའི་གྲ་སྒྲིག་ཨང་གསར་ཡིན།
༸གོང་ས་༸སྐྱབས་མགོན་ཆེན་པོ་མཆོག་ནས་གང་རྩོལ་སྒྲུབ་གནང་གི་ཡོད་པ་ནི་འབྲེལ་མོལ་ཐེངས་བརྒྱད་པའི་སྐབས་༸གོང་ས་མཆོག་གི་སྐུ་ཚབ་རྣམ་པས་ ༢༠༠༨ ཕྱི་ཟླ་ ༡༠ ཚེས་ ༣༡ ཉིན་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཐོག་ནས་རྒྱ་ནག་གཞུང་ལ་སྤྲད་པའི་ནང་ཁ་གསལ་ཡོད། བསམ་འཆར་ཡིག་ཆ་དེའི་ནང་བོད་མིའི་མངོན་འདོད་གང་ཡིན་པ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྙིང་དོན་གཞིར་བཟུང་ཁ་གསལ་བཏོན་ཡོད། སྲིད་བློན་ཝུན་ཅ་པའོས་བསམ་འཆར་ཡིག་ཆ་དེ་དང་ལེན་བྱེད་རྒྱུར་གཡོལ་ཐབས་ལྟ་བུར་༸གོང་ས་མཆོག་གི་སྐབས་སྔོན་མའི་གསུང་འཕྲིན་ཁག་ཅིག་ལུང་འདྲེན་བྱེད་འདུག
སྐབས་མང་པོར་༸གོང་ས་༸སྐྱབས་མགོན་ཆེན་པོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ནས་ཁ་བྲལ་རྩོལ་སྒྲུབ་གནང་གི་མེད་པ་བསྐྱར་ཟློས་ཡང་ཟློས་གནང་ཡོད། རྒྱ་ནག་གི་སྲིད་བློན་གྱིས་༸གོང་ས་མཆོག་ལ་ཁ་བྲལ་རྩོལ་སྒྲུབ་གནང་གི་ཡོད་པའི་སྐྱོན་འཛུགས་ནི་དྲང་བདེན་གྱི་གནས་ཚུལ་ཞིག་རྩ་བ་ནས་མ་རེད། རྒྱལ་སྤྱིའི་མི་མང་གིས་དངོས་ཡོད་གནས་ཚུལ་དེ་གསལ་པོ་མཁྱེན་གྱི་ཡོད་ཙང་དེར་གསལ་ཁ་བསྐྱར་སྟོན་གྱི་དགོས་གལ་མ་མཐོང་།
པེ་ཅིང་གཞུང་ནས་ལྷག་བསམ་རྣམ་དག་གིས་བོད་ཀྱི་དཀའ་རྙོག་སེལ་རྒྱུར་རྣམ་འགྱུར་གསལ་སྟོན་བྱེད་པའི་རེ་བ་ཡོད།
བཙན་བྱོལ་བོད་གཞུང་གི་བཀའ་བློན་ཁྲི་པ་ཟམ་གདོང་བློ་བཟང་བསྟན་འཛིན་གྱིས་ཕྱི་ལོ་ ༢༠༠༩ ཟླ་ ༣ ཚེས་ ༡༤ ལ།།
