ཕྱི་ལོ་ ༢༠༠9 ཟླ་ ༢ ཚེས་ ༡༧ རེས་གཟའ་མིག་དམར།

༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲེིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཡུ་རོབ་ཀྱི་ཡུལ་གྲུ་ཨི་ཊ་ལི་དང་ཇར་མི་ནི། རྒྱ་གར་གྱི་རྒྱལ་ས་ལྡི་ལི་བཅས་ལ་ཆོས་སྲིད་ཀྱི་མཛད་འཕྲིན་ཁག་ལེགས་པར་བསྐྱངས་གྲུབ་མཚམས་ཕྱི་ལོ་ ༢༠༠༩ ཟླ་ ༢ ཚེས་ ༡༥ རེས་གཟའ་ཉི་མའི་ཕྱེད་ཡོལ་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་རྒྱལ་ས་སྦེང་ལོར་ནང་༸ཞབས་སོར་འཁོད་སྐབས་སྦེང་ལོར་ནང་སློབ་སྦྱོང་བྱེད་བཞིན་ཡོད་པའི་བོད་པའི་གཞོན་སྐྱེས་མཐོ་སློབ་སློབ་ཕྲུག་དང་། ས་གནས་བོད་རིགས་ཚོང་པ་རྣམས་ཀྱིས་དགའ་དད་སྤྲོ་གསུམ་དང་བཅས་ཕེབས་བསུ་གཟབ་རྒྱས་ཞུས་ཡོད་འདུག

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྦེང་ལོར་བོད་ཕྲུུག་ཁྱིམ་སྡེའི་མཐོ་སློབ་གསར་པའི་མིང་བྱང་ཞལ་དབྱེ་གནང་བཞིན་པ།

ཕྱི་ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྦེང་ལོར་དུ་གསར་འཛུགས་གནང་བའི་བོད་ཕྲུག་ཁྱིམ་སྡེའི་མཐོ་སློབ་གསར་པ་དབུ་འབྱེད་བཀའ་དྲིན་བསྐྱངས་ཏེ་ཏཱ་ལའི་བླ་མའི་མཐོ་སློབ་སློབ་གཉེར་ཁང་(The Dalai Lama Institute of Higher Education)ཞེས་མཚན་གསོལ་གནང་ཡོད་པ་རེད། མཐོ་སློབ་དབུ་འབྱེད་ཀྱི་མཛད་སྒོར་དམིགས་བསལ་སྐུ་མགྲོན་ཀ་ན་ཊ་ཀ་མངའ་སྡེའི་ཤེས་ཡོན་བློན་ཆེན་ཟུར་པ་སྐུ་ཞབས་ཌོག་ཊར་ཇི་པ་ར་མི་ཤི་་ཊ་ར་(Dr G Parameshwatr) དང་། ཞིང་ལས་གཙུག་ལག་སློབ་གཉེར་ཁང་གི་དབུ་འཛིན་གཞོན་པ། (Agriculture University’s Chancellor)དབུས་པའི་རྒྱ་གར་བ་མི་གྲངས་ ༢༠༠ ཙམ་དང་ཁྱོན་བསྡོམས་མི་གྲངས་ ༢༠༠༠ ཙམ་ཆེད་བཅར་གནང་ཡོད་པ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཐོ་སློབ་གསར་པའི་ཁང་པའི་ཆགས་དབྱིབས་ལ་གཟིགས་ཞིབ་གནང་བཞིན་པ།

མཐོ་སློབ་གསར་པ་དེའི་རྒྱ་ཁྱོན་ཨེ་ཁར་ ༣༧ ཡོད་པ་དང་། ཐོག་མར་སློབ་ཕྲུག་ ༥༠༠ ཙམ་ཡོད་པ་ནས་འགྲོ་གྲོན་གྱི་ཡོང་ཁུངས་ལ་གཞིགས་ཏེ་སློབ་ཕྲུག ༥༠༠༠ བར་རྒྱ་བསྐྱེད་གནང་རྒྱུའི་འཆར་གཞི་ཡོད་འདུག མཐོ་སློབ་དེའི་ནང་བོད་ཀྱི་རིག་གཞུང་དང་སྐད་ཡིག་གཙོས་པའི་དེང་དུས་ཀྱི་ཤེས་ཡོན་ཚན་རིག་དང་། འབྱུང་རིམ། ཀམ་པུར་ཊར། སློབ་སྟོན་པ་ལ་སོགས་པའི་ཐོག་ལ་སློབ་ཁྲིད་གནང་རྒྱུ་ཡིན་འདུག

དབུ་འབྱེད་མཛད་སྒོ་གྲུབ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་མཛད་སྒོར་ཆེད་བཅར་བ་རྣམས་ལ་བཀའ་སློབ་སྩོལ་བཞིན་པ།