ཕྱི་ལོ་ ༢༠༠༩ ཟླ་ ༢ ཚེས་ ༧ རེས་གཟའ་སྤེན་པ།

༄༅། །མཚུངས་མེད་དབུས་ལས་ཁུངས་ཁག་གི་དྲུང་ཆེ་འགན་འཛིན་རྣམ་པ་ལྷན་རྒྱས་མཆོག་གང་དེར།

ཆེད་ཞུ།

མཁྱེན་གསལ་ལྟར་བོད་ས་བྱི་ལོའི་ནང་བོད་དུ་དྲག་གནོན་གྱི་གནས་ཚུལ་ཚབས་ཚེའི་འོག་བོད་མི་བརྒྱ་ཕྲག་མང་པོ་རྐྱེན་འདས་དང་། སྟོང་ཕྲག་མང་པོ་བཙོན་འཇུག་འོག་ཚུད་པ་མ་ཟད། ད་ལྟའང་བཙན་གནོན་དམ་བསྒྲགས་ཀྱི་གནས་ཚུལ་ཡོད་པ་བཅས་ལ་བརྟེན། འཆར་ལོ་ས་གླང་ལོའི་ལོ་གསར་སྐབས་གཞུང་འབྲེལ་གྱི་མཛད་སྒོ་རིམ་པའི་ནང་ཚེས་གཏོང་དང་། བསང་གསོལ་སོགས་ཆོས་ཕྱོགས་ཀྱི་མཛད་སྒོ་རྣམས་སྲོལ་རྒྱུན་ལྟར་གནང་བ་མ་གཏོགས། གསོལ་སྟོན་དང་། ཞབས་གཞས། ཤོག་པག་སྤར་བ་སོགས་བག་ཡངས་སྤྲོ་སྐྱིད་ཀྱི་ལས་རིམ་གཏན་ནས་མེད་པ་དགོས་རྒྱུ་མ་ཟད། གཞུང་ཞབས་ལས་བྱེད་རྣམས་ཀྱང་སྤྲོ་སྐྱིད་གསོལ་སྟོན་སོགས་སུ་ཕེབས་གནང་མེད་པ་དགོས་རྒྱུ་ཞེས་ཕེབས་འདུག་པ་དེ་གའི་ཁྱབ་ཁོངས་ས་གནས་འགོ་འཛིན་ལས་ཁུངས་ཁག་དང་། སྐུ་ཚབ་དོན་གཅོད་ལས་ཁང་། སློབ་གྲྭ། སྨན་ཁང་བཅས་ལ་བརྡ་ཁྱབ་འཕྲལ་དུ་གནང་སྐྱོང་དགོས་པ་དགོངས་འཇགས་ཞུ།

བཀའ་དྲུང་ཡིག་ཚང་ནས་ ༢༠༠༩ ཕྱི་ཟླ་ ༢ ཚེས་ ༧ ལ་ཕུལ།།