ཕྱི་ལོ་ ༢༠༠༩ ཟླ་ ༢ ཚེས་ ༡༠ རེས་གཟའ་མིག་དམར།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༠༩ ཟླ་ ༡ ཚེས་ ༧ ཉིན་དཀར་མཛེས་རྫོང་ཐོག་ཏུ་ནམ་མཁའ་བསོད་ནམས་ཀྱི་བོད་རང་བཙན་ཡིན། རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག་སོགས་ཀྱི་འབོད་ཚིག་སྒྲོག་པ་དང་ཆབས་ཅིག་ཡིག་ཆ་ཡང་གཏོར་འགྲེམས་བྱས་འདུག དུས་ཡུན་སྐར་མ་བཅོ་ལྔ་བཅུ་ཙམ་མ་འགོར་བར་རྫོང་སྤྱི་བདེ་མི་སྣས་ཉེས་རྡུང་གཏོང་བཞིན་འཛིན་བཟུང་བྱས་ཡོད་པའི་གནས་ཚུལ་ཐོན་འདུག ནམ་མཁའ་བསོད་ནམས་ལགས་ནི་སྐྱེས་ཡུལ་ཁམས་དཀར་མཛེས་རྫོང་གསེར་ཚུ་སྟེང་ཤང་རྫོང་དགེ་ཚང་ནས་ཡིན་ཞིང་ད་ལྟ་རང་ལོ་ ༢༧ ལ་སོན་གྱི་ཡོད་པ་རེད། ཁོང་འཛིན་བཟུང་བྱས་པའི་ཉིན་རྗེས་མར་ཁོང་གི་ཕ་དང་གཅེན་མོ་སོགས་ནས་རྫོང་སྤྱི་བདེ་ལས་ཁུངས་སུ་བསྐྱོད་དེ་གློད་བཀྲོལ་གཏོང་དགོས་པའི་རེ་འདུན་བཏོན་ཡང་དོན་འབྲས་གང་ཡང་སོན་མེད་པའི་གནས་ཚུལ་ཐོན་འདུག དེ་དང་ཕྱོགས་མཚུངས་ཕྱི་ལོ་ ༢༠༠༩ ཟླ་༡ ཚེས་ ༡༥ ཉིན་བོད་ནང་གི་ཕྱི་དྲོའི་ཆུ་ཚོད་ ༥།༦ བར་རྔ་པ་རྫོང་རྨེ་རུ་མའི་རི་ཆེན་དང་པོའི་གཡང་ལི་ཚང་གི་བུ་ཀི་རྟི་དགོན་པའི་གྲྭ་བློ་བཟང་ཀི་རྟི་ཞུ་བ། རང་ལོ་ ༢༧ སོན་པ་ཞིག་ལ་རྔ་པ་རྫོང་སྤྱི་བདེ་འབྲེལ་ཡོད་ཚན་པས་སབྱར་ཡིག་བཀྲམ་པའི་དོགས་གཞིའི་འོག་རྔ་པ་རྫོང་ཐོག་དཔར་སློག་རྒྱག་ས་ཞིག་ནས་འཛིན་བཟུང་བྱས་པའི་གནས་ཚུལ་ཐོན་འདུག ཁོང་ནི་དེ་སྔོན་རྔ་པ་ཀིརྟི་དགོན་པའི་ནང་བསྟན་གཞོན་ནུའི་རིགས་སློབ་ཁང་དུ་སློབ་གཉེར་གནང་མྱོང་ཡོད་ལ་དུས་དེབ་དང་ཚགས་པར་སོགས་ཀྱི་སྟེང་ལ་རྩོམ་ཡིག་ཁ་ཤས་ཀྱང་སྤེལ་མྱོང་ཡོད་པ་ཙམ་མ་ཟད། དགོན་པ་ནས་འདོན་སྤེལ་བྱེད་བཞིན་པའི་༼གངས་རྩེའི་མེ་ཏོག་༽ཅེས་པའི་རྩོམ་སྒྲིག་གི་ཚོགས་མི་ཡང་ཡིན་འདུག
