ཕྱི་ལོ་ ༢༠༠༩ ཟླ་ ༡ ཚེས་ ༡༤ རེས་གཟའ་ལྷག་པ།

༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨི་ཊ་ལིའི་རྒྱལ་ས་རོམ་གཞུང་གིས་གྲོང་ཁྱེར་དེའི་མི་སེར་གྱི་ཆེ་བསྟོད་ཕྱག་འཁྱེར་འབུལ་སླད་ཕྱི་ལོ་ ༢༠༠༩ ཟླ་ ༢ ནང་རོམ་དུ་གདན་ཞུའི་གསོལ་འདེབས་ཞུས་ཡོད་སྐོར་ཨི་ཊ་ལིའི་རྒྱལ་ས་རོམ་གྲོང་ཁྱེར་གྱི་སྤྱི་ཁྱབ་ཇི་ཡ་ནི་ཨ་ལི་མན་ནོ་(Mayor Gianni Alemanno) མཆོག་གི་མགྲིན་ཚབ་པས་གསལ་བསྒྲགས་གནང་ཡོད་འདུག ཡིན་ནའང་ཁོང་གིས་གསུང་དོན། བོད་མིའི་༸སྐྱབས་མགོན་ཏཱ་ལའི་བླ་མ་མཆོག་ཆིབས་སྒྱུར་བསྐྱང་ཐུབ་མིན་ད་ལྟ་གཏན་འཁེལ་བྱུང་མེད། ཅེས་གསུངས་ཡོད་པ་རེད། ཨི་ཊ་ལིའི་རྒྱལ་ས་རོམ་གྲོང་སྡེ་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱལ་སྤྱིའི་ནང་འགྲོ་བ་མིའི་ཐོབ་ཐང་གོང་སྤེལ་གཏོང་ཐབས་གནང་བ་དང་ལྷག་དོན་འཚེ་མེད་ཞི་བའི་ཐབས་ལམ་གྱི་ཐོག་ནས་བོད་ཀྱི་གནད་དོན་གསལ་ཐབས་གནང་བཞིན་ཡོད་པར་ཆེ་བསྟོད་ཞུ་སླད་སྔ་ལོའི་ཕྱི་ཟླ་ ༩ ནང་༸གོང་ས་༸སྐྱབས་མགོན་ཆེན་པོ་མཆོག་ལ་གྲོང་ཁྱེར་དེའི་མི་སེར་གྱི་ཆེ་བསྟོད་ཕྱག་འཁྱེར་འབུལ་རྒྱུའི་གྲོས་ཆོད་གཏན་འབེབས་གནང་ཡོད་པ་རེད། རོམ་གྲོང་ཁྱེར་གྱི་སྤྱི་ཁྱབ་ཀྱི་མགྲིན་ཚབ་པས། སྔར་ལོའི་སྟོན་དུས་སྐབས་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་ལ་ཆེ་བསྟོད་ཀྱི་ཕྱག་འཁྱེར་དེ་འབུལ་རྒྱུའི་འཆར་གཞི་ཡོད་ནའང་སྐབས་དེར་སྐུ་ཉིད་ཀྱི་སྐུ་ཁམས་ཅུང་དྭངས་མིན་གྱི་རྐྱེན་པས་ཆིབས་སྒྱུར་བསྐྱང་ཐུབ་མེད། ཅེས་འགྲེལ་བརྗོད་ཀྱང་གནང་ཡོད་པ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༠༧ ཟླ་ ༡༢ ནང་ཨི་ཊར་ལིར་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་རྣམས་ཀྱི་ལྷན་ཚོགས་ལ་ལྷན་བཞུགས་ཆེད་ཆིབས་སྒྱུར་བསྐྱངས་ཡོད་པ་རེད། སྐབས་དེར་ཨི་ཊ་ལིའི་གྲོས་ཚོགས་ཀྱི་འཐུས་མི་རྣམས་དང་མཇལ་འཕྲད་གནང་ཡོད་འདུག