ཕྱི་ལོ་ ༢༠༠༩ ཟླ་ ༣ ཚེས་ ༦ རེས་གཟའ་པ་སངས།

༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༠༩ ཟླ་ ༣ ཚེས་ ༤ ནས་ཚེས་ ༥ བར་ཉིན་གྲངས་གཉིས་རིང་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་དང་རྒྱལ་སྤྱིའི་བསྟི་གནས་ཁང་ (India International Centre)དུ་ཚོགས་པའི་ལྷོ་ཨེ་ཤི་ཡའི་སྤྱི་མཐུན་རྒྱལ་ཁབ་ཀྱི་རྩོམ་པ་པོའི་ལྷན་ཚོགས་ཐོག་དབུ་འབྱེད་ཀྱི་གསུང་འཕྲིན་ཞིག་སྩལ་གནང་མཛད་ཡོད་པ་དེ་ལྷོ་ཨེ་ཤི་ཡའི་སྤྱི་མཐུན་རྒྱལ་ཁབ་ཀྱི་རྩོམ་པ་པོའི་ལྷན་ཚོགས་ཀྱི་ཚོགས་གཙོ་མཆོག་གིས་ལྗགས་ཀློག་གནང་ཡོད།

དེ་ཡང་གསུང་འཕྲིན་དེའི་ནང་འཁོད་དོན། རྒྱལ་ས་ལྡི་ལིའི་ནང་ལྷོ་ཨེ་ཤི་ཡའི་སྤྱི་མཐུན་རྒྱལ་ཁབ་ཀྱི་རྩོམ་སྒྲིག་མཐུན་ཚོགས་ནས་འགོ་ཁྲིད་གནང་སྟེ་ཉིན་གྲངས་གཉིས་རིང་ནང་ཆོས་ཀྱི་ཐོག་ལ་བགྲོ་གླེང་གནང་གི་ཡོད་པ་རེད། ཁྱེད་རྣམས་ནས་ངོས་རང་ལྷན་ཚོགས་དེའི་དབུ་འབྱེད་ཀྱི་སྐུ་མགྲོན་དུ་མགྲོན་འབོད་བྱས་པར་དགའ་པོ་བྱུང་ཐུགས་རྗེས་ཆེ་ཞུ་རྒྱུ་ཡིན། འོན་ཀྱང་ངོས་རང་གཡོལ་ཐབས་མེད་པའི་ལས་འཆར་མང་པོ་ཞིག་གི་རྐྱེན་པས་བཅར་ཐུབ་མ་སོང་བར་བློ་འགྱོད་ཆེན་པོ་བྱུང་། ཚོགས་བཅར་བ་རྣམས་ནས་ལྷན་ཚོགས་དེའི་བརྗོད་གཞི་ཐོག་བགྲོ་གླེང་ལྷུག་པོ་ཡོང་བའི་སྨོན་འདུན་ཞུ་རྒྱུ་བཅས། ཞེས་པའི་གསུང་འཕྲིན་ཞིག་སྩལ་ཡོད།།