ཕྱི་ལོ་ ༢༠༠༩ ཟླ་ ༢ ཚེས་ ༢༡ རེས་གཟའ་སྤེན་པ།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༠༩ ཟླ་ ༢ ཚེས་ ༡༩ རེས་གཟའ་ཕུར་བུའི་ཉིན་ཕྱེད་ཡོལ་ཆུ་ཚོད་ ༤།༣༠ ཙམ་ལ་རྒྱ་གར་ལྷོ་ཕྱོགས་བོད་མིའི་གཞིས་ཆགས་སྦེལ་ཀོབ་ལུགས་གསུམ་བསམ་གྲུབ་གླིང་དུ་༸ཞབས་སོར་བདེ་བར་འཁོད་ཡོད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྦེལ་ཀོབ་བོད་མིའི་གཞིས་ཆགས་ཀྱི་སློབ་གྲྭའི་ཐང་སྟེང་དུ་ཐད་འཕུར་གནམ་གྲུར་བཞུགས་ནས་༸ཞབས་སོར་འཁོད་མཚམས་དེ་གར་བཅར་བའི་གསར་འགོད་པར་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་ཆབས་ཅིག་ཀར་ཎཱ་ཊ་ཀའི་མངའ་སྡེའི་མི་མང་སྤྱི་དང་ལྷག་པར་རྒྱ་གར་གཞུང་ནི་བོད་མིར་བཀའ་དྲིན་ཆེན་པོ་ཡིན་སྐོར་གྱི་བཀའ་སློབ་མདོར་བསྡུས་ཤིག་སྩལ་ཡོད།
དེ་ནས་༸གོང་ས་༸སྐྱབས་མགོན་ཆེན་པོ་མཆོག་སེ་ར་བླ་སྤྱིར་ཆིབས་སྒྱུར་བསྐྱངས་ཏེ་མགོན་པོ་གང་ཉིད་ལ་ཕེབས་བསུ་དང་དགའ་སྟོན་གྱི་མཛད་སྒོར་ལྷན་ཞུགས་གནང་ཡོད་པ་དང་། དེ་རྗེས་སེ་ར་བྱེས་སྨད་གཉིས་ཀྱི་མཁན་རིན་པོ་ཆེ་རྣམ་གཉིས་དང་ས་གནས་འགོ་འཛིན་བཅས་ནས་༸གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་ས་གནས་དང་འབྲེལ་བའི་སྐོར་ལ་བཀའ་སློབ་སྩལ་ཡོད་འདུག དེ་རྗེས་བཞུགས་གནས་མཛད་ཡུལ་སེར་བྱེས་སུ་ཆིབས་སྒྱུར་བསྐྱངས་ཏེ་སེར་བྱེས་མཁན་རིན་པོ་ཆེ་མཆོག་ནས་སེར་བྱེས་རྟ་མགྲིན་ཁང་དུ་༸གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས་ཡོད།
ཐེངས་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གདན་ས་ཆེན་པོ་སེ་ར་ཆོས་སྒར་དུ་ཆིབས་སྒྱུར་བསྐྱངས་དོན་གཙོ་བོ་སེར་བྱེས་ནས་ཇི་ལྟར་གསོལ་བ་བཏབ་པ་བཞིན་ཁུལ་དེའི་དགེ་འདུན་པ་གྲངས་ ༡༠༠༠ ཙམ་ལ་བསྙེན་རྫོགས་ཀྱི་སྡོམ་པ་འབོགས་ཆོག་ཆེད་ཆིབས་སྒྱུར་བཀའ་དྲིན་བསྐྱངས་པ་ཞིག་ཡིན་འདུག
