ཕྱི་ལོ་ ༢༠༠༩ ཟླ་ ༡ ཚེས་ ༡༧ རེས་གཟའ་སྤེན་པ།
༄༅། །གཞི་རིམ་བར་མའི་སློབ་ཚན་འཆར་གཞི་དང་བསླབ་གཞིའི་རྩ་འཛིན་བཟོ་འགོད་སླད། ཤེས་རིག་ལས་ཁུངས་ཀྱིས་ལས་གཞི་དང་སློབ་ཚན་ལ་གཞིགས་ཏེ་ཆེད་ལས་མཁས་པའི་ཚོགས་ཆུང་མི་འདྲ་བ་བཞི་འཆར་འགོད་གནང་ཡོད་པའི་ཁོངས། ཕྱི་ལོ་ ༢༠༠༨ ཟླ་ ༨ ནང་ཐོག་མའི་ཆར་བོད་ཁྱིམ་གཉིས་དང་སམ་བྷོ་ཊ་བཅས་ཀྱི་དགེ་རྒན་དང་ཤེས་ཡོན་འགན་འཛིན་ཐེ་བའི་ཚོགས་མི་ ༡༢ ལས་གྲུབ་པའི་བཙན་བྱོལ་བོད་མིའི་གཞི་རིམ་བར་མའི་བསླབ་གཞིའི་རྩ་འཛིན་བཟོ་འགོད་ཚོགས་ཆུང་བསྐོ་འཛུགས་གནང་ཡོད། ཚོགས་ཆུང་འདིས་འཆར་ཟིན་ལྟར་འདི་ལོའི་ཕྱི་ཟླ་ ༤ པ་ཡས་མས་སུ་ཤེས་ཡོན་སྲིད་བྱུས་ཀྱི་དགོངས་དོན་བཞིན་གཞི་རིམ་བར་མའི་བསླབ་གཞིའི་རྩ་འཛིན་གྱི་གཞི་རྩའི་ལམ་སྟོན་རགས་ཟིན་བཟོ་འགོད་གནང་འཆར་ཡོད། དེ་སྔོན་ཕྱི་ལོ་ ༢༠༠༦ ལོར་ཤེས་རིག་ལས་ཁུངས་ཀྱིས་བསྐོ་འཛུགས་གནང་བའི་སྔོན་འགྲོ་དང་གཞི་རིམ་འོག་མའི་བསླབ་གཞིའི་རྩ་འཛིན་བཟོ་འགོད་ཚོགས་ཆུང་གིས་བཟོ་འགོད་བྱས་པའི་འཆར་ཟིན་ལ་བཀའ་ཤག་གིས་མཐའ་མའི་གཏན་འབེབས་གནང་ཡོད། ཕྱི་ལོ་ ༢༠༠༨ ཕྱི་ཟླ་ ༧ ཚེས་ ༢༠ ཉིན་འདི་ག་ཤེས་རིག་ལས་ཁུངས་ཀྱིས་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་ཀྱི་དགོངས་དོན་བཞིན་སྔོན་འགྲོ་ནས་གཞི་རིམ་འོག་མ་བར་གྱི་སློབ་ཚན་ཚང་མའི་བསླབ་གཞིའི་རྩ་འཛིན་ཞེས་པའི་ཤེས་ཡོན་སྲིད་བྱུས་དང་འབྲེལ་བའི་རྩ་འཛིན་དེབ་ཆུང་འགྲེམས་སྤེལ་དང་སྦྲགས་གཏན་ཉིན་སློབ་གྲྭ་ཡོངས་སུ་རྩ་འཛིན་དེ་ལག་བསྟར་དམ་དོན་དགོས་པའི་བཀོད་ཁྱབ་གནང་ཡོད་འདུག།
